മധു മടങ്ങി, വിശപ്പടങ്ങാതെ

അഗളി (പാലക്കാട്​): ജനസാഗരത്തെ സാക്ഷിയാക്കി അട്ടപ്പാടിയിലെ ആദിവാസി സമൂഹം മർദനമേറ്റ്​ മരിച്ച പ്രിയപുത്രൻ മധുവിന് യാത്രാമൊഴിയേകി. തൃശൂർ മെഡിക്കൽ കോളജ് ആശുപത്രിയിൽനിന്ന് പോസ്​റ്റ്മോർട്ടത്തിനുശേഷം ശനിയാഴ്ച വൈകീട്ട്​്​ മൂന്നോടെയാണ് മൃതദേഹം അഗളി പൊലീസ് സ്​റ്റേഷന്​ മുന്നിലെ സമരപ്പന്തലിൽ എത്തിച്ചത്. തടിച്ചുകൂടിയ വൻ ജനാവലിക്ക്​ മുന്നിൽ ഒരു മണിക്കൂർ പൊതുദർശനത്തിന്​ വെച്ചു. തുടർന്ന്​ സംസ്കരിക്കാൻ മൃതദേഹവുമായി പോയ ആംബുലൻസ് മുക്കാലി ജങ്ഷനിൽ ഊരുവാസികൾ തടഞ്ഞു. ​

െകാലപാതകികളെ നേരിൽ കാണാതെ കടത്തിവിടില്ലെന്ന് ഇവർ നിലപാടെടുത്തു. ആദിവാസി സ്ത്രീകളടക്കം രോഷാകുലരായി രംഗത്തെത്തിയതോടെ പൊലീസുമായി നേരിയ സംഘർഷവുമുണ്ടായി. തുടർന്ന് പൊലീസ് വാഹനം കൊട്ടിയൂർകുന്ന്​ വഴി ചിണ്ടക്കിയിൽ എത്തിക്കാൻ ശ്രമിച്ചെങ്കിലും അവിടെയും സമരക്കാർ തടഞ്ഞു. പ്രതികളുടെ ചിത്രം പൊലീസ് മൊബൈൽ ഫോൺ വഴി കാണിച്ചതോടെയാണ് പ്രതിഷേധക്കാർ ശാന്തരായത്. ഇതിനിടെ മൃതദേഹത്തെ അനുഗമിച്ച കോൺഗ്രസ് നേതാവ് വി.എം. സുധീരനും പ്രശ്നത്തിൽ ഇടപെട്ടു. സംഘർഷാവസ്​ഥ തീർന്നതോടെ, ചിണ്ടക്കി ആദിവാസി ഉൗരിന്​ സമീപത്തെ ഉൗര്​ ശ്​മശാനത്തിൽ മൃതദേഹം സംസ്​കരിച്ചു.  

പ്രതിഷേധം ഭയന്ന് മൃതദേഹം അഗളിയിലേക്ക് കൊണ്ടുവരുന്നതിന് പൊലീസ് ആദ്യം അനുമതി നൽകിയിരുന്നില്ല. പിന്നീട് സമരക്കാരുടെ സമ്മർദത്തെ തുടർന്നാണ്​ അനുവാദം നൽകിയത്​. അരമണിക്കൂർ സമയമാണ് പൊലീസ് അനുവദിച്ചത്. മൃതദേഹം കാണാൻ ജനാവലി കാത്തുനിന്നിരുന്നതിനാൽ പൊതുദർശനം ഒരുമണിക്കൂർ നീണ്ടു. സ്ത്രീകളും കുട്ടികളുമുൾപ്പെടെയുള്ളവർ പൊരിവെയിൽ വകവെക്കാതെ പ്രതിഷേധസമരത്തിൽ പങ്കുകൊണ്ടു. ഇരുള, മുഢുക, കുറുംബ വിഭാഗത്തിലുള്ള ആദിവാസി സമൂഹം ഒന്നാകെയാണ്​  അഗളിയിൽ സംഘടിച്ചത്​. വ്യാഴാഴ്​ചയാണ്​ ഭക്ഷണം മോഷ്​ടിച്ചെന്നാരോപിച്ച്​ ഒരുവിഭാഗം നാട്ടുകാർ അഗളി കടുകുമണ്ണ ഉൗരിലെ മല്ല​​​െൻറ മകൻ മധുവിനെ (32) മർദിച്ച്​ കൊലപ്പെടുത്തിയത്​. 

