എം. ശിവശങ്കറിന്​ സ്​പോർട്​സ്​, യുവജനകാര്യ സെക്രട്ടറിയായി നിയമനം

തിരുവനന്തപുരം: സസ്പെൻഷൻ പിൻവലിച്ചതിനെതുടർന്ന്​ സർവിസിൽ തിരികെ പ്രവേശിച്ച മുതിർന്ന ഐ.എ.എസ്​ ഉദ്യോഗസ്ഥൻ എം. ശിവശങ്കറിനെ സ്​പോർട്​സ്​, യുവജനകാര്യ പ്രിൻസിപ്പൽ സെക്രട്ടറിയായി നിയമിച്ചു. സ്വർണക്കടത്ത്​ കേസുമായി ബന്ധപ്പെട്ട്​ ഒന്നരവര്‍ഷക്കാലമായി സസ്​പെൻഷനിലായിരുന്ന മുഖ്യമന്ത്രിയുടെ മുൻ പ്രിൻസിപ്പൽ സെക്രട്ടറി എം. ശിവശങ്കറിനെ തിരിച്ചെടുക്കാൻ കഴിഞ്ഞദിവസമാണ്​ മുഖ്യമന്ത്രി ഉത്തരവിട്ടത്​. സസ്പെൻഷൻ കാലാവധി തീർന്നതിനാൽ തിരിച്ചെടുക്കണമെന്ന ചീഫ് സെക്രട്ടറി അധ്യക്ഷനായ സമിതിയുടെ ശിപാർശ അംഗീകരിച്ചാണ്​ മുഖ്യമന്ത്രിയുടെ നടപടി.

വ്യാഴാഴ്ച രാവിലെ 11ന്​ സെക്രട്ടേറിയറ്റിലെത്തി അദ്ദേഹം സർവിസിൽ പ്രവേശിച്ചു. ഏത്​ തസ്തികയിലേക്കാണ്​ നിയമനം എന്ന്​ വ്യക്തമാക്കാത്തതിനെ തുടർന്ന്​ ചീഫ്​ സെക്രട്ടറി മുമ്പാകെ റിപ്പോർട്ട്​ ചെയ്യുകയായിരുന്നു. വൈകുന്നേരത്തോടെയാണ്​ അദ്ദേഹത്തെ കായിക, യുവജനക്ഷേമ പ്രിൻസിപ്പൽ സെക്രട്ടറിയായി നിയമിച്ചുള്ള ഉത്തരവിറങ്ങിയത്​. യു.എ.ഇ കോൺസുലേറ്റിന്‍റെ പേരിൽ നയതന്ത്രചാനൽ വഴിയുള്ള സ്വർണക്കടത്ത് കേസിലെ പ്രതികളുമായുള്ള ബന്ധം പുറത്തുവന്നതിന് പിന്നാലെ 2020 ജൂലൈ 16 നായിരുന്നു ശിവശങ്കറിനെ സസ്പെൻഡ്​ ചെയ്തത്.

മുഖ്യമന്ത്രിയുടെ പ്രിൻസിപ്പൽ സെക്രട്ടറി എന്നതിന്​ പുറമെ ഐ.ടി സെക്രട്ടറിയുടെ ചുമതലയും അദ്ദേഹം നിർവഹിച്ച്​ വരികയായിരുന്നു. പിന്നീട് കസ്റ്റംസും എൻഫോഴ്സമെന്‍റ്​ ഡയറക്ടറേറ്റും വിജിലൻസും നടത്തിയ അന്വേഷണങ്ങളിൽ ശിവശങ്കർ പ്രതിയായി. സ്വ‍‍ര്‍ണക്കടത്ത് കേസിലും ലൈഫ് മിഷൻ അഴിമതിക്കേസിലുമാണ് പ്രതി ചേർത്തത്. ഇ.ഡിയും കസ്റ്റംസും ശിവശങ്കറിനെ അറസ്റ്റ് ചെയ്യുകയും 98 ദിവസം ജയിലിൽ കഴിയുകയും ചെയ്തു. അതിനുശേഷം നിരവധി തവണ അ​ദ്ദേഹത്തിന്‍റെ സസ്​പെൻഷൻ കാലാവധി നീട്ടി. ഡോളർ കേസിലും ശിവശങ്കർ പ്രതിയാണെന്ന്​ കസ്റ്റംസ്​ പറയുന്നതല്ലാതെ ഇതുസംബന്ധിച്ച കുറ്റപത്രം സമർപ്പിച്ചിട്ടില്ല. 2023 ജനുവരിവരെയാണ്ശിവശങ്കറിന്‍റെ സർവിസ് കാലാവധി.