പാ​ച​കം, ആ​ശാ​രി​പ്പ​ണി, കു​ട നി​ർ​മാ​ണം...ശാ​സ്ത്രോ​ത്സ​വ​ത്തെ വേ​റി​ട്ട​താ​ക്കി കു​ട്ടി​ക​ൾ

സു​ൽ​ത്താ​ൻ ബ​ത്തേ​രി: പാ​ച​കം, ആ​ശാ​രി​പ്പ​ണി, കു​ട നി​ർ​മാ​ണം, കു​ട്ട നെ​യ്ത്ത്... ശാ​സ്ത്രോ​ത്സ​വ​ത്തെ വേ​റി​ട്ട​താ​ക്കി കു​ട്ടി​ക​ൾ. മ​ത്സ​ര​ത്തേ​ക്കാ​ളു​പ​രി കു​ട്ടി​ക​ളു​ടെ പ്ര​വൃ​ത്തി പ​രി​ച​യ​ത്തി​ലെ ക​ര​വി​രു​ത് വ്യ​ക്ത​മാ​ക്കു​ന്ന​താ​യി​രു​ന്നു പ​ല സ്റ്റാ​ളു​ക​ളും. ത​ൽ​സ​മ​യ മ​ത്സ​ര​ങ്ങ​ളി​ൽ ഇ​രു​ത്തം വ​ന്ന ജോ​ലി​ക്കാ​രെ​പ്പോ​ലെ​യു​ള്ള കു​ട്ടി​ക​ളു​ടെ പ്ര​ക​ട​ന​ത്തി​ന് മൂ​ല​ങ്കാ​വ് സ്കൂ​ളി​ലെ ക്ലാ​സ് റൂ​മു​ക​ൾ സാ​ക്ഷി​യാ​വു​ക​യാ​യി​രു​ന്നു.

പ​ര​മ്പ​രാ​ഗ​ത​മാ​യി ചെ​യ്യു​ന്ന ആ​ശാ​രി​പ്പ​ണി​യി​ൽ പെ​ൺ​കു​ട്ടി​ക​ളു​ടെ സാ​ന്നി​ധ്യ​മാ​യി​രു​ന്നു എ​ടു​ത്തു​പ​റ​യേ​ണ്ട​ത്. ച​ന്ദ​ന​ത്തി​രി നി​ർ​മാ​ണം, ചി​ര​ട്ട കൊ​ണ്ടു​ള്ള ക​ര​കൗ​ശ​ല വ​സ്തു​ക്ക​ൾ, പാ​യ നി​ർ​മാ​ണം, കു​ട എ​ന്നി​വ​യി​ലും പെ​ൺ​കു​ട്ടി​ക​ളു​ടെ സാ​ന്നി​ധ്യം എ​ടു​ത്തു പ​റ​യ​ണം. ഹ​യ​ർ സെ​ക്ക​ൻ​ഡ​റി വി​ഭാ​ഗം ച​ന്ദ​ന​ത്തി​രി നി​ർ​മാ​ണം പെ​ൺ​കു​ട്ടി​ക​ൾ ത​മ്മി​ലു​ള്ള മ​ത്സ​ര​മാ​യി​രു​ന്നു. അ​ഞ്ചു പേ​രാ​ണ് ഈ ​വി​ഭാ​ഗ​ത്തി​ൽ മ​ത്സ​രി​ച്ച​ത്. അ​ഗ​ർ​ബ​ത്തി സ്റ്റി​ക്ക് ച​ന്ദ​ന​ത്തി​രി​യാ​യി രൂ​പാ​ന്ത​രം പ്രാ​പി​ക്കു​ന്ന​ത് പ​ല ഘ​ട്ട​ങ്ങ​ളി​ലൂ​ടെ ക​ട​ന്നാ​ണ്. ഓ​യി​ൽ, പെ​ർ​ഫ്യൂം എ​ന്നി​വ പ്ര​ത്യേ​ക അ​നു​പാ​തത്തി​ൽ കു​ഴ​ച്ച് പാ​ത്ര​ത്തി​ലാ​ക്കി സ്റ്റി​ക്കി​ലേ​ക്ക് പ​ക​രു​ക​യാ​ണ് ചെ​യ്യു​ന്ന​ത്.

