അമ്മയെ തേടി കാട്ടെരുമ കുഞ്ഞിനെ തോളിലേറ്റി വനപാലകർ

ഗൂഡല്ലൂർ: അമ്മയിൽനിന്ന് വേർപിരിഞ്ഞ കാട്ടെരുമ കുഞ്ഞിനെയും തോളിൽ ചുമന്ന് വനപാലകർ സഞ്ചരിച്ചത് ഒരു കിലോമീറ്റർ ദൂരം. ഒടുവിൽ അമ്മയെ കണ്ടെത്തി ചേർക്കുകയും ചെയ്തു.

കുന്നൂരിന് സമീപമുള്ള സ്വകാര്യ തേയിലത്തോട്ടത്തിലാണ് പിറന്ന് മൂന്നുനാൾ മാത്രം പ്രായമുള്ള കാട്ടെരുമ കുഞ്ഞ് ഒറ്റപ്പെട്ട് നിൽക്കുന്നത് കണ്ട് പ്രദേശവാസികൾ വനപാലകർക്ക് വിവരം നൽകിയത്. വനപാലകർ എത്തി കുഞ്ഞിനെ തോളിൽ ചുമന്ന് തേയിലക്കാട്ടിലൂടെ അമ്മയെ തേടി പുറപ്പെടുകയായിരുന്നു.

ഒരു കിലോമീറ്റർ ദൂരം ചെന്നപ്പോൾ കാട്ടെരുമയെ കണ്ടെത്തുകയും കുഞ്ഞിനെ ഇറക്കി വിടുകയുമായിരുന്നു. ഇവ കാട്ടിലേക്ക് കയറുന്നത് വരെ വനപാലകർ കാവലിരിക്കുകയും ചെയ്തു.