വയനാട് ആരോഗ്യ മേഖലയിലെ സുപ്രധാന തസ്​തികകളിൽ ആളില്ല

കൽപറ്റ: കോവിഡ് കാലത്തും ജില്ലയിലെ ആരോഗ്യമേഖലയിൽ സുപ്രധാന തസ്​തികകൾ ഒഴിഞ്ഞുകിടക്കുന്നത് പ്രതിരോധ പ്രവർത്തനങ്ങളെ ബാധിക്കുന്നതായി ആക്ഷേപം.

ആരോഗ്യ വകുപ്പിന് ഭരണപരമായ നേതൃത്വം കൊടുക്കേണ്ട അഡ്​മിനിസ്​േട്രറ്റിവ് കേഡറിലെ തസ്​തികകൾ ഭൂരിഭാഗവും ഒഴിഞ്ഞുകിടക്കുകയാണെന്ന് ഡോക്​ടർമാരുടെ സംഘടനയായ കെ.ജി.എം.ഒ.എ ചൂണ്ടിക്കാട്ടി. ഈ തസ്​തികകളിൽ നിയമനങ്ങൾ നടക്കാത്തതിനാൽ സ്​പെഷാലിറ്റി വിഭാഗം ഡോക്​ടർമാർക്കാണ് താൽക്കാലിക ചുമതല. ജില്ല മെഡിക്കൽ ഓഫിസിൽ പ്രധാനപ്പെട്ട രണ്ട് തസ്​തികകളിൽ സ്​ഥിരം നിയമനം നടന്നിട്ടില്ല. പകർച്ചവ്യാധി വ്യാപന കാലഘട്ടത്തിൽ സുപ്രധാന പങ്കു വഹിക്കേണ്ട ജില്ല സർവൈലൻസ്​ ഓഫിസറുടെ ചുമതലയുള്ള ഡെപ്യൂട്ടി ഡി.എം.ഒ തസ്​തികയും ഒഴിഞ്ഞുകിടക്കുകയാണ്.

പകരം ചുമതല നൽകിയിരിക്കുന്നത് അസിസ്​റ്റൻറ് സർജൻ തസ്​തികയിലുള്ള ഒരു മെഡിക്കൽ ഓഫിസർക്കാണ്. പകർച്ചവ്യാധികളുടെയും മഴക്കാല രോഗങ്ങളുടെയും പശ്ചാത്തലത്തിൽ നിർണായകമായ ഈ തസ്​തികയിൽ സ്​ഥിരം നിയമനം നടക്കാത്തത് പ്രതിഷേധാർഹമാണെന്ന് കെ.ജി.എം.ഒ.എ ഭാരവാഹികൾ പറയുന്നു.

ആർ.സി.എച്ച് ഓഫിസറുടെ തസ്​തികയിലും സ്​ഥിരം നിയമനമായിട്ടില്ല. കൂടാതെ, ജില്ലയിലെ ആരോഗ്യപരിപാലനത്തിൽ സുപ്രധാന പങ്ക് വഹിക്കുന്ന വൈത്തിരി, ബത്തേരി താലൂക്ക് ആശുപത്രികളിലെ സൂപ്രണ്ട് തസ്​തികകളിലും ആളില്ല.

ഇവിടെ സ്പെഷാലിറ്റി ഡോക്​ടർമാർക്കാണ് സൂപ്രണ്ടി െൻറ ചുമതല. ഇത് സ്​പെഷാലിറ്റി സേവനങ്ങളെ ബാധിക്കുന്നുണ്ട്.

കൽപറ്റ ജനറൽ ആശുപത്രിയിലെ ഡെപ്യൂട്ടി സൂപ്രണ്ട് തസ്​തികയും മാനന്തവാടി ജില്ല ആശുപത്രിയിലെ ആർ.എം.ഒ തസ്​തികയും ഒഴിഞ്ഞു കിടക്കുന്നു.

ജില്ലയിലെ ഏക കോവിഡ് ആശുപത്രിയായ മാനന്തവാടി ജില്ല ആശുപത്രിയിൽ ജനറൽ സർജനും കാഷ്വാലിറ്റി മെഡിക്കൽ ഓഫിസറുമായ ഡോ. സക്കീറിനാണ് ആർ.എം.ഒയുടെ താൽക്കാലിക ചുമതല. സുപ്രധാന ആശുപത്രികളിലെല്ലാം സ്​പെഷലിസ്​റ്റുകളുടെ തസ്​തികകളും ഒഴിഞ്ഞുകിടക്കുന്നു. മാനന്തവാടി ജില്ല ആശുപത്രിയിൽ കൺസൽട്ടൻറ് ഫിസിഷ്യൻ, പീഡിയാട്രീഷ്യൻ, ഇ.എൻ.ടി സർജൻ എന്നീ തസ്​തികകളിൽ ആളില്ല. വൈത്തിരി താലൂക്ക് ആശുപത്രിയിൽ കൺസൽട്ടൻറ് ഫിസിഷ്യൻ, ഗൈനക്കോളജിസ്​റ്റ് തസ്​തികകളിലും ആളില്ല. കോവിഡ് രോഗികൾ വർധിച്ചാൽ, ഒരു കോവിഡ് ആശുപത്രി കൂടി ജില്ലയിൽ തുറക്കേണ്ടിവരും.

എന്നാൽ ഇതിനാവശ്യമായ മനുഷ്യവിഭവശേഷി ജില്ലക്ക് ഇല്ല എന്നതാണ് യാഥാർഥ്യം. ഈ സാഹചര്യത്തിൽ അഡ്​മിനിസ്​േട്രറ്റിവ് സ്​പെഷാലിറ്റി കേഡറുകളിലെ ഒഴിവുകൾ അടിയന്തരമായി നികത്തണമെന്നും കെ.ജി.എം.ഒ.എ ജില്ല കമ്മിറ്റി ആവശ്യപ്പെട്ടു.