സ്കൂട്ടർ മോഷണം: രണ്ടുപേർ പിടിയിൽ

തിരുവനന്തപുരം: വട്ടിയൂർക്കാവിൽനിന്ന്​ സ്കൂട്ടർ മോഷ്​ടിച്ച രണ്ടുപേരെ പൊലീസ് പിടികൂടി. കാഞ്ഞിരംപാറ വി.കെ.പി നഗർ തേജസ് കോട്ടേജിൽ ജഫിൻ വിൽസൺ (21), വിളപ്പിൽ മൈലാടി മേക്കുംകര പുത്തൻവീട്ടിൽ അഖിൽ (22) എന്നിവരെയാണ് വട്ടിയൂർക്കാവ് പൊലീസ് അറസ്​റ്റ് ചെയ്തത്.

മേയ് 25ന്​ വൈകീട്ടായിരുന്നു മോഷണം. കടകളിൽ ഭക്ഷ്യവസ്തുക്കൾ എത്തിച്ച് വിൽപന നടത്തുന്ന വാഴോട്ടുകോണം സ്വദേശിനി സതി, പാപ്പാട് ജങ്​ഷനിലെ കടയുടെ മുന്നിൽ സ്കൂട്ടർ പാർക്ക് ചെയ്ത് കടയിലേക്ക്​ പോയപ്പോൾ അവിടെ നിൽക്കുകയായിരുന്ന പ്രതികൾ വാഹനം മോഷ്​ടിച്ച്​ കടക്കുകയായിരുന്നു. പരാതിയുടെ അടിസ്ഥാനത്തിൽ കേസ് രജിസ്​റ്റർ ചെയ്ത് നടത്തിയ അന്വേഷണത്തിലാണ് നമ്പർ പ്ലേറ്റ് മാറ്റി​െവച്ച് ഉപയോഗിച്ചുവന്നിരുന്ന സ്​കൂട്ടർ അടക്കം പ്രതികളെ പൊലീസ് പിടികൂടിയത്.

വട്ടിയൂർക്കാവ് എസ്.എച്ച്.ഒ ആനന്ദബാബു, എസ്.ഐമാരായ ഹരീഷ്, ബിജു, യേശുദാസ്, എ.എസ്.ഐമാരായ രാജേഷ്, ഷൗക്കത്ത്, എസ്.സി.പി.ഒമാരായ അനൂപ്, ഹരികൃഷ്ണൻ, സൈജു എന്നിവരടങ്ങിയ പൊലീസ് സംഘമാണ് അന്വേഷണത്തിനും അറസ്​റ്റിനും നേതൃത്വം നൽകിയത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.