ടൂറിസം മന്ത്രിയും വയനാട്​ കലക്​ടറും അറിയാൻ...ഇവിടെ കുറേ മനുഷ്യർ ജീവിക്കുന്നുണ്ട്​

കൽപറ്റ: നിലവിൽ ഇന്ത്യാ മഹാരാജ്യത്ത്​ കോവിഡ്​ വ്യാപനം ഏറ്റവും കൂടുതലുള്ള ജില്ലകളിലൊന്നാണ്​ വയനാട്​. രാജ്യത്തും സംസ്​ഥാനത്തും കോവിഡ്​ അതിദ്രുതം വ്യാപിക്കുന്ന ജില്ല. എന്നാൽ, അധികൃതർക്ക്​ അങ്ങനെയൊരു ആധി​േയയില്ല. ഇവിടെ കോവിഡ്​ വ്യാപനം ഭീതിദമാംവിധം കുതിച്ചുയരു​േമ്പാഴും അവർക്ക്​ പരി​ഭ്രാന്തിയോ ആശങ്കയോ തരിമ്പുമില്ല. ഈ മണ്ണിൽ ജീവിക്കുന്ന പരശ്ശതം പാവങ്ങളെക്കുറിച്ചോ രോഗം ഈ നാടിനെ അ​ത്രമേൽ കടന്നാക്രമിക്കുന്നതിനെക്കുറിച്ചോ ചിന്തിച്ച്​ സമയം കളയാൻ അവർക്ക്​ നേരമില്ല. പകരം ഈ നാടി​െൻറ മുഴുവൻ വാതിലുകളും മലർക്കെ തുറന്നിട്ട്​ രോഗാതുര കാലത്ത്​ സഞ്ചാരികളെ മാടിവിളിക്കുന്ന തിരക്കിലാണവർ. നിയന്ത്രണങ്ങൾ അതീവ കർശനമാക്കേണ്ട സമയത്ത്​ ടൂറിസം വകുപ്പും ജില്ല ഭരണകൂടവും, അവശേഷിക്കുന്ന സഞ്ചാരകേന്ദ്രങ്ങൾ കൂടി സന്ദർശകർക്കായി തുറന്നിട്ട്​ പണം വാരാനുള്ള തന്ത്രങ്ങളിലാണ്​.

കേരളത്തിലെ ഏഴു ജില്ലകളിൽ കോവിഡ് വ്യാപനം കൂടുതലെന്ന് കേന്ദ്ര ആരോഗ്യ മന്ത്രാലയം ജൂലൈ അവസാന വാരം കർശന മുന്നറിയിപ്പ്​ നൽകിയിരുന്നു. കോട്ടയം, എറണാകുളം, ആലപ്പുഴ, പത്തനംതിട്ട, തൃശൂർ, മലപ്പുറം, വയനാട് എന്നിവയായിരുന്നു ആ ജില്ലകൾ.

അന്ന്​ ടെസ്​റ്റ്​ പൊസിറ്റിവിറ്റി റേറ്റ്​ പത്തിനു മുകളിലു​ണ്ടായിരുന്ന ജില്ലകളാണിവ. ഈ ജില്ലകളിൽ കർശന നിയന്ത്രണം ഏർപ്പെടുത്തണമെന്ന്​ കേന്ദ്ര ആരോഗ്യ മന്ത്രാലയം ജോയിന്‍റ് സെക്രട്ടറി ലാവ് അഗർവാൾ കേരളത്തെ അറിയിച്ചിട്ടും വയനാട്ടിൽ ഒരുവിധ നിയന്ത്രണങ്ങളും ഏർപ്പെടുത്താൻ അധികൃതർ തയാറായില്ല. ഇപ്പോൾ സംസ്​ഥാനത്തു മാത്രമല്ല, രാജ്യത്തുതന്നെ ഏറ്റവും ഉയർന്ന ടെസ്​റ്റ്​ പോസിറ്റിവിറ്റിയുള്ള ജില്ലകളിൽ ഒന്നാണ്​ വയനാട്​. കഴിഞ്ഞ ഒരാഴ്​ചക്കിടെ അഞ്ചു ദിവസങ്ങളിൽ 20ന്​ മുകളിലാണ്​ ടി.പി.ആർ. ആഗസ്​റ്റ്​ 19 ന്​ 20.35, 21ന്​​ 22.29, 23ന്​​ 24.15, 24ന്​ 24.1, 25ന്​ 22.9 എന്നിങ്ങനെയാണ്​ വയനാട്ടിലെ ടി.പി.ആർ നിരക്ക്​.

