മാപ്പ് പറയാൻ എന്താണ് ദുരഭിമാനം​? മാപ്പ് പറഞ്ഞേ മതിയാകൂ -കെ. സുരേന്ദ്രൻ: ‘ഗണപതി നിന്ദ പുതുപ്പള്ളിയിൽ ചർച്ചയാകും’

കോട്ടയം: ഗണപതി നിന്ദയും നാമജപവും പുതുപ്പള്ളി ഉപതെരഞ്ഞെടുപ്പിൽ ചർച്ചയാകുമെന്ന് ബി.ജെ.പി സംസ്ഥാന അധ്യക്ഷൻ കെ. സുരേന്ദ്രൻ. ‘മിത്ത് വിവാദത്തിൽ സി.പി.എം നിലപാട് മയപ്പെടുത്തിയിട്ട് കാര്യമില്ല. എന്താണ് മയപ്പെടുത്തിയത്? മാപ്പ് പറയാൻ എന്താണ് ദുരഭിമാനം എന്നാണ് ഞങ്ങൾ ചോദിക്കുന്നത്. മാപ്പ് പറഞ്ഞേ മതിയാകൂ’ - അ​ദ്ദേഹം പറഞ്ഞു.

എൽ.ഡിഎഫ്- യുഡിഎഫ് നേതാക്കൾ ഒരുപോലെ പണം വാങ്ങിയതിനാലാണ് പുതുപ്പള്ളിയിൽ മാസപ്പടി വിഷയം മൂടിവെക്കാൻ ഇരുമുന്നണിയും ശ്രമിക്കുന്നത്. കോൺഗ്രസുകാരും ലീഗുകാരും സി.പി.എമ്മുകാരും മുഖ്യമ​ന്ത്രിയും മകളും മാസപ്പടി വാങ്ങി. അതുകൊണ്ടാണ് രണ്ടുകൂട്ടരും മിണ്ടാത്തത്.

നരേന്ദ്രമോദി സർക്കാർ നടപ്പിലാക്കിയ വികസനങ്ങളിൽ ഊന്നിയുള്ള പ്രചാരണമാകും എൻഡിഎ നടത്തുക. പുതുപ്പള്ളിയിൽ സ്ഥാനാർഥി​യെ പ്രഖ്യാപിക്കാൻ വൈകിയെങ്കിലും പ്രചരണത്തിൽ ഇരുമുന്നണിക്കൊ​പ്പവും ഓടിയെത്താൻ ബി.ജെ.പിക്ക് കഴിഞ്ഞതായി സുരേന്ദ്രൻ പറഞ്ഞു.

ഇരുമുന്നണികളും അഴിമതിക്കാരാണെന്ന് ഉറപ്പാണ്. അത് മൂടിവെക്കാനാണ് ഈ നാടകം. വിലക്കയറ്റം ഉൾപ്പെടെയുള്ള പ്രശ്നങ്ങൾ പുതുപ്പള്ളിയിൽ ഉന്നയിക്കും. മണ്ഡലത്തിൽ വികസന പ്രതിസന്ധി വലിയ പ്രശ്നമാണ് -അദ്ദേഹം പറഞ്ഞു.

അതിനിടെ, പുതുപ്പള്ളി ഉപതെരഞ്ഞെടുപ്പിൽ യു.ഡി.എഫ് സ്ഥാനാർഥി ചാണ്ടി ഉമ്മനും എൻ.ഡി.എ സ്ഥാനാർഥി ലിജിൻ ലാലും ഇന്ന് ഉപവരണാധികാരിയുടെ ഓഫിസായ പാമ്പാടി ബ്ലോക്ക് പഞ്ചായത്തിൽ നാമനിർദേശ പത്രിക സമർപ്പിക്കും. എല്‍.ഡി.എഫ് സ്ഥാനാർഥി ജെയ്ക് സി. തോമസ് ഇന്നലെ പത്രിക നൽകിയിരുന്നു.