മേ​ള​യി​ൽ തി​ള​ങ്ങി പെ​ൺ​കു​ട്ടി​ക​ൾ

മ​രം കൊ​ണ്ടു​ള്ള ത​ത്സമ​യ മ​ത്സ​ര​ത്തി​ൽ വ​ടു​വ​ഞ്ചാ​ൽ സ്കൂ​ളി​ലെ ജി​ത്യ​യും വാ​ളാ​ട് സ്കൂ​ളി​ലെ ശ്രീ​ന​ന്ദ​യും വേ​റി​ട്ട കാ​ഴ്ച​ക​ളാ​യി. നി​ര​വ​ധി ആ​ൺ​കു​ട്ടി​ക​ൾ​ക്കി​ട​യി​ൽ പ​രി​ച​യ​സ​മ്പ​ന്ന​നാ​യ മ​ര​പ്പ​ണി​ക്കാ​ര​നെ പോ​ലെ​യാ​യി​രു​ന്നു ഇ​വ​രു​ടെ പ്ര​ക​ട​നം. ചാ​രു​ക​സേ​ര​യാ​ണ് ശ്രീ​ന​ന്ദ നി​ർ​മിച്ച​ത്. ചി​ര​ട്ട ഉ​ൽ​പ​ന്ന​ങ്ങ​ൾ കൊ​ണ്ടു​ള്ള നി​ർ​മാ​ണ​ത്തി​ൽ എം.​ജി.​എം.​എ​ച്ച്.​എ​സ്.​എ​സി​ലെ എ​ട്ടാം ക്ലാ​സു​കാ​രി ആ​ലി​യ ഖ​ദീ​ജ​യു​ടെ പ്ര​ക​ട​നം വി​സ്മ​യക്കാ​ഴ്ച​യാ​യി. ഹ​യ​ർ സെ​ക്ക​ൻ​ഡ​റി വി​ഭാ​ഗം കു​ട നി​ർ​മാ​ണ​ത്തി​ലും കു​ട്ടി​ക​ൾ മി​ക​വ് പു​ല​ർ​ത്തി. മൂ​ന്നു മ​ണി​ക്കൂ​റാ​ണ് നി​ർ​മാ​ണ​ത്തി​ന് അ​നു​വ​ദി​ച്ച സ​മ​യം. പ​റ്റു​ന്ന​വ​ർ​ക്ക് ഒ​ന്നി​ൽ കൂ​ടു​ത​ൽ കു​ട​ക​ളും നി​ർ​മി​ക്കാം. നി​ർ​മാ​ണ​ത്തി​ലെ പൂ​ർ​ണ​ത​യാ​ണ് വി​ധി നി​ർ​ണ​യ​ത്തി​ൽ പ്ര​ധാ​നം.

ചെ​ല​വ് കു​റ​ഞ്ഞ പോ​ഷ​കാ​ഹാ​ര​ങ്ങ​ളു​ടെ വി​ഭ​വ​ങ്ങ​ൾ ഒ​രു​ക്കി​യ സ്റ്റാ​ൾ പെ​ൺ​കു​ട്ടി​ക​ൾ കു​ത്ത​ക​യാ​ക്കി​യെ​ന്ന് പ​റ​യാം. ക​പ്പ പു​ട്ട്, വാ​ഴ​പ്പി​ണ്ടി തോ​ര​ൻ, ച​ക്ക​ത്തോ​ര​ൻ, കൂ​ൺ ക​റി, പാ​വ​ക്ക അ​ച്ചാ​ർ, കാ​ച്ചി​ൽ പു​ഴു​ങ്ങി​യ​തും കാ​ന്താ​രി ച​മ്മ​ന്തി​യും, അ​മ്പ​ഴ​ങ്ങ അ​ച്ചാ​ർ എ​ന്നി​ങ്ങ​നെ​യു​ള്ള വി​ഭ​വ​ങ്ങ​ൾ മ​ത്സ​ര സ്റ്റാ​ളാ​യ പാ​ച​ക​പ്പു​ര​യി​ൽ ഒ​രു​ക്കി. പ​ഴ​വ​ർ​ഗ പ​ച്ച​ക്ക​റി സം​സ്ക​ര​ണ​ത്തി​ന്റെ ഭാ​ഗ​മാ​യ വി​ഭ​വ​ങ്ങ​ളും ഇ​വി​ടെ ഒ​രു​ക്കി.