എക്സാലോജിക്​: പാർട്ടി നേതൃത്വം വിശദീകരിക്കുമെന്ന് മന്ത്രി റിയാസ്​, പ്രതികരിക്കാതെ മന്ത്രി രാജീവ്​

കോഴിക്കോട്​: മുഖ്യമന്ത്രിയുടെ മകൾ വീണ വിജയന്‍റെ കമ്പനി എക്സാലോജിക്കിനെതിരായ കേന്ദ്ര അന്വേഷണ വാർത്തയെക്കുറിച്ച് പ്രതികരിക്കാതെ മന്ത്രി പി. രാജീവ്​. ‘‘കരിമണൽ കാര്യത്തിൽ ഞങ്ങൾ ചില ചോദ്യങ്ങൾ മാത്യു കുഴൽനാടനോട്​ ചോദിച്ചിട്ടുണ്ട്​. അതിന്​ അയാൾ മറുപടി പറയട്ടെ. ബാക്കി പിന്നീട്​ പറയാം’’ -മാധ്യമപ്രവർത്തകരുടെ ചോദ്യത്തിന്​ മന്ത്രിയുടെ മറുപടി ഇങ്ങനെയായിരുന്നു.

അതേസമയം, എക്സാലോജിക്കിനെതിരായ അന്വേഷണം സംബന്ധിച്ച്​ പാർട്ടി നേതൃത്വം വിശദീകരിക്കുമെന്ന്​ മന്ത്രി പി.എ. മുഹമ്മദ്​ റിയാസ്​ മാധ്യമപ്രവർത്തകരോട്​ പറഞ്ഞു. ​അന്വേഷണമൊക്കെ കുറെ കണ്ടതാണ്​. തെരഞ്ഞെടുപ്പ്​ അടുക്കുമ്പോഴുള്ള ഇത്തരം അന്വേഷണം മുമ്പും ഉണ്ടായിട്ടുണ്ടെന്ന്​ അദ്ദേഹം കൂട്ടിച്ചേർത്തു.

കേന്ദ്ര അന്വേഷണം അറിഞ്ഞിട്ടില്ല -ബിനോയ് വിശ്വം

പാലക്കാട്: എക്‌സാലോജിക്കുമായി ബന്ധപ്പെട്ട് മുഖ്യമന്ത്രിയുടെ മകൾക്കെതിരായ കേന്ദ്ര അന്വേഷണം അറിഞ്ഞിട്ടില്ലെന്ന് സി.പി.ഐ സംസ്ഥാന സെക്രട്ടറി ബിനോയ് വിശ്വം എം.പി. ഇപ്പോഴുള്ള ഏത് കേന്ദ്രസർക്കാർ അന്വേഷണവും നിഷ്പക്ഷമാവാറില്ല. ന്യായവും നീതിയും ഇല്ലാ​ത്ത നടപടികളാണ് കേന്ദ്രത്തിൽനിന്ന് ഉണ്ടായിക്കൊണ്ടിരിക്കുന്നത്. രാഷ്ട്രീയ കണ്ണോടെ എതിരാളി​കളെ നിർവീര്യമാക്കാൻ നോക്കുകയാണ് കേന്ദ്രസർക്കാറെന്നും അദ്ദേഹം മാധ്യമപ്രവർത്തകരോട് പറഞ്ഞു.

കേന്ദ്ര അന്വേഷണം വികല ലക്ഷ്യത്തോടെ -മന്ത്രി രാമചന്ദ്രൻ കടന്നപ്പള്ളി

വീണ വിജയന്‍റെ കമ്പനിക്കെതിരായ കേന്ദ്ര അന്വേഷണം രാഷ്ട്രീയമായ വികല ലക്ഷ്യത്തോടെയാണെന്ന് മന്ത്രി രാമചന്ദ്രൻ കടന്നപ്പള്ളി. ഇതിലെ രാഷ്ട്രീയ താൽപര്യം തിരിച്ചറിയാനുള്ള കഴിവ് കേരളത്തിലെ ജനങ്ങൾക്കുണ്ടെന്നും മന്ത്രി എറണാകുളം പ്രസ് ക്ലബിന്‍റെ മീറ്റ് ദ പ്രസിൽ പറഞ്ഞു. ഒരു ജനാധിപത്യ മര്യാദയുമില്ലാതെയാണ് കേന്ദ്രം സംസ്ഥാനത്തോട് പെരുമാറുന്നത്. ബി.ജെ.പി ഇതര സർക്കാറുകളെ വേട്ടയാടുന്നതിന്‍റെ ഭാഗമായാണിത്. സാമ്പത്തികമായി ഞെരുക്കുന്നതോടൊപ്പം ഭരണഘടനാപ്രതിസന്ധിയുണ്ടാക്കാനും നീക്കം നടത്തുകയാണ്. ഇതിനെതിരെ ദേശീയാടിസ്ഥാനത്തിൽ മുന്നണിയുണ്ടാക്കണം -അദ്ദേഹം പറഞ്ഞു.