ലോകായുക്ത: പ്രതിപക്ഷ പരാതിയിൽ ഗവർണർ സർക്കാറിനോട് വിശദീകരണം തേടി

തിരുവനന്തപുരം: ലോകായുക്ത നിയമഭേദഗതിയിൽ പ്രതിപക്ഷം ഉന്നയിച്ച പരാതികളിൽ സർക്കാറിനോട് ഗവർണർ വിശദീകരണം തേടി. സർക്കാർ മറുപടികൂടി ലഭിച്ചശേഷമായിരിക്കും നിയമഭേദഗതി ഓർഡിനൻസിന്‍റെ കാര്യത്തിൽ ഗവർണർ തുടർനടപടി സ്വീകരിക്കുക. പരാതി ലഭിച്ചു കഴിഞ്ഞാൽ സാധാരണ നടപടിക്രമം എന്ന നിലയിലാണ്​ ഗവർണർ വിശദീകരണം തേടിയത്​.

ഓര്‍ഡിനന്‍സില്‍ ഒപ്പിടരുതെന്ന് ആവശ്യപ്പെട്ട്​ കഴിഞ്ഞദിവസം പ്രതിപക്ഷം ഗവര്‍ണറെ നേരിൽകണ്ട്​ നിവേദനം നൽകിയിരുന്നു. നിവേദനത്തിന്‍റെ പകർപ്പ്​​ രാജ്​ഭവൻ മുഖ്യമന്ത്രിയുടെ ഓഫിസിലേക്ക്​ അയച്ചുകൊടുത്തിട്ടുണ്ട്​. ലോകായുക്ത നിയമത്തിന്‍റെ 14ാം വകുപ്പിൽ സര്‍ക്കാര്‍ കൊണ്ടുവരുന്ന ഭേദഗതി നിയമത്തിന്‍റെ പല്ലും നഖവും തകർക്കുന്നതാണെന്ന്​ നിവേദനത്തിൽ പ്രതിപക്ഷം പറഞ്ഞിരുന്നു.

പാര്‍ലമെന്‍റോ നിയമസഭയോ പാസാക്കിയ നിയമം ഭരണഘടനാ വിരുദ്ധമെന്ന്​ പറയാന്‍ കോടതിക്ക്​ മാത്രമേ സാധിക്കൂ എന്ന് സുപ്രീംകോടതി വ്യക്തമാക്കിയത്​ ചൂണ്ടിക്കാട്ടിയ പ്രതിപക്ഷം ലോകായുക്ത ബില്‍ അവതരിപ്പിച്ചപ്പോൾ രാഷ്ട്രപതിയുടെ അനുമതി തേടിയ സാഹചര്യത്തില്‍ ഓര്‍ഡിനന്‍സും രാഷ്ട്രപതിയുടെ അനുമതിക്ക് അയക്കണമെന്നും ആവശ്യപ്പെട്ടിരുന്നു.

മന്ത്രിസഭ അംഗീകരിച്ച്​ ഗവർണറുടെ അനുമതിക്ക്​ സമർപ്പിച്ച ഭേദഗതി നിർദേശം പാര്‍ലമെന്‍റ്​ പാസാക്കിയ ലോക്പാല്‍ നിയമത്തിന് എതിരാണോയെന്ന്​ പരിശോധിക്കേണ്ടത്​ രാഷ്ട്രപതിയാണെന്നും പ്രതിപക്ഷം ചൂണ്ടിക്കാട്ടുന്നു. ഇക്കാര്യങ്ങളിലാണ്​ അടിയന്തരമായി വിശദീകരണം നൽകാൻ ഗവർണർ ആവശ്യപ്പെട്ടത്​.