സ്മാര്ട്ടായി നഗരസഭകള്
text_fieldsകൽപറ്റ: പൊതുജനങ്ങള്ക്ക് അതിവേഗം സര്ട്ടിഫിക്കറ്റുകള് ലഭ്യമാക്കി സ്മാര്ട്ടായി നഗരസഭകള്. ജില്ലയിലെ തദ്ദേശ സ്ഥാപനങ്ങളില് ഫയല് രഹിത സേവനങ്ങള് നടപ്പാക്കുന്നതിന്റെ ഭാഗമായി കെ-സ്മാർട്ട് ഡിജിറ്റലൈസ് സംവിധാനം ജില്ലയിലെ മൂന്നു നഗരസഭയിലും പൂര്ത്തിയായി. തദ്ദേശ സ്ഥാപനങ്ങള് മുഖേന നല്കുന്ന സേവനങ്ങളെ 35 മൊഡ്യൂളുകളായി തിരിച്ച് ഒറ്റ പ്ലാറ്റ്ഫോമിലൂടെ ഓണ്ലൈനായി ലഭ്യമാക്കുന്നതാണ് കെ-സ്മാർട്ട് പദ്ധതി.
പ്രവാസികള് ഉള്പ്പടെ 24 പേരുടെ വിവാഹ രജിസ്ട്രേഷനാണ് ഓണ്ലൈന് സംവിധാനത്തിലൂടെ നടന്നത്. മാനന്തവാടി-ഒമ്പത്, കല്പറ്റ- ഏഴ്, സുല്ത്താന് ബത്തേരി-എട്ട് എന്നിങ്ങനെ വിവാഹ രജിസ്ട്രേഷനുകളാണ് ചെയ്തത്. വിദേശത്തുനിന്ന് ലോഗിന് ഐഡി ഉപയോഗിച്ച് കെ.വൈ.സി വെരിഫിക്കേഷനിലൂടെ വിവാഹ രജിസ്ട്രേഷന് ഉൾപ്പെടെ കാര്യങ്ങള് ചെയ്യാന് സാധിക്കും.
ഏപ്രില് ഒന്നോടെ പഞ്ചായത്തുതലത്തിലേക്കും
ഏപ്രില് ഒന്നോടെ കെ-സ്മാര്ട്ട് സംവിധാനം ഗ്രാമപഞ്ചായത്ത് തലത്തിലേക്കും വ്യാപിപ്പിക്കും. ഇന്ഫര്മേഷന് കേരള മിഷനാണ് കെ-സ്മാര്ട്ട് വികസിപ്പിച്ചത്. കെ-സ്മാര്ട്ട് ആപ്ലിക്കേഷനിലൂടെ സേവനങ്ങള്ക്കുള്ള അപേക്ഷകളും പരാതികളും ഓണ്ലൈനായി നല്കാനും അപേക്ഷ സംബന്ധിച്ച വിവരങ്ങള് ഓണ്ലൈനായി അറിയാനും സാധിക്കും. അപേക്ഷയുടെ കൈപ്പറ്റ് രസീത് പരാതിക്കാരന്റെ/അപേക്ഷകന്റെ ലോഗിനിലും വാട്സ്ആപ്, ഇ-മെയില് എന്നിവയില് ലഭ്യമാകുന്ന ഇന്റഗ്രേറ്റഡ് മെസേജിങ് സംവിധാനം ഒരുക്കിയിട്ടുണ്ട്.
ജി.ഐ.എസ് സാങ്കേതികവിദ്യ ഉപയോഗിച്ച് പ്ലോട്ടുകളുടെയും കെട്ടിടങ്ങളുടെയും വിവരങ്ങള് ഡിജിറ്റല് രൂപത്തില് തയാറാക്കുന്നതിലൂടെ വേഗത്തില് കെട്ടിട നിർമാണ പെര്മിറ്റുകള് ജനങ്ങള്ക്ക് ലഭ്യമാക്കുന്നു. കെ-സ്മാര്ട്ടിലെ നോ യുവര് ലാന്ഡ് എന്ന ഫീച്ചറിലൂടെ ഒരു സ്ഥലത്ത് ഏതെല്ലാം തരത്തിലുള്ള കെട്ടിടങ്ങളാണ് നിർമിക്കാന് കഴിയുകയെന്ന വിവരവും പൊതുജനങ്ങള്ക്ക് അറിയാം.
ആദ്യഘട്ടം എട്ടു സേവനങ്ങൾ
ജനന-മരണ-വിവാഹ രജിസ്ട്രേഷന്, ബിസിനസ് ഫെസിലിറ്റേഷന്, വസ്തു നികുതി, യൂസര് മാനേജ്മെന്റ്, ഫയല് മാനേജ്മെന്റ് സിസ്റ്റം, ഫിനാന്സ് മൊഡ്യൂള്, ബില്ഡിങ് പെര്മിഷന് മൊഡ്യൂള്, പൊതുജന പരാതി പരിഹാരം എന്നീ സേവനങ്ങളാണ് കെ-സ്മാര്ട്ടിലൂടെ ലഭ്യമാവുക.
ലക്ഷ്യം
തദ്ദേശ സ്ഥാപനങ്ങളില്നിന്നുള്ള സേവനങ്ങള് ഓഫിസുകളിലെത്താതെ സമയബന്ധിതമായി പൊതുജനങ്ങള്ക്ക് ലഭ്യമാക്കുകയാണ് പദ്ധതിയുടെ ലക്ഷ്യം. പ്രവാസികള്ക്ക് നേരിട്ടെത്താതെ അതത് തദ്ദേശ സ്ഥാപനങ്ങളില് നിന്നുള്ള സേവനങ്ങള് ലഭ്യമാവും.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.