സ്വാശ്രയ മെഡിക്കൽ​: സ്ഥിരം ഫീസ് ഘടന നിശ്ചയിച്ച് ഉത്തരവിറങ്ങി

തിരുവനന്തപുരം: സംസ്​ഥാനത്തെ സ്വാശ്രയ മെഡിക്കൽ കോളജുകളിലേക്കുള്ള സ്ഥിരം ഫീസ് ഘടന ജസ്​റ്റിസ് രാജേന്ദ്ര ബാബു കമ്മിറ്റി നിശ്ചയിച്ച് തുടങ്ങി. കോഴിക്കോട് മുക്കം കെ.എം.സി.ടി മെഡിക്കൽ കോളജി​​െൻറ വാർഷിക ഫീസ് 4.80 ലക്ഷമാക്കി നിശ്ചയിച്ചുകൊണ്ട് കമ്മിറ്റി വ്യാഴാഴ്ച രാത്രിയോടെയാണ് ഉത്തരവിറക്കിയത്.​ 2017^-18 വർഷത്തെ ഫീസാണിത്.

ഇപ്പോൾ പ്രവേശനം നേടിയ വിദ്യാർഥികൾക്ക് ഈ ഫീസായിരിക്കും ബാധകം. ഇവരുടെ അടുത്തവർഷത്തെ വാർഷികഫീസ്​ 5.54 ലക്ഷമായും നിശ്ചയിച്ചിട്ടുണ്ട്. ഇതേ കോളജിൽ കഴിഞ്ഞവർഷം പ്രവേശനം നേടിയവരുടെ വാർഷിക ഫീസ്​ 4.15 ലക്ഷമായിരിക്കും. ഇവർ 10 ലക്ഷം താൽക്കാലിക വാർഷിക ഫീസും 10 ലക്ഷം ബാങ്ക് ഗ്യാരൻറിയും നൽകിയിരുന്നു. എന്നാൽ, കോളജ് യഥാസമയം കണക്കുകൾ സമർപ്പിക്കാത്തതിനാൽ ഫീസ്​ നിശ്ചയിക്കാൻ കഴിഞ്ഞിരുന്നില്ല.

ജസ്​റ്റിസ്​ രാജേന്ദ്രബാബു സമിതിയുടെ അന്ത്യശാസനത്തെതുടർന്ന് കഴിഞ്ഞവർഷത്തെ വരവുചെലവ് കണക്കും അടുത്തിടെ സമർപ്പിച്ചിരുന്നു. മറ്റ് കോളജുകളിലെ ഫീസ് ഘടന ഉടൻ പ്രസിദ്ധീകരിക്കുമെന്നാണ് വിവരം. സ്വാശ്രയ കോളജുകൾ സമർപ്പിച്ച ചെലവ് കണക്കും അടിസ്​ഥാനസൗകര്യങ്ങളും ഫാക്കൽറ്റികളുടെ എണ്ണവും പരിഗണിച്ചാണ് ഫീസ്​ നിശ്ചയിച്ചത്. 21 സ്വാശ്രയ മെഡിക്കൽ കോളജുകൾക്കും വാർഷികഫീസായി അഞ്ചുലക്ഷം രൂപയും താൽക്കാലികമായി നിശ്ചയിച്ചിരുന്നു.

തുടർന്ന് മാനേജ്​മ​​െൻറുകൾ സുപ്രീംകോടതിയെ സമീപിക്കുകയും സുപ്രീംകോടതി താൽക്കാലിക ഫീസ്​ 11 ലക്ഷമായി നിശ്ചയിക്കുകയും ചെയ്തു. രാജേന്ദ്രബാബു കമ്മിറ്റി നിശ്ചയിച്ച അഞ്ച്​ ലക്ഷത്തിന്​ പുറമെ ആറുലക്ഷം ബാങ്ക് ഗ്യാരൻറി നൽകാനും ഉത്തരവിട്ടിരുന്നു. ഇതോടെ സംസ്​ഥാനത്തെ സ്വാശ്രയ മെഡിക്കൽ കോളജുകളിൽ നീറ്റ് യോഗ്യത നേടിയ സാധാരണക്കാർക്കും പാവപ്പെട്ടവർക്കും പ്രവേശനം അസാധ്യമായി. തുടർന്ന് ബാങ്കിൽ സംസ്​ഥാന സർക്കാർ ഗാരൻറി നിൽക്കുമെന്ന് മുഖ്യമന്ത്രിയും ആരോഗ്യമന്ത്രിയും അറിയിച്ചിരുന്നു.