കനത്ത ഇടി മിന്നലായി സമദാനി

മലപ്പുറം: ഇ.ടിയുടെ ഇടി, സമദാനിയുടെ പ്രഹരം. ഇടതുപക്ഷത്തിന്‍റെ സമാധാനം കളഞ്ഞ് ഇരുവരുടേയും റെക്കോർഡ് വിജയം. ജില്ലയിൽ സി.പി.എം പ്രതീക്ഷകൾ തകർത്തെറിഞ്ഞ്​ ലീഗിന്‍റെ പടയോട്ടം. ചരിത്രത്തിലെ ഏറ്റവും ഉയർന്ന ഭൂരിപക്ഷമാണ്​ ​മലപ്പുറത്ത്​ ഇ.ടിക്കും പൊന്നാനിയിൽ സമദാനിക്കും ലഭിച്ചത്​. ഇ.ടിയെ നേരിടാൻ യുവസ്ഥാനാർഥിയെ കളത്തിലിറക്കിയിട്ടും മലപ്പുറത്ത്​ ലീഗ്​ കോട്ടയിൽ​ തൊടാൻപോലും ഇടതിനായില്ല.

വി. വസീഫ്​ പ്രചാരണത്തിൽ നേടിയ മേൽക്കൈ വോട്ടായി മാറിയില്ല. സി.എ.എ മുഖ്യ പ്രചാരണായുധമാക്കി മുഖ്യമന്ത്രിയടക്കം പ​ങ്കെടുത്ത റാലികൾ സംഘടിപ്പിച്ചിട്ടും ന്യൂനപക്ഷ വോട്ടുകളിൽ ഇളക്കം സൃഷ്ടിക്കാൻ സാധിച്ചില്ല. കഴിഞ്ഞ അസംബ്ലി തെരഞ്ഞെടുപ്പിൽ ജില്ലയിൽ പൊതുവെ മെച്ചപ്പെട്ട പ്രകടനം കാഴ്ചവെച്ച സി.പി.എമ്മിന്​ ഈ നേട്ടം നിലനിർത്താനായില്ലെന്നാണ്​ കണക്കുകൾ സൂചിപ്പിക്കുന്നത്​. എൽ.ഡി.എഫിന്‍റെ നാല്​ അസംബ്ലി മണ്ഡലങ്ങളുള്ള പൊന്നാനിയിലും ഇടതിന്‍റെ പ്രകടനം ദയനീയമായിരുന്നു.

സമദാനിയുടെ വ്യക്​തിപ്രഭാവംകൂടി വോട്ടായപ്പോൾ സി.പി.എം കേന്ദ്രങ്ങളിൽപോലും യു.ഡി.എഫ്​ ആധിപത്യം നേടി. ഇടതിന്​ വ്യക്​തമായ മുൻതൂക്കമുള്ള പൊന്നാനി അസംബ്ലി മണ്ഡലത്തിൽ 15416 വോട്ടുകളുടെ ഭൂരിപക്ഷമാണ്​ സമദാനിക്ക്​ ലഭിച്ചത്​. തവനൂരിലും തൃത്താലയിലും താനൂരിലും യു.ഡി.എഫ്​ മുന്നേറ്റം നടത്തി.