ലോക്​ഡൗൺ: ക്ഷേത്രങ്ങളുടെ പ്രവർത്തനം സംബന്ധിച്ച മാർഗനിർദേശങ്ങൾ നടപ്പാക്കാൻ ഉത്തരവ്​

പത്തനംതിട്ട: സംസ്ഥാനത്ത് മേയ്​ 16 വരെ ലോക്ഡൗൺ പ്രഖ്യാപിച്ച സാഹചര്യത്തിൽ തിരുവിതാംകൂർ ദേവസ്വം ബോർഡി​െൻറ ശബരിമല ഒഴികെയുള്ള ക്ഷേത്രങ്ങളുടെ പ്രവർത്തനം സംബന്ധിച്ച മാർഗ നിർദേശങ്ങൾ നടപ്പാക്കാൻ ബോർഡ് യോഗം തീരുമാനിച്ച്​ ഉത്തരവിട്ടു.

ലോക്ഡൗൺ കാലയളവിൽ ക്ഷേത്രങ്ങളിൽ ഭക്തജനങ്ങൾക്ക് ദർശനം ഉണ്ടായിരിക്കില്ല. പൂജകൾ മുടങ്ങാതെ നടക്കും. പൂജാ സമയം രാവിലെ ഏഴ്​ മുതൽ 10 വരെയും വൈകുന്നേരം അഞ്ച്​ മുതൽ ഏഴ്​ വരെയുമായി ക്രമീകരിക്കും. ഈ കാര്യങ്ങൾ അതാത്​ ക്ഷേത്രങ്ങളിലെ തന്ത്രിയുമായി ആലോചിച്ച് ആവശ്യമായ സമയക്രമീകരണം നടത്തുന്നതാണ്.

ഉത്സവങ്ങളടക്കം മറ്റ് യാതൊരു ചടങ്ങുകളും ഈ കാലയളവിൽ നടക്കുന്നില്ല എന്ന്​ ഉറപ്പുവരുത്തണം. ഇതിനകം ബുക്ക് ചെയ്​ത വിവാഹ ചടങ്ങുകൾ 20 പേരിൽ കൂടാതെ കോവിഡ് മാനദണ്ഡങ്ങൾ പൂർണമായി പാലിച്ച്​ ക്ഷേത്രത്തിന് പുറത്തുവെച്ച് നടത്താം.