ആറു മണിക്കൂർ വനത്തിൽ ഒറ്റപ്പെട്ട്​ യുവാവ്​; ഒടുവിൽ രക്ഷകയായി വയനാട്​ കലക്ടർ അദീല അബ്​ദുല്ല

മാനന്തവാടി: കോവിഡ് ഭീതിയുടെ സാഹചര്യത്തിൽ യാത്രാ നിയന്ത്രണത്തിൽപെട്ട് വനമേഖലയിൽ കുടുങ്ങിയ യുവാവിന് ഒടുവിൽ ജില്ല കലക്ടർ ഡോ. അദീല അബ്​ദുല്ല തുണയായി. ബംഗളൂരുവിൽ സോഫ്റ്റ്​വെയർ എൻജിനീയറായ പേരാമ്പ്ര ഇന്ദ്രിയ വീട്ടിൽ ഇന്ദ്രജിത്​ ആണ് ഭക്ഷണവും വെള്ളവും കിട്ടാതെ കുടുങ്ങിയത്. കോവിഡ് ജാഗ്രത സൈറ്റിൽ രജിസ്​റ്റർ ചെയ്ത ഇന്ദ്രജിത്ത് മുത്തങ്ങ റോഡിൽ വെള്ളം കയറി ഗതാഗത തടസ്സമുണ്ടെന്ന്​ അറിഞ്ഞതോടെ ഞായറാഴ്ച വൈകുന്നേരം അഞ്ചോടെ തോൽപെട്ടി എക്സൈസ് ചെക്ക് പോസ്​റ്റിലെത്തി.

അവിടെ ഉണ്ടായിരുന്ന പൊലീസ് ഉദ്യോഗസ്ഥൻ കടത്തിവിടാൻ തയാറായില്ല. തുടർന്ന്​ മാനന്തവാടി തഹസിൽദാറുമായി ബന്ധപ്പെട്ടു. തഹസിൽദാർ തിരുനെല്ലി പൊലീസ്​ സി.ഐയുമായി ബന്ധപ്പെട്ടു. മെഡിക്കൽ പരിശോധന ഇല്ലാതെ കടത്തിവിടാനാകില്ലെന്ന്​ ജില്ല പൊലീസ് മേധാവിയുടെ നിർദേശം ഉണ്ടെന്നായിരുന്നു മറുപടി. മെഡിക്കൽ ടീം വന്നതിനുശേഷം കടത്തിവിടാമെന്ന് പൊലീസ് അറിയിച്ചു.

ഏഴു മണിയോടെ വയനാട് ജില്ല കലക്ടറെ ഫോണിൽ വിവരങ്ങൾ ധരിപ്പിച്ചതി​െൻറ അടിസ്ഥാനത്തിൽ കടത്തിവിടാൻ നിർദേശം നൽകിയെങ്കിലും പൊലീസ് കടുംപിടിത്തം തുടർന്നതായി ഇന്ദ്രജിത്ത് പറഞ്ഞു.

അതിനിടെ മുഖ്യമന്ത്രിയുടെ ഓഫിസുമായി ബന്ധപ്പെട്ടു. അവിടെനിന്ന്​ കലക്ടറുമായി ബന്ധപ്പെടാൻ നിർദേശം കിട്ടി. രാത്രി 11.30ഓടെ ജില്ല കലക്ടറുടെ നേതൃത്വത്തിൽ എത്തിയ റവന്യൂസംഘം ഇന്ദ്രജിത്തിനെ ചെക്ക്പോസ്​റ്റ്​ കടത്തി കൽപറ്റയിൽ എത്തിച്ചു. താമസ സൗകര്യവും ഭക്ഷണവും നൽകി. തിങ്കളാഴ്ച രാവിലെ പേരാമ്പ്രയിലെ വീട്ടിലെത്തി ക്വാറൻറീനിൽ പ്രവേശിച്ചു. വയനാട് കലക്ടർക്ക്​ നന്ദിപറയുകയാണ് ഇന്ദ്രജിത്.