ആലപ്പുഴ സി.പി.എമ്മിൽ കൂട്ടരാജി; തുമ്പോളിയിൽ നാല്​ ബ്രാഞ്ച്​ സെക്രട്ടറിയടക്കം 56 പേർ പാർട്ടിവിട്ടു

ആലപ്പുഴ: ആലപ്പുഴ സി.പി.എമ്മിൽ വിഭാഗീയത വീണ്ടും തലപൊക്കി. ആലപ്പുഴ ഏരിയയിലെ തുമ്പോളിയിൽ നാല്​ ബ്രാഞ്ച്​ സെക്രട്ടറിമാരടക്കം 56 പേരുടെ കൂട്ടരാജി. പാർട്ടി പുറത്താക്കിയയാ​ളെ ലോക്കൽ കമ്മിറ്റിയിൽ അംഗമാക്കിയതിനെതിരെ കഴിഞ്ഞ ഒക്​ടോബറിൽ നേതൃത്വത്തിന്​ പരാതി നൽകിയിട്ടും നടപടിയില്ലാത്തതിൽ പ്രതിഷേധിച്ചാണ്​ ​ഇത്രയുംപേർ ഒന്നിച്ച്​ പാർട്ടി വിട്ടത്​.

തുമ്പോളി നോർത്ത് ബി ബ്രാഞ്ച് സെക്രട്ടറി സെബാസ്റ്റ്യൻ, തുമ്പോളി സെന്‍റർ ബ്രാഞ്ച് സെക്രട്ടറി കരോൾ വോയ്റ്റീവ, മംഗലം ബ്രാഞ്ച് സെക്രട്ടറി ജീവൻ, മംഗലം സൗത്ത് ബി ബ്രാഞ്ച് സെക്രട്ടറി ജോബിൻ എന്നിവരാണ്​​ ലോക്കൽ സെക്രട്ടറിക്ക്​ രാജിക്കത്ത്​ നൽകിയത്​. ഇതി​നൊപ്പമാണ്​ 56 പാർട്ടി അംഗങ്ങളും രാജിവെച്ചത്​.

പാർട്ടി അംഗത്വം നിലനിർത്താനുള്ള പരിശോധനയിൽ 67 പേർക്ക്​ പുതുക്കാനായിട്ടില്ല. പ്രാദേശിക നേതാക്കളുടെ നിലപാടി​നെ എതിർത്ത​വരുടെ അംഗത്വമാണ്​ ഇത്തരത്തിൽ തഴഞ്ഞതെന്ന്​ ​ആക്ഷേപമുണ്ട്​. വാർഡ്​ കൗൺസിലർ ഉൾപ്പെടുന്ന ചി​ല ബ്രാഞ്ചുകളിൽ മെംബർഷിപ്​ നിലനിർത്തുന്ന പരിശോധന നടന്നിട്ടില്ലെന്നും​ പരാതിയുണ്ട്​. ലോക്കൽ കമ്മിറ്റിയുടെ നിലപാടിൽ പ്രതിഷേധിച്ച്​ നേരത്തേ രാജിവെച്ച ഒരു ബ്രാഞ്ച്​ സെക്രട്ടറി സി.പി.ഐയിൽ ചേർന്നിരുന്നു.

ഒക്​ടോബറിൽ ലോക്കൽ സമ്മേളനത്തിലാണ്​ വിഭാഗീയത പ്രകടമായത്​. വാർഡ്​ തെരഞ്ഞെടുപ്പിൽ പാർട്ടിവിരുദ്ധ പ്രവർത്തനം നടത്തിയതിന്‍റെ പേരിൽ പുറത്താക്കിയയാളെ ലോക്കൽ കമ്മിറ്റിയിൽ ഉൾ​പ്പെടുത്താൻ ഒരു വിഭാഗം ശ്രമിച്ചു. പി.പി. ചിത്തരഞ്ജൻ എം.എൽ.എയെ പരസ്യമായി അസഭ്യം പറഞ്ഞയാ​ളെ ഉൾപ്പെടുത്താനാവില്ലെന്ന എതിർപ്പ്​ അവഗണിച്ച്​ ലോക്കൽ കമ്മിറ്റി അംഗമാക്കിയതിനെതിരെ ഒരുവിഭാഗം സംസ്ഥാന നേതൃത്വത്തിന്​ പരാതി നൽകി.

വിഷയത്തിൽ ഇട​പെട്ട സംസ്ഥാന സെക്രട്ടറി എം.വി. ഗോവിന്ദൻ ഇത്​ ചർച്ച നടത്താൻ ജില്ലാ നേതൃത്വത്തിനോട്​ ആവശ്യപ്പെട്ടു. എന്നിട്ടും പ്രശ്നപരിഹാരമുണ്ടാകാത്ത സാഹചര്യത്തിൽ ഇയാളെ ലോക്കൽ കമ്മിറ്റിയിൽനിന്ന്​ ഒഴിവാക്കാതെ പ്രവർത്തിക്കി​ല്ലെന്ന്​ ഒരു വിഭാഗം ശക്തമായ നിലപാട്​ സ്വീകരിച്ചിരുന്നു. അത്​ പുകഞ്ഞാണ്​ ഇപ്പോഴത്തെ കൂട്ടരാജിയെന്ന്​ പറയപ്പെടുന്നു.

പാർട്ടി നേതൃത്വത്തിനോട്​ കലഹിച്ച്​ കുട്ടനാട്ടിൽനിന്ന്​ മാത്രം 200ലധികംപേർ സി.പി.എം അംഗത്വം ഉപേക്ഷിച്ച്​ സി.പി.ഐയിൽ ചേർന്നത്​ ഏറെ ചർച്ചയായിരുന്നു. ജില്ലാ നേതൃത്വം ഇടപെട്ട് അനുരഞ്ജനശ്രമങ്ങൾ നടത്തിയിട്ടും വിജയിച്ചില്ല. സി.പി.എം ശക്തികേ​ന്ദ്രമായ രാമങ്കരിയിൽ പഞ്ചായത്ത്​ ഭരണംപോലും നഷ്ടമാകുന്ന സ്ഥിതിയുണ്ടായി.