ലൂസിഫർ സ്​റ്റൈലിൽ തൃത്താലയിലേക്ക്​ മാസ്​ എൻട്രിയുമായി എം.ബി രാജേഷ്​

പാലക്കാ​ട്: തൃത്താലയിൽ ഇക്കുറി തീപാറുന്ന പോരാട്ടമാണ്​ നടക്കുന്നത്​. രണ്ട്​ തവണ പാലക്കാട്​ ലോക്​സഭ മണ്ഡലത്തെ പ്രതിനിധീകരിച്ച്​ എം.പിയായ എം.ബി രാജേഷാണ്​ മണ്ഡലത്തിലെ സി.പി.എം സ്ഥാനാർഥി. കോൺഗ്രസ്​ സ്ഥാനാർഥിയെ ഔദ്യോഗികമായി പ്രഖ്യാപിച്ചിട്ടില്ലെങ്കിലും എം.എൽ.എ വി.ടി ബൽറാം തന്നെയായിരിക്കും സ്ഥാനാർഥിയെന്ന്​ എതാണ്ട്​ ഉറപ്പായിട്ടുണ്ട്

എം.ബി രാജേഷിനെ സ്ഥാനാർഥിയായി പ്രഖ്യാപിച്ചതിന്​ പിന്നാലെ പുറത്തിറക്കിയ വിഡിയോയാണ്​ ഇപ്പോൾ വൈറൽ. രജനീകാന്തിന്‍റെ കാലാ സിനിമയുടെ ബിജിഎം നൽകിയാണ് രാജേഷിന്‍റെ വീഡിയോ നിർമിച്ചിട്ടുള്ളത്.

ജീപ്പോടിച്ച് പാലത്തിലൂടെ എത്തുന്ന രാജേഷ് സ്ലോ മോഷനിൽ ജീപ്പിൽ നിന്നിറങ്ങി കുടയും ചൂടി വരുന്നതാണ് വീഡിയോ. മികച്ച പാർലമെ​േന്‍ററിയൻ ഇനി തൃത്താലയ്ക്ക് സ്വന്തം എന്ന വാചകവും വിഡിയോക്കൊപ്പം ചേർത്തിട്ടുണ്ട്​.

തുടർച്ചയായ മൂന്നാം തവണ തൃത്താലയിൽ മത്സരിക്കുന്ന ബൽറാമിനെ എന്തുവിലകൊടുത്തും തോൽപ്പിക്കുകയെന്നതാണ്​ സി.പി.എം ലക്ഷ്യം. അതുകൊണ്ട്​ തന്നെയാണ്​ കിട്ടാവുന്നതിൽ ഏറ്റവും ശക്​തനായ സ്ഥാനാർഥിയെ സി.പി.എം രംഗ​ത്തിറക്കുന്നതും.