വയനാട്​ വനാതിർത്തിയിൽ നാലംഗ മാവോയിസ്​റ്റ്​ സംഘം; തണ്ടർബോൾട്ട്​ തെരച്ചിൽ നടത്തുന്നു

കേളകം: വയനാട് ജില്ലയിലെ തവിഞ്ഞാല്‍ പ്രദേശത്ത് നാലംഗ മാവോവാദി സംഘത്തെ കണ്ടതായി വിവരം ലഭിച്ചതിനെ തുടർന്ന് ത ൊട്ടടുത്ത വയനാട്​, കണ്ണൂർ വനാതിർത്തി പ്രദേശങ്ങളിൽ പോലീസ് ശക്തമായ നിരീക്ഷണം ഏർപ്പെടുത്തി. തവിഞ്ഞാൽ നാല്‍പ്പത് തിനാല് അഭിനഗര്‍ കോളനിയിലെ വീട്ടിലാണ് തിങ്കളാഴ്ച്ച രാത്രി ഏഴരയോടെയാണ്​ നാലംഗ ആയുധധാരികളെത്തിയത്​. സംഘത്തിൽ രണ്ട് പുരുഷന്‍മാരും, രണ്ട് സ്ത്രീകളുമാണ്​ ഉണ്ടായിരുന്നതെന്നാണ്​ നാട്ടുകാർ അറിയിച്ചത്​.

മാവോയിസ്​റ്റ്​ സാന്നിധ്യത്തെ തുടർന്ന് സമീപപ്രദേശങ്ങളായ കൊട്ടിയൂർ, വയനാട് അതിർത്തി വന പ്രദേശങ്ങൾ, ബന്ധപ്പെട്ട പ്രധാന പാതകൾ എന്നിവടങ്ങളിൽ സുരക്ഷ കർശനമാക്കി. മാവോവാദി സംഘം എത്താൻ സാധ്യതയുള്ള കോളനി പ്രദേശങ്ങളിലെല്ലാം പ്രത്യോകപരിശീലനം നേടിയ തണ്ടർബോൾട്ട് സേനയും പൊലീസും നിരീക്ഷണം ഏർപ്പെടുത്തിയിട്ടുണ്ട്.