വാഹനാപകടം: മന്ത്രി വാസവന്​ നിസ്സാര പരിക്ക്​

കോട്ടയം: മന്ത്രി വി.എൻ. വാസവന്‍റെ വാഹനം അപകടത്തിൽപെട്ടു. ദേശീയപാത 183ൽ ഒമ്പതാംമൈലിൽ പിക്​അപ്​ വാനുമായി കൂട്ടിയിടിക്കുകയായിരുന്നു. മന്ത്രിയുടെ കൈക്ക് ചെറിയ ചതവുണ്ട്​. തോളിന് പരിക്കേറ്റ ഗൺമാൻ രാംദാസിനെ (46) പാമ്പാടി താലൂക്ക്​ ആശുപത്രിയിൽ പ്രഥമ ശുശ്രൂഷ നൽകിയശേഷം കോട്ടയം മെഡിക്കൽ കോളജ്​ ആശുപത്രിയിലേക്ക്​ മാറ്റി. മന്ത്രിയുടെ പി.എ ഗോപനും ഡ്രൈവർ സുരേഷും പരിക്കില്ലാതെ രക്ഷപ്പെട്ടു.

കഴിഞ്ഞദിവസം അന്തരിച്ച ക്രോസ്റോഡ്സ് സ്കൂൾ മാനേജർ ഗബ്രിയേൽ ജോണിന് ആദരാഞ്ജലി അർപ്പിച്ചശേഷം കോട്ടയത്തേക്ക്​ പോകുന്നതിനിടെ തിങ്കളാഴ്ച ഉച്ചക്കാണ്​​ അപകടം നടന്നത്​. എതിരെവന്ന ബയോ മെഡിക്കൽ വേസ്റ്റ് ശേഖരിക്കാനെത്തിയ പിക്​ അപ്​ വാനുമായി കൂട്ടിയിടിക്കുകയായിരുന്നു. കാറിന്‍റെ മുൻഭാഗം പൂർണമായി തകർന്നു. പാമ്പാടിയിലെ വസതിയിൽ വിശ്രമത്തിലുള്ള മന്ത്രിയെ മകൾ ഡോ. ഹിമയും ഭാര്യാസഹോദരീഭർത്താവ് ഡോ. രഞ്ചനും പരിശോധിച്ചു.