പുതിയ പാർട്ടി പ്രഖ്യാപിച്ച് മാണി സി. കാപ്പൻ; തെരഞ്ഞെടുപ്പിൽ മൂന്ന് സീറ്റ് ആവശ്യപ്പെടും

തിരുവനന്തപുരം: എൽ.ഡി.എഫ്​ വിട്ട്​ യു.ഡി.എഫിലെത്തിയ മാണി സി. കാപ്പൻ പുതിയ പാർട്ടി പ്രഖ്യാപിച്ചു. നാഷനലിസ്​റ്റ്​ കോൺഗ്രസ്​ കേരള (എൻ.സി.കെ) എന്നാണ്​ പേര്​. ഘടകകക്ഷിയായി യു.ഡി.എഫിൽ പ്രവേശിക്കണമെന്ന കാര്യം മുന്നണിയോട്​ ആവശ്യപ്പെട്ടിട്ടുണ്ടെന്നും ഇക്കാര്യത്തിൽ ഉത്തമ വി​ശ്വാസവും പ്രതീക്ഷയുമുണ്ടെന്നും അദ്ദേഹം പറഞ്ഞു. പാലായടക്കം മൂന്ന്​ സീറ്റുകൾ ആവശ്യപ്പെടുമെന്നും അദ്ദേഹം വാർത്തസമ്മേളനത്തിൽ വ്യക്തമാക്കി.

മറ്റ്​ രണ്ട്​ സീറ്റുകളേതെന്ന കാര്യം തീരുമാനിച്ചിട്ടില്ല. മുന്നണിയിൽ പ്രവേശിച്ച ശേഷമാകും ഇക്കാര്യത്തിലെ തീരുമാനം. ദേശീയ വീക്ഷണമുള്ള സംസ്​ഥാന പാർട്ടിയായി എൻ.സി.കെ പ്രവർത്തിക്കും. ഭാരവാഹികളും ജില്ല ഭാരവാഹികളും എൻ.സി.പിയിൽനിന്ന്​ രാജിവെച്ച്​ വന്നവരാണ്​. ആദ്യഘട്ടത്തിൽ ഒപ്പമുണ്ടായിരുന്ന ടി.പി. പീതാംബരനും ജോസ്​മോനും വരേണ്ടെന്ന്​ താൻ തന്നെയാണ്​ പറയുന്നത്​. ​

ത​േൻറത്​ പരമ്പരാഗതമായ കോൺഗ്രസ്​ കുടുംബമാണ്​. പിതാവ്​ കോൺഗ്രസ്​ എം.എൽ.എയും എം.പിയുമൊക്കെയായിരുന്നു. തന്നെ കോൺഗ്രസ്​ കുടുംബത്തിലേക്ക്​ തിരിച്ചെത്തിക്കുക എന്ന ആഗ്രഹം കൊണ്ടാകാം മുല്ലപ്പള്ളി താൻ കോൺഗ്രസ്​ ചിഹ്നത്തിൽ മത്സരിക്കണമെന്ന്​ ആവശ്യപ്പെട്ടത്​. മുല്ലപ്പള്ളിയെ വ്യക്തിപരമായി കാണുകയും കാര്യങ്ങൾ ബോധ്യപ്പെടുത്തുകയും ചെയ്​തു.

'രണ്ടില'ക്ക്​ ​എതിരെ പാലയിൽ മത്സരിക്കുന്നത്​​ പ്രശ്​നമോ വെല്ലുവിളിയോ ആയി കാണുന്നില്ല. മത്സരിക്കുന്നവരെ നോക്കിയാണ്​ ആളുകൾ വോട്ട്​ ചെയ്യുന്നത്​. എൽ.ഡി.എഫ്​ തന്നോട്​ നീതി കാണിച്ചില്ല. മുഖ്യമന്ത്രി പറഞ്ഞത്​ കുട്ടനാട്ട്​ മത്സരിക്കാനാണ്​. ഇതിൽനിന്നുതന്നെ പാലായുടെ കാര്യത്തിലെ എൽ.ഡി.എഫ്​ നിലപാട്​ വ്യക്തമായിരുന്നു. ഇപ്പോൾ പാലാ കിട്ടണമെന്നാണ്​ ആഗ്രഹമെന്ന്​ ടി.പി. പീതാംബരൻ ആവ​ശ്യപ്പെ​െട്ടങ്കിൽ നല്ല കാര്യമെന്നും മാണി സി. കാപ്പൻ പറഞ്ഞു.

സംസ്​ഥാന ഭാരവാഹികൾക്ക്​ പ​ുറമേ 11 ജില്ല പ്രസിഡൻറുമാരെയും പ്രഖ്യാപിച്ചു. മാണി സി. കാപ്പനാണ്​ പ്രസിഡൻറ്​. അഡ്വ.ബാബു കാർത്തികേയൻ (വർക്കിങ്​​.പ്രസി.), സുൽഫിക്കൽ മയൂരി (വൈസ്​.പ്രസി), പി. ഗോപിനാഥ്​ (വൈസ്​.പ്രസി), സലിം പി. മാത്യു, ബാബു തോമസ്​, കടകംപള്ളി സുകു, എം.​െജ. ഉമ്മൻ, സാജു എം. ഫിലിപ്​, പ്രദീപ്​ പറപ്പുറം, സുരേഷ്​ വേലായുധൻ, ഡോ.സുമ എസ്​. നായർ (ജനറൽ സെക്ര.) എന്നിവരാണ്​ മറ്റ്​ ഭാരവാഹികൾ.