മുക്കാലിയിൽ മധുവിൻെറ മൃതദേഹവുമായി എത്തിയ ആംബുലൻസ് ആദിവാസികൾ തടയുന്നു

 

നീതി തേടി അട്ടപ്പാടിയിൽ പ്രതിഷേധക്കൊടുങ്കാറ്റ്​
അഗളി ശനിയാഴ്​ച സാക്ഷ്യംവഹിച്ചത് അട്ടപ്പാടിയുടെ ചരിത്രത്തിൽ ഇതുവരെ കാണാത്ത പ്രതിഷേധക്കൊടുങ്കാറ്റിന്​. മധുവി​​​െൻറ കൊലപാതകം അത്രയധികം അവരെ വേദനിപ്പിച്ചെന്നതിന്​ തെളിവായി ആ ജനക്കൂട്ടം. ഇക്കാലമത്രയും അവർ അനുഭവിച്ച പീഡനം പ്രതിഷേധമായി പുറത്തേക്കൊഴുകി. പ്രായഭേദമന്യേ ആയിരക്കണക്കിന് ആദിവാസികളാണ് സമരപന്തലിൽ എത്തിയത്. കൊച്ചുകുട്ടികൾ പ്ലക്കാർഡുകളുമേന്തി അഗളിയിൽ മാർച്ച് നടത്തി. കൊച്ചുകുട്ടികളിൽനിന്ന് പോലും നീതിക്കായി മുദ്രാവാക്യങ്ങളുയർന്നു. പ്രതീകാത്മകമായി മധുവി​​​െൻറ പ്രതിരൂപം നക്കുപ്പതി ഊരിൽനിന്ന് ചെല്ലൻ മൂപ്പ​​​െൻറ നേതൃത്വത്തിലുള്ള പ്രതിഷേധക്കാർ സമരപ്പന്തലിലെത്തിച്ചപ്പോൾ മുദ്രാവാക്യം ഉച്ചത്തിലായി. 

ശനിയാഴ്ച രാവിലെ മുതൽ അട്ടപ്പാടിയിലേക്ക് നേതാക്കളുടെയും പൊതുജനങ്ങളുടെയും ഒഴുക്കായിരുന്നു. നേതാക്കൾ സമരപന്തലിലെത്തി മധുവി​​​െൻറ മാതാവിനെയും സഹോദരിയെയും സന്ദർശിച്ചു. പ്രതിപക്ഷ നേതാവ് രമേശ്​ ചെന്നിത്തല, ബി.ജെ.പി സംസ്ഥാന പ്രസിഡൻറ് കുമ്മനം രാജശേഖരൻ, വി.എം. സുധീരൻ, വി.കെ. ശ്രീകണ്ഠൻ, ഷാഫി പറമ്പിൽ എം.എൽ.എ, സി.കെ. ജാനു തുടങ്ങിയവർ സമരപന്തലിലെത്തി അഭിവാദ്യമർപ്പിച്ചു. സംസ്ഥാന പട്ടികജാതി^വർഗ കമീഷൻ ചെയർമാൻ ബി.എസ്. മാവാജി സമരപന്തലിലെത്തി ബന്ധുക്കളുമായി സംസാരിച്ചു. ബി.ജെ.പിയും യു.ഡി.എഫും പ്രഖ്യാപിച്ച ഹർത്താലിനെതുടർന്ന് സമരപന്തലിലെത്താൻ ഏറെ ബുദ്ധിമുട്ടിയെങ്കിലും ഇതെല്ലാം അവഗണിച്ചാണ് ജനസാഗരം അഗളിയിലേക്ക് ഒഴുകിയത്. 

അട്ടപ്പാടിയിലേക്ക്​ നേതാക്കളൊഴുകി 
അഗളി: അട്ടപ്പാടിയിലേക്ക് ശനിയാഴ്ച രാവിലെ മുതൽ നേതാക്കളുടെയും പൊതുജനങ്ങളുടെയും ഒഴുക്കായിരുന്നു. നേതാക്കൾ സമരപന്തലിലെത്തി മധുവി​​​െൻറ മാതാവിനെയും സഹോദരിയെയും സന്ദർശിച്ചു. പ്രതിപക്ഷ നേതാവ് രമേശ്​ ചെന്നിത്തല, ബി.ജെ.പി സംസ്ഥാന പ്രസിഡൻറ് കുമ്മനം രാജശേഖരൻ, വി.എം. സുധീരൻ, വി.കെ. ശ്രീകണ്ഠൻ, ഷാഫി പറമ്പിൽ എം.എൽ.എ, സി.കെ. ജാനു തുടങ്ങിയവർ സമരപന്തലിലെത്തി അഭിവാദ്യമർപ്പിച്ചു. സംസ്ഥാന പട്ടികജാതി^വർഗ കമീഷൻ ചെയർമാൻ ബി.എസ്. മാവാജി സമരപന്തലിലെത്തി ബന്ധുക്കളുമായി സംസാരിച്ചു. ബി.ജെ.പിയും യു.ഡി.എഫും പ്രഖ്യാപിച്ച ഹർത്താലിനെതുടർന്ന് സമരപന്തലിലെത്താൻ ഏറെ ബുദ്ധിമുട്ടിയെങ്കിലും ഇതെല്ലാം അവഗണിച്ചാണ് ജനസാഗരം അഗളിയിലേക്ക് ഒഴുകിയത്. 

