സ്​കോളർഷിപ്പ്​ പുന:ക്രമീകരണം: ജനങ്ങളെ തമ്മിലടിപ്പിക്കാനുള്ള സർക്കാർ​ നീക്കമെന്ന്​​ കുഞ്ഞാലിക്കുട്ടി

തിരുവനന്തപുരം: ന്യൂനപക്ഷ വിദ്യാർഥി സ്​കോളർഷിപ്പ്​ അനുപാതം പുന:ക്രമീകരിക്കാനുള്ള മന്ത്രി സഭാ തീരുമാനത്തിനെതിരെ മുസ്​ലിം ലീഗ്​. മുസ്​ലിം വിഭാഗത്തിനുള്ള ആനുകൂല്യങ്ങൾ സർക്കാർ റദ്ദാക്ക​ിയെന്നും മുസ്​ലീം ലീഗ്​ ദേശിയ ജനറൽ സെ​ക്രട്ടറിയും എം.എൽ.എയുമായ പി.കെ.കുഞ്ഞാലിക്കുട്ടി.​

സച്ചാർ കമീഷൻ റിപ്പോർട്ട്​ അടിസ്ഥാനത്തിൽ മുസ്​ലിം വിഭാഗത്തിന്​ ലഭിക്കേണ്ട ആനുകൂല്യം ഇല്ലാതാക്കി. എന്നാൽ മറ്റ്​ സംസ്ഥാനങ്ങളിൽ ഈ ആനുകൂല്യം ലഭിക്കുന്നുണ്ട്​.സച്ചാർ കമ്മിറ്റിയെക്കാൾ കൂടൂതൽ ആനുകൂല്യം നൽകാനാണ്​ ഞങ്ങൾ പാലൊളി കമ്മിറ്റി കൊണ്ട്​ വന്നതെന്ന്​ പറഞ്ഞ ഇടതു സർക്കാർ തന്നെ അതിനെ 80:20 ആക്കി മാറ്റി. എന്നിട്ട്​ അവർ തന്നെ ഒരു വിഭാഗത്തിന്​ 80 ലഭിക്കുന്നു മറ്റൊരു വിഭാഗത്തിന്​ 20 മാത്രമെയുള്ളുവെന്ന ചർച്ചയ​ുമുണ്ടാക്കി.

സച്ചാർ കമ്മിറ്റി റിപ്പോർട്ട്​ പരിഗണിച്ച്​ മുസ്​ലീംകൾക്ക്​​ ആനുകൂല്യം കൊടുക്കുകയും മറ്റ്​ ന്യൂനപക്ഷങ്ങൾക്ക്​ ജനസംഖ്യാനുപാതികമായി വേറൊരു സ്​കീം കൊണ്ടുവരികയാണ്​ വേണ്ടത്​. അതിന്​ പകരം വെറുതെ ജനവിഭാഗങ്ങളെ തമ്മിലടിപ്പിക്കാനാണ്​ സർക്കാർ ​ശ്രമിക്കുന്നതെന്നും പി.കെ കുഞ്ഞാലിക്കുട്ടി ആരോപിച്ചു.

ന്യൂനപക്ഷ വിദ്യാർഥി സ്​കോളർഷിപ്പ്​ അനുപാതം ഹൈകോടതി വിധിയനുസരിച്ച്​ 2011 ലെ സെൻസസ്​ പ്രകാരം പുന:​ക്രമീകരിക്കാൻ മന്ത്രി സഭ തീരുമാനിച്ചു. നിലവിലെ 80:20 ഹൈകോടതി അനുപാതം ​ഹൈകോടതി റദ്ദാക്കിയിരുന്നു. ഇതിനെ തുടർന്നാണ്​ സർക്കാർ പുതിയ തീരുമാനമെടുത്തത്​.

ഹൈകോടതി വിധിക്കെതിരെ വിവിധ കോണുകളിൽ നിന്ന്​ വ്യാപക വിമർശം ഉയർന്നിരുന്നു. സച്ചാർ കമ്മിറ്റി റിപ്പോർട്ടിന്‍റെ അടിസ്ഥാനത്തിൽ സ്​കോളർഷിപ്പ്​ നടപ്പാക്കണമെന്നായിരുന്നു മുസ്​ലിം സംഘടനകളുടെ ആവശ്യം.

മുസ്‌ലിം ന്യൂനപക്ഷത്തിന് ലഭിക്കേണ്ട സംവരണം ഉൾപ്പെടെയുള്ള ആനുകൂല്യങ്ങൾ പൂർണമായും ലഭിക്കാനാവശ്യമായ നടപടികൾ സ്വീകരിക്കണമെന്നും, വ്യത്യസ്​ത വിഭാഗങ്ങൾക്ക് സംസ്ഥാനം നൽകിയ ആനുകൂല്യങ്ങപറ്റിയുള്ള ധവളപത്രം പ്രസിദ്ധീകരിക്കണമെന്നും മുസ്​ലിം സംഘടനകൾ ആവശ്യം ഉന്നയിച്ചിരുന്നു. എന്നാൽ ഇതൊന്നും പരിഗണിക്കാതെയാണ്​ നടപടി.അതേസമയം ന്യൂനപക്ഷ സ്കോളർഷിപ്പുകളിലും ആനുകൂല്യങ്ങളിലും 80:20 അനുപാതം റദ്ദാക്കിയ നടപടിയെ യാക്കോബായ സുറിയാനി സഭ സ്വാഗതം ചെയ്​തിരുന്നു.