വര്‍ഗസമരം ഉപേക്ഷിച്ച് സി.പി.എം വര്‍ഗീയസമരം ഏറ്റെടുത്തു -ഹസൻ

തിരുവനന്തപുരം: കോൺഗ്രസ്​ നേതൃത്വത്തിലെ ന്യൂനപക്ഷ പ്രാതിനിധ്യം സംബന്ധിച്ച സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍റെ ​പ്രസ്താവന വര്‍ഗസമരം ഉപേക്ഷിച്ച് വര്‍ഗീയസമരം അവർ ഏറ്റെടുത്തിരിക്കുന്നതിന്​ തെളിവാണെന്ന്​ യു.ഡി.എഫ്​ കൺവീനർ എം.എം. ഹസൻ. ബി.ജെ.പിക്ക്​ തുല്യമായി വര്‍ഗീയത ആളിക്കത്തിക്കാനാണ്​ സി.പി.എം ശ്രമം. അതിൽ ലജ്ജ തോന്നുന്നുവെന്നും അദ്ദേഹം വാര്‍ത്തസമ്മേളനത്തില്‍ പറഞ്ഞു.

പിണറായിയും കോടിയേരിയും രാഷ്ട്രീയലാഭത്തിനായി ഭൂരിപക്ഷ- ന്യൂനപക്ഷ വര്‍ഗീയതയെ ഉപയോഗിക്കുന്നു. കോണ്‍ഗ്രസ് എല്ലാ മതവിഭാഗങ്ങളെയും ഉള്‍ക്കൊള്ളുന്ന മതനിരപേക്ഷ പാര്‍ട്ടിയാണ്. മുഖ്യമന്ത്രി, പാർട്ടി സെക്രട്ടറി സ്ഥാനങ്ങളിൽ ന്യൂനപക്ഷ സമുദായാംഗങ്ങളെ പരിഗണിക്കാത്ത പാർട്ടിയാണ്​ സി.പി.എം. അതിനാൽ ന്യൂനപക്ഷ പ്രാതിനിധ്യം സംബന്ധിച്ച്​ കോൺഗ്രസിനോട് ചോദിക്കാന്‍പോലും അവർക്ക്​ അവകാശമില്ല. കേരളത്തിലെ സി.പി.എം മുതലാളിത്ത, കമീഷൻ പാര്‍ട്ടിയായി അധഃപതിച്ചു. പോളിറ്റ്​ ബ്യൂറോയംഗം എസ്. രാമചന്ദ്രന്‍ പിള്ളയുടെ ചൈനാ സ്തുതി അദ്​​ഭുതകരമാണ്​. രാമചന്ദ്രന്‍ പിള്ളയും കോടിയേരിയും ചൈനീസ് ചാരന്മാരെപോലെയാണ് സംസാരിക്കുന്നത്​.

കേരളത്തെ കടക്കെണിയിലാക്കുകയും പരിസ്ഥിതിയെ പൂര്‍ണമായും തകര്‍ക്കുകയും ചെയ്യുന്ന കെ -റെയില്‍ പദ്ധതി കമീഷന്​ വേണ്ടിയുള്ളതാണ്​. കെ-റെയിലിനെതിരെ യു.ഡി.എഫ് പറഞ്ഞ കാര്യങ്ങള്‍ ശരിയാണെന്ന് ഡി.പി.ആര്‍ പുറത്തുവന്നപ്പോള്‍ തെളിഞ്ഞു. പദ്ധതി ഉപേക്ഷിക്കണമെന്ന നിലപാടില്‍ യു.ഡി.എഫ് ഉറച്ചുനില്‍ക്കുന്നു. കെ-റെയിലിന്​ പകരം ബദല്‍ പദ്ധതി കൊണ്ടുവരണം. ഡി.പി.ആറിൽ അല്ല പദ്ധതിയിലാണ്​ മാറ്റം വേണ്ടതെന്നും ഹസന്‍ പറഞ്ഞു.