പുനർനിയമനം ലഭിച്ചില്ലെങ്കിലും തന്‍റെ സേവനം ഉണ്ടാകുമെന്ന് എം.ജി സർവകലാശാല വി.സി

കോട്ടയം: പുനർനിയമനം ലഭിച്ചില്ലെങ്കിലും തന്‍റെ സേവനം ഉണ്ടാകുമെന്ന് എം.ജി സർവകലാശാല വൈസ്​ചാൻസലർ ഡോ. സാബു തോമസ്. ജീവിതകാലം മുഴുവൻ സർവകലാശാലക്ക് വേണ്ടി പ്രവർത്തിക്കാനാണ് ആഗ്രഹം. സർക്കാർ എന്ത് പറഞ്ഞാലും അത് അനുസരിച്ച് മുന്നോട്ടു പോകുമെന്നും സാബു തോമസ് മാധ്യമങ്ങളോട് പറഞ്ഞു.

ഈ മാസം 27ന് കാലാവധി അവസാനിക്കുന്ന എം.ജി സർവകലാശാല വിസിക്ക് പുനർനിയമനം നൽകണമെന്ന് ചൂണ്ടിക്കാട്ടി സംസ്ഥാന സർക്കാർ കഴിഞ്ഞ ദിവസം​ ഗവർണറോട് ശിപാർശ ചെയ്തിരുന്നു. പ്രോ-ചാൻസലറായ ഉന്നത വിദ്യാഭ്യാസ മന്ത്രി ഡോ. ആർ. ബിന്ദുവാണ്​ ഇതുസംബന്ധിച്ച്​ ചാൻസലറായ ഗവർണർക്ക് കത്ത് നൽകിയത്​.

സാബു തോമസിന്റെ കാലാവധി അവസാനിക്കുമ്പോൾ പകരക്കാരനായി ആരെ നിയമിക്കണമെന്ന് ഗവർണർ സർക്കാറിനോട് കഴിഞ്ഞയാഴ്ച ആരാഞ്ഞിരുന്നു. അതിന് മറുപടിയായാണ് സർക്കാർ ഇപ്പോൾ കത്തയച്ചിരിക്കുന്നത്. എം.ജി സർവകലാശാല വി.സിയുടെ പ്രായപരിധി 65 ആയി നിശ്ചയിച്ചതിനാൽ ഡോ. സാബു തോമസിന്​ പുനർനിയമനം നൽകാമെന്നാണ്​ സർക്കാർ നിലപാട്.

സാബു തോമസിന്​ 62 വയസ്സായിട്ടേയുള്ളൂ. കണ്ണൂർ സർവകലാശാല വി.സി ഡോ. ഗോപിനാഥ്‌ രവീന്ദ്രന്റെ പുനർനിയമനം ചോദ്യം ചെയ്തുള്ള ഹരജി സുപ്രീംകോടതിയുടെ പരിഗണനയിലിരി​ക്കെയാണ്​ എം.ജിയിൽ വി.സി പദവിയിൽ വീണ്ടും പുനർനിയമന നീക്കം.

സാങ്കേതിക സർവകലാശാല വി.സി ഡോ. എം.എസ്.​ രാജശ്രീയെ സുപ്രീംകോടതി വിധിയെ തുടർന്ന് പിരിച്ചുവിട്ടതിനു പിന്നാലെ നിയമന നടപടിക്രമം പാലിക്കാത്ത ഒമ്പതുപേർക്ക്​ പിരിച്ചുവിടാതിരിക്കാൻ ഗവർണർ കാരണം കാണിക്കൽ നോട്ടീസ്​ നൽകിയവരിൽ സാബു തോമസും ഉൾപ്പെട്ടിരുന്നു. ഡോ. സാബു തോമസിന്റെ നിലവിലെ വി.സി നിയമനം യു.ജി.സി ചട്ടങ്ങൾക്ക് വിരുദ്ധമാണെന്ന് ചൂണ്ടിക്കാട്ടിയാണ് ഗവർണർ കാരണം കാണിക്കാൻ നോട്ടീസ് നൽകിയതെങ്കിലും ഹൈകോടതി ഇടപെടലിനെ തുടർന്നാണ്​ അദ്ദേഹം പദവിയിൽ തുടരുന്നത്​.

ആദ്യ നിയമനം തന്നെ ചട്ടവിരുദ്ധമെന്ന് ചൂണ്ടിക്കാട്ടി സാബു തോമസിനെതിരെയുള്ള ​ക്വോവാറന്‍റോ ഹരജിയും കോടതിയുടെ പരിഗണനയിലാണ്. സെർച് കമ്മിറ്റിയില്ലാതെ സാബു തോമസിന് പുനർനിയമനം നൽകിയാൽ അത് വീണ്ടും കോടതികയറുമെന്നുറപ്പാണ്​. താൽക്കാലിക വി.സി നിയമനങ്ങളിൽ സർക്കാർ താൽപര്യം നടക്കട്ടെയെന്ന അയഞ്ഞ നിലപാടിലാണ് ഗവർണറെങ്കിലും സ്ഥിരം വി.സി നിയമനം ചട്ടപ്രകാരം നടത്തണമെന്ന നിലപാടിലാണ്​ അദ്ദേഹം.

എന്നാൽ, ഗവർണറുടെ കാലാവധി അവസാനിക്കുന്നതുവരെ താൽക്കാലിക വി.സിമാരെ വെച്ച് സർവകലാശാല ഭരണം നടത്താനാണ് സർക്കാർ നീക്കം. വി.സി പദവി ഒഴിവുവന്ന സർവകലാശാലകൾക്ക്​ പുതിയ വി.സി നിയമനത്തിന്​ സെർച് കമ്മിറ്റി രൂപവത്​കരിക്കാൻ സർക്കാറും സർവകലാശാലകളും പ്രതിനിധിയെ നൽകിയിട്ടുമില്ല.