ബിഷപ്പി​െൻറ അറസ്​റ്റ്​ വരെ പോരാടും -കന്യാസ്​ത്രീകൾ

കോട്ടയം: ലൈംഗിക പീഡനക്കേസിൽ ആരോപണ വിധേയനായ ജലന്ധർ ബിഷപ് ഫ്രാ​േങ്കാ മുളക്കലിനെ അറസ്​റ്റ്​ ചെയ്യുന്നതുവരെ പോരാട്ടം തുടരുമെന്ന്​ കുറവിലങ്ങാട്​ മഠത്തിലെ കന്യാസ്​ത്രീകൾ. കൊച്ചിയിൽ നടക്കുന്ന സമരത്തിൽ പ​െങ്കടുക്കാൻ പോകുന്നതിന്​ മുമ്പ്​ കുറവിലങ്ങാട്ട്​ മാധ്യമപ്രവർത്തകരോട്​ സംസാരിക്കുകയായിരുന്നു അവർ. അനുസരണമെന്ന്​ പറഞ്ഞ്​ തങ്ങളെ അടിച്ചമർത്താൻ ശ്രമിക്കുകയാണ്​. സത്യാവസ്ഥ എന്താണെന്ന്​ എല്ലാവർക്കുമറിയാം. കന്യാസ്​ത്രീയുടെ പരാതി സത്യമായതിനാൽ അവ​ർക്കൊപ്പം ഉറച്ചുനിൽക്കും.

നീതിക്കുവേണ്ടി സെക്ര​േട്ടറിയറ്റ്​ പടിക്കൽ നടക്കുന്ന സമരത്തിലും പ​െങ്കടുക്കും. ആരുടെയും പ്രേരണ​െകാണ്ടല്ല സമരം ചെയ്യുന്നത്​. നീതിക്കുവേണ്ടിയാണ്​. മിഷനറീസ്​ ഒാഫ്​ ജീസസ്​ സന്യാസസഭ തങ്ങളെ തള്ളിപ്പറഞ്ഞതിന്​ പിന്നിൽ ബിഷപ്​ ഫ്രാ​േങ്കാ മുളക്കലി​​െൻറ ഇടപെടലുണ്ട്​.​ അപകീർത്തികരമായ പരാമർശം നടത്തിയ പി.സി. ജോർജ് എം.എൽ.എക്കെതിരെ പരാതി നൽകും. അടുത്ത ദിവസം കന്യാസ്​ത്രീ അന്വേഷണസംഘത്തിന്​ മൊഴി നൽകുമെന്നും ഒപ്പമുള്ള കന്യാസ്​ത്രീകൾ അറിയിച്ചു.

അതിനിടെ, ജലന്ധര്‍ ബിഷപ് ഫ്രാങ്കോ മുളക്കലിനെതിരെ കേസ് എടുക്കണമെന്ന് ആവശ്യപ്പെട്ട് ഹൈകോടതിയില്‍ സമര്‍പ്പിച്ച ഹരജിയില്‍ കന്യാസ്​​ത്രീക്കെതിരെ കക്ഷിചേരുമെന്ന് മിഷനറീസ് ഓഫ് ജീസസ്. പരാതിക്കാരിയായ കന്യാസ്​ത്രീ അംഗമായ സന്യാസിനി സഭയാണിത്​. കന്യാസ്ത്രീയും സമരക്കാരും മനഃസാക്ഷിക്ക്​ നിരക്കാത്ത കാര്യങ്ങളാണ്​ പ്രചരിപ്പിക്കുന്നത്. പറയുന്നതെല്ലാം പച്ചക്കള്ളമാണ്. ഈ ഗൂഢാ​േലാചനക്കെതിരെ പ്രതികരിച്ചില്ലെങ്കിൽ ദൈവത്തിനു മുന്നിൽ കണക്കുപറയേണ്ടിവരുമെന്നതിനാലാണ്​ കക്ഷിചേരാൻ തീരുമാനിച്ചതെന്ന്​ മിഷനറീസ്​ ഒാഫ്​ ജീസസ്​ വാർത്തക്കുറിപ്പിൽ വ്യക്​തമാക്കുന്നു.

കന്യാസ്ത്രീയുടെ സ്വഭാവശുദ്ധിയെ ചോദ്യംചെയ്യുന്ന നിരവധി ആരോപണങ്ങളും ഇതിൽ ഉന്നയിച്ചിട്ടുണ്ട്. കന്യാസ്ത്രീക്കെതിരെ നടപടി ഉറപ്പായപ്പോൾ സന്യാസജീവിതം ഉപേക്ഷിക്കാൻ അപേക്ഷിക്കുകയും പിന്നീട് പിൻവലിക്കുകയും ചെ‍യ്തതിനു പിന്നിലും ദുരൂഹതയുണ്ട്. ഇവരുടെ ഫോൺ നഷ്​ടപ്പെട്ടുപോയി എന്നു പറയുന്നതും വിശ്വസനീയമല്ല. ഇത് കണ്ടെത്തിയാൽ ഗൂഢാലോചന മനസ്സിലാക്കാം. കന്യാസ്ത്രീയുടെ സാമ്പത്തികസ്രോതസ്സും അന്വേഷിക്കണം.അന്വേഷണസംഘത്തിലെ ഉദ്യോഗസ്ഥനെതിരെയും ആരോപണമുണ്ട്​. രഹസ്യമൊഴിപോലും പരാതിക്കാരിയുടെ സംഘത്തിനും ഇത് വളച്ചൊടിച്ച് മാധ്യമങ്ങൾക്കും ലഭിക്കുന്ന സ്ഥിതിയുണ്ടാവുന്നതായാണ്​ പരാതി.