ഒമ്പതു വിദ്യാലയങ്ങള്‍ ഹൈടെക്കാകും
text_fields
കൽപറ്റ: പുതിയ അധ്യയന വര്‍ഷത്തില്‍ ജില്ലയിലെ ഒമ്പതു വിദ്യാലയങ്ങള്‍ കൂടി ഹൈടെക്കാകും. സംസ്ഥാന സര്‍ക്കാറിന്റെ നൂറുദിന കർമ പരിപാടിയുടെ ഭാഗമായി നിർമാണം പൂര്‍ത്തീകരിച്ച കെട്ടിടങ്ങളുടെ ഉദ്ഘാടനം 23ന് രാവിലെ പത്തിന് മുഖ്യമന്ത്രി പിണറായി വിജയന്‍ ഓണ്‍ലൈനായി നിര്‍വഹിക്കും. ജി.എച്ച്.എസ് പേര്യ, ജി.എച്ച്.എസ് തൃശ്ശിലേരി, ജി.എച്ച്.എസ് വാരാമ്പറ്റ, ജി.വി.എച്ച്.എസ്.എസ് വാകേരി, ജി.എച്ച്.എസ് പെരിക്കല്ലൂര്‍, ജി.യു.പി.എസ് കണിയാമ്പറ്റ, ജി.വി.എച്ച്.എസ്.എസ് വെള്ളാര്‍മല, ജി.എല്‍.പി.എസ് പൂമല, ജി.യു.പി.എസ് കാരച്ചാല്‍ എന്നിവിടങ്ങളിലാണ് പൊതുവിദ്യാഭ്യാസ സംരക്ഷണത്തിന്റെ ഭാഗമായി പുതിയ കെട്ടിടങ്ങള്‍ ഉയര്‍ന്നത്. ആധുനിക നിലവാരത്തിലാണ് കെട്ടിടങ്ങളെല്ലാം നിര്‍മിച്ചത്. അനുബന്ധ സൗകര്യങ്ങളും ഒരുക്കിയിട്ടുണ്ട്. ഒരുകോടി രൂപ ചെലവില്‍ നിർമിച്ച ആറാട്ടുതറ ജി.എച്ച്.എസ്. സ്‌കൂള്‍ ചുറ്റുമതിലിന്റെ ഉദ്ഘാടനവും ചടങ്ങില്‍ നടക്കും.
മാനന്തവാടി നിയോജക മണ്ഡലത്തിലെ ജി.എച്ച്.എസ് വാരാമ്പറ്റയില്‍ പുതിയ കെട്ടിടം നിർമിക്കുന്നതിനായി മൂന്നുകോടി രൂപയാണ് ചെലവിട്ടത്. കിഫ്ബിയില്‍ നിന്ന് ഒരുകോടി രൂപയും നബാര്‍ഡില്‍ നിന്ന് രണ്ടുകോടി രൂപയും വിനയോഗിച്ചു. പേര്യ ജി.എച്ച്.എസ്, തൃശ്ശിലേരി ജി.എച്ച്.എസ് എന്നിവിടങ്ങളില്‍ കിഫ്ബിയില്‍ നിന്ന് ഒരുകോടി രൂപ വീതമാണ് ചെലവിട്ടത്. കല്‍പ്പറ്റ നിയോജക മണ്ഡലത്തില്‍ കണിയാമ്പറ്റ ജി.യു.പി.എസ്, വെള്ളാര്‍മല ജി.വി.എച്ച്.എസ്.എസ് എന്നിവിടങ്ങളില്‍ കെട്ടിടം നിര്‍മിക്കാന്‍ കിഫ്ബി ഒരുകോടി രൂപ വീതം ചെലവിട്ടു. സുല്‍ത്താന്‍ ബത്തേരി മണ്ഡലത്തിലെ വാകേരി ജി.വി.എച്ച്.എസ്.എസ്, പെരിക്കല്ലൂര്‍ ജി.എച്ച്.എസ്.എസ് സ്‌കൂള്‍ കെട്ടിടങ്ങള്‍ കിഫ്ബിയുടെ ഒരു കോടി രൂപ ചെലവിലാണ് നിര്‍മിച്ചിരിക്കുന്നത്. കാരച്ചാല്‍ ജി.യു.പി.സ്‌കൂള്‍ കെട്ടിടത്തിന് 1.10 കോടിയും പൂമല ജി.എല്‍.പി.സ്‌കൂള്‍ കെട്ടിടത്തിന് ഒരു കോടിയും പ്ലാന്‍ ഫണ്ടില്‍ നിന്നും ചെലവിട്ടു.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.