തരുവണ പള്ളിയുടെ വഖഫ് ഭൂമി നഷ​​്​ടപ്പെട്ടതായി പരാതി

വെള്ളമുണ്ട: തരുവണ പള്ളിയുടെ വഖഫ് ഭൂമി നഷ്​ടപ്പെട്ടതായി പരാതി. തരുവണ വലിയ ജുമാ മസ്ജിദിനു കീഴില്‍ ടൗണിനോടു ചേര്‍ന്ന വഖഫ് ഭൂമിയാണ് അന്യാധീനപ്പെട്ടതായി പരാതി ഉയർന്നത്. നിര്‍മാണ ആവശ്യങ്ങള്‍ക്കായി ജുമാ മസ്ജിദിെൻറ സ്ഥലം അളന്ന് തിട്ടപ്പെടുത്തിയപ്പോഴാണ് ഭൂമി നഷ്​ടപ്പെട്ട വിവരം പുറത്തുവന്നത്. തരുവണ ഗവ. യു.പി സ്‌കൂളി​െൻറ സ്ഥലം അളന്നപ്പോൾ ഭൂമിയുടെ അതിരുകളിൽ മാറ്റമുള്ളതായി കണ്ടെത്തിയിട്ടുണ്ട്.

പള്ളിയുടെ സ്ഥലം സ്കൂളി​െൻറ സ്ഥലത്ത് ഉൾപ്പെട്ടതായി സൂചനയുണ്ട്. മാനന്തവാടി താലൂക്ക് സര്‍വേയറുടെ നേതൃത്വത്തില്‍ ഒരു തവണകൂടി നടക്കുന്ന പരിശോധനയിലേ വഖഫ് കൈയേറ്റത്തി​െൻറ വിശദ വിവരങ്ങള്‍ പുറത്തു വരൂ. മുതവല്ലിയായിരുന്ന കോരന്‍ കുന്നന്‍ മൊയ്​തു ഹാജി വഖഫ് ചെയ്ത സ്ഥലമാണ് തരുവണ ജുമാ മസ്ജിദിനു ടൗണിനോടു ചേര്‍ന്ന് ഉള്ളത്. മൂന്നേക്കർ 75 സെൻറ് സ്ഥലമാണുള്ളത്. തരുവണ ഗവ. യു.പി സ്‌കൂളിനായി കോരന്‍ കുന്നന്‍ കുഞ്ഞബ്​ദുല്ല ഹാജി 30 സെൻറ്​ സ്ഥലവും നൽകിയിരുന്നു.

ഈ രണ്ട് സ്ഥലങ്ങളും സ്കൂളിനായി പിന്നീട് വാങ്ങിയ സ്ഥലങ്ങളുടെയും അതിരുകൾ പരസ്പരം ബന്ധപ്പെട്ട് കിടക്കുന്നതിനാൽ പള്ളിയുടെ നഷ്​ടപ്പെട്ട സ്ഥലം എവിടെ എന്നറിയണമെങ്കിൽ സർവേയറുടെ റിപ്പോർട്ട് വരണം.

എന്നാല്‍, കഴിഞ്ഞ ദിവസം മഹല്ല് കമ്മിറ്റിയുടെ നേതൃത്വത്തില്‍ നടത്തിയ പരിശോധനയില്‍ പള്ളിയുടെ 40 സെൻറ് വഖഫ് ഭൂമി നഷ്​ടപ്പെട്ടതായി കണ്ടെത്തിയിട്ടുണ്ട്. താലൂക്ക് സര്‍വേയറുടെ വിശദ പരിശോധനയിലേ ഇത് വ്യക്തമാവൂ. എന്നാൽ, പള്ളിയുടെ വഖഫ് ഭൂമി കൈയേറിയതായ വിവാദം അടിസ്ഥാന രഹിതമാണെന്ന് മഹല്ല് കമ്മിറ്റി ഭാരവാഹികൾ പറഞ്ഞു. സ്ഥലത്തി​െൻറ അതിരുകൾ തമ്മിൽ ചില മാറ്റങ്ങളുണ്ടെന്നും അവ അളന്ന് തിട്ടപ്പെടുത്തി വഖഫ് ഭൂമി നഷ്​ടപ്പെട്ടിട്ടുണ്ടെങ്കിൽ തിരിച്ചുപിടിക്കുമെന്നും അവർ കൂട്ടിച്ചേർത്തു.