മൃതദേഹം കത്തിക്കരിഞ്ഞ നിലയിൽ​; ഇടതു കൈയിൽ ബാൻഡേജ്, ബാഗിൽ ആശുപത്രി ശീട്ട്​

പറവൂർ: സ്വകാര്യ ബസ്​സ്റ്റാൻഡിന് പിന്നിൽ ടൗൺ ജുമാമസ്ജിദിന് സമീപം പറവൂർ നഗരസഭയുടെ പ്രവർത്തനരഹിതമായ മുസ്​രിസ് ബസാറിൽ പുരുഷന്‍റേതെന്ന്​ സംശയിക്കുന്ന അജ്ഞാത മൃതദേഹം കത്തിക്കരിഞ്ഞ നിലയിൽ കണ്ടെത്തി. വ്യാഴാഴ്ച രാവിലെ ആറരയോടെ റോഡിലൂടെ പോയവരാണ് ബസാറിലെ തട്ടുകൾക്കിടയിൽ മൃതദേഹം കണ്ടത്.

സമീപത്തെ ബാഗിൽനിന്ന് എറണാകുളം ജനറൽ ആശുപത്രിയിലെ ശീട്ട്​ കണ്ടെത്തി. ഇതിൽ 58 വയസ് എന്ന് കാണിച്ചിട്ടുണ്ട്. ഇടതു കൈയിൽ ബാൻഡേജ് കെട്ടിയിട്ടുണ്ടായിരുന്നു. പറവൂർ സ്റ്റാൻഡിലെ കംഫർട്ട് സ്റ്റേഷനിൽ സഹായിയായ മലപ്പുറം കുറ്റിപ്പുറം സ്വദേശിയാണെന്ന്​ സംശയം ഉയർന്നെങ്കിലും സ്ഥിരീകരിച്ചിട്ടില്ല. കാലുകൾ ഒഴികെ ബാക്കി ഭാഗങ്ങൾ കത്തിക്കരിഞ്ഞിരുന്നു. കാലുകളിൽ നായ്ക്കൾ കടിച്ചിട്ടുണ്ട്​.

ആത്മഹത്യയാണെന്നാണ് പൊലീസിന്‍റെ പ്രാഥമിക നിഗമനം. മൃതദേഹത്തിന് സമീപത്തുനിന്ന് ലൈറ്ററും കുപ്പിയിൽ കുറച്ചു പെട്രോളും ഭക്ഷണാവശിഷ്ടങ്ങളും കണ്ടെത്തി. ചെരിപ്പുകൾ സമീപത്ത് ഒതുക്കിവെച്ചിരുന്നു. നടപടികൾക്ക് ശേഷം മൃതദേഹം എറണാകുളം മെഡിക്കൽ കോളജ്​ മോർച്ചറിയിലേക്ക് മാറ്റി. സംശയം തോന്നിയ വ്യക്തിയെക്കുറിച്ച് അന്വേഷിക്കാൻ കുറ്റിപ്പുറം പൊലീസിൽ വിവരം അറിയിച്ചു.