വയോധികനെ മർദിച്ച് കൊലപ്പെടുത്താൻ ശ്രമിച്ച സംഘത്തിലെ രണ്ടുപേർ അറസ്​റ്റിൽ

തിരുവനന്തപുരം: വിഴിഞ്ഞംസ്വദേശിയായ വയോധികനെ മർദിച്ച് കൊലപ്പെടുത്താൻ ശ്രമിച്ച സംഘത്തിലെ രണ്ടുപേരെ പൊലീസ് പിടികൂടി. വിഴിഞ്ഞം കരയടിവിള കൈതവിളാകംവീട്ടിൽ ഷെഫിൻ (23), വെങ്ങാനൂർ കൈതവിളാകം ആരതിഭവനിൽ ജഗൻ എന്ന അഖിരാജ് (22) എന്നിവരെയാണ് വിഴിഞ്ഞം പൊലീസ് അറസ്​റ്റ്​ ചെയ്തത്.

കഴിഞ്ഞ 17ന് വൈകുന്നേരം ഏഴിനാണ് സംഭവം. വിഴിഞ്ഞം കോട്ടപ്പുറം സ്വദേശിയായ 63 വയസ്സുള്ള പാസ്​റ്റർ ജാക്സനെയാണ് എട്ടംഗ സംഘം ഹെൽമറ്റും തടിക്കഷണങ്ങളും ഉപയോഗിച്ച് ക്രൂരമായി മർദിച്ചത്. തലക്കും കണ്ണിനും സാരമായ പരിക്കേറ്റ പാസ്​റ്റർ ചികിത്സയിലാണ്. സ്ഥലത്തെ സാമൂഹികവിരുദ്ധ പ്രവര്‍ത്തനങ്ങള്‍ ചോദ്യംചെയ്തതിനാണ് സംഘം ഇത്തരത്തിൽ വയോധികനെ ആക്രമിച്ചത്.

സംഭവത്തിനുശേഷം ഒളിവിൽ പോയ പ്രതികളെ പിടികൂടാൻ ഡി.സി.പി ഡോ. ദിവ്യ വി. ഗോപിനാഥി​െൻറ നിർദേശപ്രകാരം പ്രത്യേക ടീം രൂപവത്​കരിച്ച് നടത്തിയ അന്വേഷണത്തിലാണ് ഒന്നും രണ്ടും പ്രതികളായ ഇവരെ ശനിയാഴ്​ച പിടികൂടിയത്. വിഴിഞ്ഞം എസ്.എച്ച്.ഒ പ്രവീൺ, എസ്.ഐ സജി, സി.പി.ഒമാരായ കൃഷ്ണകുമാർ, അജികുമാർ എന്നിവരടങ്ങിയ പൊലീസ് സംഘമാണ് അന്വേഷണത്തിനും അറസ്​റ്റിനും നേതൃത്വം നൽകിയത്.

കോടതിയിൽ ഹാജരാക്കിയ പ്രതികളെ റിമാന്‍ഡ്‌ ചെയ്തു. ഈ കേസിലെ മറ്റു പ്രതികളെ പിടികൂടാനുള്ള അന്വേഷണം ഊർജിതമാക്കിയതായും കമീഷണർ അറിയിച്ചു.