വ്യാജ സർട്ടിഫിക്കറ്റുകളുപയോഗിച്ച്​ നിരവധി പേർ ഗൾഫിലേക്ക്​ കടന്നു; കോവിഡ്​ പരിശോധനയിൽ തട്ടിപ്പെന്ന്​ ആക്ഷേപം

കോഴിക്കോട്: സംസ്ഥാനത്ത്​ കോവിഡ്​ പരിശോധന നടത്തുന്ന ലാബുകൾ വ്യാപകമായ തട്ടിപ്പ്​ നടത്തുന്നതായി മലബാർ ​െഡവലപ്​​മെൻറ്​ ഫോറം (എം.ഡി.എഫ്​) പ്രസിഡൻറ്​​ കെ.എം. ബഷീർ വാർത്തസമ്മേളനത്തിൽ ആരോപിച്ചു. വ്യാജ സർട്ടിഫിക്കറ്റുകളുപയോഗിച്ച്​ നിരവധി പേർ ഗൾഫിലേക്ക്​ കടന്നതായി അദ്ദേഹം വാർത്തസമ്മേളനത്തിൽ പറഞ്ഞു. സാമ്പ്​ൾ പരിശോധിക്കാതെ വ്യാജ പരിശോധന ഫലം നൽകിയതായി പെരിന്തല്‍മണ്ണ തൂതയിലെ പൊയ്യക്കോടി വീട്ടില്‍ അബ്​ദുൽ അസീസ്​ വാർത്തസമ്മേളനത്തിൽ പറഞ്ഞു.

ദുബൈയിലേക്ക് പോകാൻ ഈ മാസം 13ന്​ വളാഞ്ചേരിയിലെ ലാബില്‍ സ്രവം പരിശോധനക്കായി നല്‍കിയിരുന്നു. 14ന് കോവിഡ് നെഗറ്റിവ് സര്‍ട്ടിഫിക്കറ്റ് ഇ-മെയിലിലൂടെ ലഭിക്കുകയും ചെയ്തു. എന്നാല്‍, 15ന്​ യാത്രക്കുള്ള ഒരുക്കത്തിനിടെ ആൻറിജന്‍ ടെസ്​റ്റ്​ നടത്തണമെന്ന്​ ലാബിൽനിന്ന്​ ആവശ്യപ്പെട്ടതായി അസീസ്​ പറഞ്ഞു. വളാഞ്ചേരി ലാബിൽനിന്ന്​ ശേഖരിച്ച സ്രവ സാമ്പ്​ള്‍ കോഴിക്കോ​ട്ടെ സ്വകാര്യ ലാബിലാണ് പരിശോധിച്ചത്​. ലാബ് നല്‍കിയ സര്‍ട്ടിഫിക്കറ്റിലെ അസെസ്‌മെൻറ്​ നമ്പര്‍ വ്യാജമാണെന്ന്​ തെളിഞ്ഞു.

ഇതിനിടെ കോവിഡ് പോസിറ്റിവാണെന്ന് കോഴിക്കോ​ട്ടെ ലാബ് വീണ്ടുമറിയിച്ചതിനെ തുടര്‍ന്ന് യാത്ര റദ്ദാക്കിയെന്നും അസീസ്​ പറഞ്ഞു. എന്നാൽ, ഒറ്റപ്പാലത്തും കോഴിക്കോ​ട്ടെ മറ്റൊരു ലാബിലും നടത്തിയ പരിശോധനയിൽ ഫലം നെഗറ്റിവായി.

വ്യാജ സര്‍ട്ടിഫിക്കറ്റുകള്‍ വിതരണം ചെയ്യുന്നതിനെതിരെ നടപടി സ്വീകരിക്കണമെന്നാവശ്യപ്പെട്ട് മുഖ്യമന്ത്രിക്കും ആരോഗ്യ മന്ത്രിക്കും ചീഫ് സെക്രട്ടറിക്കും നിവേദനം നല്‍കിയതായി കെ.എം. ബഷീര്‍ അറിയിച്ചു. വാര്‍ത്തസമ്മേളനത്തിൽ എം.ഡി.എഫ് വൈസ് പ്രസിഡൻറ്​ ജോയ് ജോസഫ്, ഓര്‍ഗനൈസിങ് സെക്രട്ടറി മുഹമ്മദ് അബൂദബി, ഷെയ്ഖ് ഷാഹിദ് എന്നിവരും പങ്കെടുത്തു.