ആയുഷ്മാൻ ഭാരത് ആരോഗ്യ ഇൻഷുറൻസി​െൻറ പേരിൽ തട്ടിപ്പ്‌

മാനന്തവാടി: സൗജന്യമായി ചികിത്സ ലഭ്യമാക്കുന്ന ആരോഗ്യ ഇൻഷുറൻസ് പദ്ധതിയായ ആയുഷ്മാൻ ഭാരതി​െൻറ രജിസ്ട്രേഷൻ തുടങ്ങിയതായി സമൂഹമാധ്യമങ്ങളിലൂടെ വ്യാജ പ്രചാരണം. കേന്ദ്ര ആരോഗ്യമന്ത്രാലയത്തി‍െൻറ ഹെൽത്ത് ഐഡി പദ്ധതിയാണ്‌ ആരോഗ്യ ഇൻഷുറൻസ് പദ്ധതിയായി തെറ്റിദ്ധരിപ്പിക്കുന്നത്‌. വ്യാജ ഓൺലൈൻ കേന്ദ്രങ്ങൾവഴി രജിസ്ട്രേഷൻ ഫീസ്​ ഇനത്തിൽ പലർക്കും പണം നഷ്​ടമായി.

അക്ഷയയിൽ പോകൂ, 50 രൂപ അടച്ചുകൊണ്ട് അഞ്ചുലക്ഷം രൂപയുടെ ആരോഗ്യ ഇൻഷുറൻസ് നേടൂ എന്ന് പ്രചരിപ്പിച്ചുകൊണ്ട് വ്യാജന്മാർ വിലസുകയാണ്. സൗജന്യ ഇൻഷുറൻസ് ലഭിക്കാൻ പരക്കം പായുന്ന പാവപ്പെട്ട ജനങ്ങളെ കബളിപ്പിച്ച്​ അതിൽ സന്തോഷം കണ്ടെത്തുന്ന ചില സാമൂഹിക വിരുദ്ധരും വ്യാജ ഓൺലൈൻ കേന്ദ്രങ്ങളുമാണ് ഇത്തരം വ്യാജ പ്രചാരണങ്ങൾക്ക് പിന്നിൽ.

വാട്​സ്​ആപ്പിലും ഫേസ്ബുക്കിലും കുറച്ചുദിവസമായി ആയുഷ്മാൻ ഭാരത് പദ്ധതിക്ക് അപേക്ഷകൾ ക്ഷണിച്ചിരിക്കുന്നു എന്നൊരു സന്ദേശം വ്യാപകമായി പ്രചരിക്കുന്നുണ്ട്.

ഇതാണ് ആ വ്യാജസന്ദേശത്തി​െൻറ ഉള്ളടക്കം. ആരോഗ്യനയം 2017‍െൻറ ഭാഗമായി നടപ്പാക്കപ്പെട്ട കേന്ദ്രസര്‍ക്കാറി‍െൻറ പതാകവാഹക പദ്ധതികളിലൊന്നാണ് ആയുഷ്മാന്‍ ഭാരത്. രാജ്യത്തെ താഴ്ന്ന വരുമാനക്കാർക്ക് ആരോഗ്യ ഇൻഷുറൻസ് പരിരക്ഷ സൗജന്യമായി ലഭ്യമാക്കാൻ ലക്ഷ്യമിട്ടാണ് പദ്ധതി നടപ്പിലാക്കിയിരിക്കുന്നത്.

കേരളത്തിൽ സ്​​േറ്ററ്റ് ഹെൽത്ത് ഏജൻസിയാണ് കാരുണ്യ ആരോഗ്യ സുരക്ഷാപദ്ധതിയും പ്രധാനമന്ത്രി ആയുഷ്മാൻ ഭാരത് പദ്ധതിയും നടപ്പാക്കുന്നത്. 2018-19 വർഷത്തിൽ രാഷ്​ട്രീയ സ്വാസ്ഥ്യ ഭീമയോജന ആരോഗ്യ ഇൻഷുറൻസ് കാർഡ് പുതുക്കിയിട്ടുള്ളവർ, ആരോഗ്യ ഇൻഷുറൻസ് ഉപഭോക്താവാണെന്ന് കാണിച്ചുകൊണ്ടുള്ള പ്രധാനമന്ത്രി കാര്യാലയത്തിൽനിന്നുള്ള കത്ത് കിട്ടിയവർ അല്ലെങ്കിൽ, 2011 കാസ്​റ്റ്​ സെൻസസ് പ്രകാരം അർഹരായവർ എന്നിവരാണ് കാരുണ്യ ആരോഗ്യസുരക്ഷാ (ആയുഷ്മാൻ ഭാരത്) പദ്ധതിയുടെ നിലവിലെ ഉപഭോക്താക്കൾ. നിലവിൽ ഇവർക്കല്ലാതെ മറ്റാർക്കും പദ്ധതിയുടെ ആനുകൂല്യം ലഭിക്കുകയില്ല. ഇപ്പോൾ പുതിയ അപേക്ഷകൾ സ്വീകരിക്കുന്നില്ല എന്നാണ് സ്​റ്റേറ്റ് ഹെൽത്ത് ഏജൻസി അധികൃതരുടെ അറിയിപ്പ്.