പിണറായി കിം ജോങ് ഉൻ ആകാൻ ശ്രമിച്ചാൽ കേരളത്തിൽ നടക്കില്ല -കെ. സുരേന്ദ്രൻ

കൽപറ്റ: പിണറായി വിജയൻ കിം ജോങ് ഉൻ ആകാൻ ശ്രമിച്ചാൽ കേരളത്തിൽ നടക്കില്ലെന്നു ബി.ജെ.പി സംസ്ഥാന അധ്യക്ഷൻ കെ. സുരേന്ദ്രൻ. കൽപറ്റയിൽ മാധ്യമപ്രവർത്തകരോട്​ സംസാരിക്കുകയായിരുന്നു അദ്ദേഹം. ആളുകളെ ഭീഷണിപ്പെടുത്തി വായ് അടപ്പിക്കാമെന്നത് പിണറായിയുടെ വ്യാമോഹമാണെന്നും അദ്ദേഹം ആരോപിച്ചു. കെ.ടി. ജലീലിന്‍റെ പരാതിയുടെ അടിസ്ഥാനത്തിൽ പി.സി. ജോർജിനും സ്വപ്‌ന സുരേഷിനുമെതിരെ കേസെടുത്ത പൊലീസ് നടപടി അങ്ങേയറ്റം നിന്ദ്യമാണ്. മുഖ്യമന്ത്രിക്കെതിരായ പരാതി കോടതിയിൽ രഹസ്യമൊഴിയായി കൊടുത്തതിന്‍റെ പേരിൽ കള്ളക്കേസ് എടുക്കുന്നത് ജനാധിപത്യത്തിൽ കേട്ടുകേൾവിയില്ലാത്തതാണ്. ഇതിനെതിരെ ബി.ജെ.പി ശക്തമായ നിലപാട് സ്വീകരിക്കുമെന്നും സുരേന്ദ്രൻ പറഞ്ഞു.