ഭാര്യാമാതാവിനെ കൊലപ്പെടുത്താൻ ശ്രമിച്ച് കഴുത്തറുത്ത് ആത്മഹത്യക്ക് ശ്രമിച്ചയാൾ മരിച്ചു

ചാത്തന്നൂർ: വയോധികയായ ഭാര്യാമാതാവിനെ തലക്കടിച്ച് കൊലപ്പെടുത്താൻ ശ്രമിച്ചശേഷം കഴുത്തറുത്ത് ആത്മഹത്യക്ക് ശ്രമിച്ചയാൾ മരിച്ചു. കല്ലുവാതുക്കൽ മീനമ്പലം ഗ്രീഷ്മ ഭവനിൽ മണിയപ്പനാണ് (60) തിരുവനന്തപുരം മെഡിക്കൽ കോളജ്​ ആശുപത്രിയിൽ ചികിത്സയിലിരിക്കെ മരിച്ചത്. തലക്കടിയേറ്റ ഭാര്യാമാതാവ് രത്നമ്മ (80) തിരുവനന്തപുരം മെഡിക്കൽ കോളജ്​ ആശുപത്രിയിൽ ചികിത്സയിലാണ്.

ഞായറാഴ്ച രാവിലെയാണ് ഏകമകൾ സുനിതയുടെ ഭർത്താവ് മണിയപ്പൻ രത്നമ്മയെ തലയ്ക്കടിച്ചുവീഴ്ത്തി കൊല്ലപ്പെടുത്താൻ ശ്രമിച്ചത്. ശേഷം വീട്ടിലെ തുണികൾക്ക് തീ കൊളുത്തുകയും പാചകവാതക സിലിണ്ടർ തുറന്നുവിടുകയും ചെയ്തു. തുടർന്ന്, കുളിമുറിയിൽ കയറി ഇയാൾ കഴുത്തറുത്ത് ആത്മഹത്യക്ക്​ ശ്രമിക്കുകയായിരുന്നു. പാചകവാതക സിലിണ്ടർ പൊട്ടിത്തെറിച്ച് വീടിന്‍റെ ഭിത്തികളും ജനലുകളും തകർന്നു. പരവൂരിൽനിന്ന് അഗ്നിരക്ഷാസേനയെത്തിയാണ് തീയണച്ചത്. സംഭവസമയം മണിയപ്പനും രത്നമ്മയും മാത്രമേ വീട്ടിലുണ്ടായിരുന്നുള്ളൂ.

വീടിനെ ചൊല്ലിയുള്ള വഴക്കാണ് കൊലപാതകശ്രമത്തിലേക്കും ആത്മഹത്യയിലേക്കും നയിച്ചതെന്ന് പൊലീസ് പറയുന്നു. മണിയപ്പന്‍റെ മക്കൾ: രേഷ്മ, ഗ്രീഷ്മ. മരുമക്കൾ: അനീഷ്, നിഖിൽ. പാരിപ്പള്ളി പൊലീസ് കേസെടുത്തു.