വിദ്യാർഥി വെടിയേറ്റ്​ മരിച്ചത്​ ആളൊഴിഞ്ഞ​ പ്രദേശത്ത്​

പെരിന്തൽമണ്ണ: പൂപ്പലത്ത്​ വിദ്യാർഥി വെടിയേറ്റ്​ മരിച്ച സംഭവത്തിൽ ദുരൂഹതയും അമ്പരപ്പും മാറാതെ നാട്​. ​​പ്രദേശത്ത്​​ ആൾതാമസമില്ലാത്തതിനാൽ സംഭവം അധികമാരുമറിഞ്ഞിരുന്നില്ല. മാസിനും കീഴടങ്ങിയ രണ്ട്​ സുഹൃത്തുക്കളും ഒരുമിച്ച്​ പെരിന്തൽമണ്ണ ​െഎ.എസ്​.എസ്​ സ്​കൂളിൽ നേരത്തെ പഠിച്ചിരുന്നതാണ്​.

പിന്നീട്​ മൂവരും വിവിധ കോളജുകളിൽ ചേർന്നു. ഒഴിവുദിവസം ഒരുമിച്ചു ചേർന്നതിനിടെയാണ്​ ദുരന്തം. ഇവരെ വിശദമായി ചോദ്യം ചെയ്​താൽ മാത്രമേ കൃത്യമായ വിവരം ലഭിക്കൂ. ​മരണം നടന്ന സ്​ഥലം മിച്ചഭൂമി പ്രദേശമാണ്​​. സർക്കാർ നിർമിച്ചുനൽകിയ ഏതാനും വീടുകൾ ഇവിടെയുണ്ടെങ്കിലും ഒന്നിലും ആൾതാമസമില്ല. സാമൂഹിക വിരുദ്ധരുടെ താവളമാണിതെന്നും ആക്ഷേപമുണ്ട്​. 

ലഹരി ഉപയോഗത്തിനായി ഇൗ പ്രദേശത്ത്​ ആളുകളെത്താറുണ്ടെന്ന്​ നാട്ടുകാർ പറയുന്നു. വൈകുന്നേരങ്ങളിൽ ഇവിടെയുള്ള കുന്നിനുസമീപം സംഘം ചേർന്ന്​ മദ്യപാനവും വഴക്കുമെല്ലാം പതിവാണത്രെ​. കോഴിക്കോട്​ എ.ഡബ്ല്യു.എച്ച്​​ കോളജിലെ വിദ്യാർഥിയായ മാസിൻ വെള്ളിയാഴ്​ചയാണ്​ നാട്ടിലെത്തിയത്​. ഞായറാഴ്​ച രണ്ടോടെ വീട്ടിൽ നിന്നിറങ്ങിയതാണ്​. പിന്നീട്​ മരണവിവരമാണ്​ വീട്ടുകാർ അറിയുന്നത്​. മൃതദേഹം തിങ്കളാഴ്​ച പോസ്​റ്റുമോർട്ടം നടത്തും.