ഇത്രമാത്രം ഗുരുതരമായി രോഗം പടർന്നുപിടിക്കുന്നതിനിടയിലും അടഞ്ഞുകിടക്കുന്ന വിനോദ സഞ്ചാര കേന്ദ്രങ്ങൾ തുറന്നുനൽകാനായിരുന്നു അധികൃതർക്ക്​ തിടുക്കം. രോഗം പടരുന്നതിനിടയിലാണ്​ ഇന്നലെ മുതൽ സൂചിപ്പാറയിലേക്ക്​ പ്രവേശനം അനുവദിച്ചത്​. ചെ​മ്പ്ര പീക്ക്​ ഉൾപ്പെടെ ജില്ലയിലെ മിക്ക ടൂറിസ്​റ്റ്​ കേന്ദ്രങ്ങളും തുറന്നുകഴിഞ്ഞു. ജില്ലയിലെ രോഗവ്യാപനം കോവിഡ്​ കാലത്തെ ഏറ്റവുമയർന്ന ഘട്ടത്തിലെത്തിയ കഴിഞ്ഞ അഞ്ചു ദിവസങ്ങളിൽ പതിനായിരക്കണക്കിന്​ സന്ദർശകരാണ്​ ചുരം കയറിയെത്തിയത്​. അരലക്ഷത്തോളം പേർ ജില്ലയിലെ ടൂറിസ്​റ്റ്​ കേ​ന്ദ്രങ്ങളിൽ ടിക്കറ്റെടുത്ത്​ സന്ദർശനത്തിനെത്തി. ഇതിനിടെ, ടി.പി.ആർ ഉയർന്നു നിൽക്കുന്ന വയനാടിനെ കണ്ടില്ലെന്ന്​ നടിച്ച്​ രോഗികളുടെ എണ്ണത്തിൽ കൂടുതലുള്ള അഞ്ചു ജില്ലകളിൽ നിയന്ത്രണം ഏർപ്പെടുത്താനുള്ള തീരുമാനമാണ്​ കഴിഞ്ഞ ദിവസം സർക്കാറി​െൻറ ഭാഗത്തുനിന്നുണ്ടായത്​.

സംസ്​ഥാന ടൂറിസം വകുപ്പി​െൻറ താൽപര്യം മുൻനിർത്തിയാണ് ജില്ലയിൽ​ നിയന്ത്രണങ്ങൾ കാറ്റിൽ പറത്തിയുള്ള​ നീക്കങ്ങൾ. കേന്ദ്ര മുന്നറിയിപ്പി​െൻറ കൂടി പശ്ചാത്തലത്തിൽ മുമ്പ്​ വാരാന്ത്യ ലോക്​ഡൗൺ ദിനങ്ങളിൽ ജില്ലയിലേക്കുള്ള പ്രവേശന കവാടത്തിൽ പൊലീസും ജില്ല അധികൃതരും നിയന്ത്രണം കർക്കശമാക്കിയപ്പോൾ അതിനെ ദുർബലപ്പെടു​ത്തി മന്ത്രിതല ഇടപെടലുണ്ടായി.

എന്നാൽ, ടൂറിസം മ​​ന്ത്രിയുടെ സ്വന്തം മണ്ഡലത്തിലും ജില്ലയിലുമുള്ള ബീച്ചുക​െളാക്കെ കോവിഡിനെ മുൻനിർത്തി അടഞ്ഞുകിടക്കുകയാണെന്നതാണ്​ വിരോധാഭാസം. കോഴിക്കോട്​ ജില്ലയിലെ ടെസ്​റ്റ്​ പോസിറ്റിവിറ്റി നിരക്ക്​ വയനാട്ടിലേതിനേക്കാൾ ഏറെ കുറവായിട്ടും വിശാലമായ ബീച്ചുകളടക്കം അടച്ചിട്ട്​ കാണിക്കുന്ന ജാഗ്രത, ആദിവാസികളും തോട്ടംതൊഴ​ിലാളികളും ചെറുകിട കർഷകരുമടക്കം പാവപ്പെട്ട ജനങ്ങൾ തിങ്ങിപ്പാർക്കുന്ന വയനാടി​െൻറ കാര്യത്തിൽ ഒട്ടുമില്ലെന്നത് കടുത്ത​ വിമർശന​ത്തിന്​ ഇടയാക്കുകയാണ്​.

പുര കത്തു​േമ്പാൾ തിരക്കിട്ട്​ വാഴ വെട്ടുന്ന ഈ പ്രവണതക്കെതിരെ ജില്ലയിൽ കടുത്ത അമർഷം ഉയർന്നുകഴിഞ്ഞു. നേരത്തേ, കോവിഡ്​ മഹാമാരിയുടെ തുടക്കത്തിൽ ഫലപ്രദമായ നിയന്ത്രണങ്ങളിലൂടെ ജില്ലയിൽ രോഗം വ്യാപിക്കുന്നത്​ ചെറുക്കാൻ മുന്നണിയിൽനിന്ന കലക്​ടറെ പോലും നോക്കുകുത്തിയാക്കിയാണ്​ ഇതരജില്ലകളിൽനിന്നുള്ള ചില ലോബികൾക്കുവേണ്ടി വയനാട്ടിൽ നിയന്ത്രണങ്ങളൊന്നുമേർപ്പെടുത്താതെ ഉന്നത അധികൃതർ ഇറങ്ങിക്കളിക്കുന്നത്​. നിലവിൽ അനുവർത്തിച്ചുവരുന്ന ടൂറിസം മാതൃക കൊണ്ട്​ വയനാടിന് ഗ​ുണത്തേക്കാളേറെ ​ദോഷമാണുള്ളതെന്ന്​ പൊതുജനം അഭിപ്രായപ്പെടുന്നതിനിടയിലാണ്​ വയനാടൻ ജനതയുടെ ജീവനുനേരെ മഹാമാരി ഭീഷണി ഉയർത്തു​േമ്പാഴും പണത്തിൽമാത്രം കണ്ണുനട്ടുന്ന അധികൃതരുടെ 'ഉല്ലാസ താൽപര്യങ്ങൾ'.