കുമ്മനത്തി​​​െൻറ പ്രതിഷേധം സമൂഹമാധ്യമങ്ങളിൽ ചർച്ചയായി
പാലക്കാട്: ബി.ജെ.പി സംസ്ഥാന പ്രസിഡൻറ് കുമ്മനം രാജശേഖരൻ നടത്തിയ സമരം സമൂഹമാധ്യമങ്ങളിൽ ചർച്ചയായി. കൊല്ലപ്പെട്ട മധുവിനെ കെട്ടിയിട്ടത് സ്വയം അനുകരിച്ചായിരുന്നു കുമ്മനത്തി​​​െൻറ സമരം. ആദ്യം തോർത്തുമുണ്ട്​ കൊണ്ട് കൈകൾ കെട്ടി ഫോട്ടോക്ക് പോസ് ചെയ്​ത കുമ്മനം, പിന്നീട് ചുവന്ന മുണ്ടുകൊണ്ട് കൈകൾ കെട്ടി സമരം നടത്തി. ചിത്രങ്ങൾ ഇദ്ദേഹം ട്വിറ്ററിൽ പോസ്​റ്റ്​ ചെയ്തതോടെയാണ് വിമർശനമേറ്റത്. 

മധുവി​​​െൻറ കുടുംബത്തെ സർക്കാർ സംരക്ഷിക്കും-മന്ത്രി ബാലൻ
തൃശൂർ: അട്ടപ്പാടിയിൽ മർദനമേറ്റ് മരിച്ച ആദിവാസി യുവാവ് മധുവി​​​െൻറ കുടുംബത്തെ സർക്കാർ സംരക്ഷിക്കുമെന്ന്​ മന്ത്രി എ.കെ. ബാലൻ പറഞ്ഞു. 10 ലക്ഷം രൂപ കുടുംബത്തിന് അടിയന്തര ധനസഹായം നൽകാൻ മുഖ്യമന്ത്രി നിർദേശിച്ചതായും മറ്റ് സഹായങ്ങൾ മന്ത്രിസഭ  തീരുമാനിക്കുമെന്നും അദ്ദേഹം അറിയിച്ചു. മുളങ്കുന്നത്തുകാവ്​ ഗവ. മെഡിക്കൽ കോളജ്​ മോർച്ചറിയിൽ മധുവി​​െൻറ മൃതദേഹം സന്ദർശിച്ച ശേഷം മാധ്യമങ്ങളോട് പ്രതികരിക്കുകയായിരുന്നു അദ്ദേഹം. ഇൗ സംഭവം ​ കേരളത്തിന് അപമാനമാണെന്ന് അദ്ദേഹം പറഞ്ഞു. മധുവിനെ പിടിക്കാൻ പോകാൻ വഴി കാട്ടിയത്​ വനം ഉദ്യേഗസ്​ഥരാണെന്നുള്ള  ആരോപണം അന്വേഷണം വഴിതിരിച്ചു വിടാനുള്ള ശ്രമത്തി​​​െൻറ ഭാഗമാണെന്ന്​  ബാലൻ പറഞ്ഞു. സംഭവത്തിൽ അന്വേഷണം ഊർജിതമാക്കിയിട്ടുണ്ട്​. ഇനിയൊരു ആദിവാസിക്കോ ദലിതനോ ഇങ്ങനെയൊരു അവസ്ഥ ഉണ്ടാകാതിരിക്കാനുള്ള മുൻകരുതലുകൾ സർക്കാർ സ്വീകരിക്കുമെന്നും ബാലൻ പറഞ്ഞു. കുറ്റക്കാർക്കെതിരെ കടുത്ത ശിക്ഷ ഉറപ്പു വരുത്തുമെന്ന് അദ്ദേഹത്തോടൊപ്പമുണ്ടായിരുന്ന മന്ത്രിമാരായ വി.എസ്. സുനിൽകുമാറ​ും കെ.കെ. ഷൈലജയും പറഞ്ഞു.