ജി.എസ്.ടി പിരിവ്​ ഊർജിതമാക്കാൻ ഉദ്യോഗസ്ഥർക്ക് മന്ത്രിയുടെ നിർദേശം; ലോക്ഡൗൺ പിൻവലിച്ചതോടെ വരുമാനം വർധിച്ചു

തിരുവനന്തപുരം: സംസ്ഥാനത്ത് ജി.എസ്.ടി പിരിക്കാനുള്ള നടപടി ഉൗർജിതമാക്കാൻ ഉദ്യോഗസ്ഥർക്ക് ധനമന്ത്രി കെ.എൻ. ബാലഗോപാൽ നിർദേശം നൽകി. മന്ത്രി അധികാരമേറ്റശേഷം ജി.എസ്.ടി ഉദ്യോഗസ്ഥരുമായി നടത്തിയ രണ്ടാമത്തെ യോഗമാണിത്​.

സംസ്ഥാനത്തി​െൻറ നികുതി വരുമാനം ഉയർത്താൻ നടപടി കൈക്കൊ​ള്ളണമെന്ന്​ യോഗം വിലയിരുത്തി​. ഉദ്യോഗസ്ഥർ പ്രധാന റോഡുകളിൽ പരിശോധന നടത്തും. ലോക്ഡൗൺ പിൻവലിച്ചതിന്​ പിന്നാലെ ജി.എസ്​.ടി വരുമാനം വർധിക്കുന്നുണ്ടെന്നും യോഗം വിലയിരുത്തി.

കോവിഡ്​ വ്യാപനം രൂക്ഷമായ സാഹചര്യത്തിൽ വ്യാപാരികൾക്ക്​ ഇളവുകൾ നൽകിയിരുന്നു. ഇപ്പോൾ വ്യാപാരസ്ഥാപനങ്ങൾ പ്രവർത്തനമാരംഭിച്ച സാഹചര്യത്തിലാണ്​ നികുതി പിരിവ്​ കാര്യക്ഷമമാക്കാൻ നിർദേശിച്ചത്​.

ജനങ്ങളിൽനിന്ന്​ പിരിക്കുന്ന നികുതി ആ മാസം തന്നെ സർക്കാർ ഖജനാവിലേക്ക്​ അടക്കാൻ വ്യാപാരികൾ ബാധ്യസ്ഥരാണെങ്കിലും പലപ്പോഴും അതുണ്ടാകുന്നില്ലെന്ന്​ ചില ഉദ്യോഗസ്ഥർ ചൂണ്ടിക്കാട്ടി. സർക്കാറിലേക്ക്​ അടക്കേണ്ട നികുതി മാസങ്ങളോളം കൈവശം​െവച്ച് കച്ചവടത്തിൽ മുടക്കുന്ന അവസ്ഥയാണുള്ളത്.

ഇത് നിരുത്സാഹപ്പെടുത്തണമെന്നും റിട്ടേൺ അതത്​ മാസം സമർപ്പിച്ച് നികുതിയടക്കാൻ സമ്മർദ്ദം ചെലുത്തണമെന്നും അഭിപ്രായമുയർന്നു. അതിർത്തി കടന്നുള്ള ചരക്കുനീക്കത്തിൽ വൻ നികുതി വെട്ടിപ്പുണ്ട്​. ഇ-വേ ബില്ലി​െൻറ മറവിൽ നടക്കുന്ന ഇത്തരം തട്ടിപ്പുകൾ നികുതി വരുമാനത്തിൽ വലിയ നഷ്​ടമുണ്ടാക്കുന്നെന്നാണ്​ വിലയിരുത്തൽ. ചെക്പോസ്​റ്റുകളിലെ പരിശോധന ശക്തമാക്കാനും തീരുമാനിച്ചു​.