എം.എം. ലോറൻസിന്‍റെ മൃതദേഹം: മധ്യസ്ഥ ചർച്ചയിലും പരിഹാരമായില്ല

കൊച്ചി: സി.പി.എം നേതാവ് എം.എം. ലോറൻസിന്റെ മൃതദേഹം സംസ്കരിക്കുന്നതിനെച്ചൊല്ലിയുള്ള തർക്കത്തിന് മധ്യസ്ഥ ചർച്ചയിലും പരിഹാരമായില്ല. ഇരുകൂട്ടരും വിട്ടുവീഴ്ചക്ക്​ തയാറല്ലെന്ന് മധ്യസ്ഥ ചർച്ചക്ക്​ നിയോഗിച്ച മുതിർന്ന അഭിഭാഷകൻ കോടതിയെ അറിയിച്ചു. ഇതേത്തുടർന്ന്​ ഹരജി വീണ്ടും വ്യാഴാഴ്ച പരിഗണിക്കാൻ ചീഫ് ജസ്റ്റിസ് നിതിൻ ജാംദാർ, ജസ്റ്റിസ് എസ്. മനു എന്നിവരടങ്ങുന്ന ഡിവിഷൻ ബെഞ്ചിലേക്ക്​​ മാറ്റി.

മൃതദേഹം മെഡിക്കൽ പഠനത്തിന് വിട്ടുനൽകണമെന്നായിരുന്നു ലോറൻസിന്‍റെ ആഗ്രഹമെന്ന മകന്‍റെ വാദം അംഗീകരിച്ച ഹൈകോടതി സിംഗിൾബെഞ്ച്​ ഉത്തരവ്​ ചോദ്യംചെയ്ത്​ പെൺമക്കളായ ആശയും സുജാതയും അപ്പീൽ ഹരജി നൽകിയ സാഹചര്യത്തിൽ, ഡിവിഷൻബെഞ്ച്​ നിർദേശപ്രകാരം അഭിഭാഷകന്‍റെ സാന്നിധ്യത്തിലാണ്​ ചർച്ച നടന്നത്. മകൻ എം.എൽ. സജീവന്റെ നിലപാടിന്​ വിരുദ്ധമായി മൃതദേഹം പള്ളിയിൽ സംസ്കരിക്കണമെന്ന ആഗ്രഹമാണ്​ സുജാതയും ആശയും ഡിവിഷൻ ബെഞ്ചിനെ അറിയിച്ചത്​.

ഈ തർക്കം സിവിൽ കോടതി മുഖേനയോ മധ്യസ്ഥ ചർച്ചയിലൂ​ടെയോ ആണ്​ പരിഹരിക്കേണ്ടതെന്ന്​ വിലയിരുത്തിയാണ്​ ​കോടതി മധ്യസ്ഥതക്ക്​ വിട്ടത്​. മൃതദേഹം മെഡിക്കൽ പഠനത്തിന് വിട്ടുനൽകണമെന്ന് മരണത്തിനുമുമ്പ് ലോറൻസ് രണ്ട് സാക്ഷികളുടെ സാന്നിധ്യത്തിൽ ആഗ്രഹം അറിയിച്ചിരുന്നുവെന്ന സജീവന്റെ വാദം കണക്കിലെടുത്തായിരുന്നു സിംഗിൾബെഞ്ച് ഉത്തരവ്.

സെപ്​റ്റംബർ 21നാണ്​ എം.എം. ലോറൻസ്​ മരിച്ചത്​. കോടതി ഉത്തരവിനെത്തുടർന്ന്​ മൃതദേഹം കൊച്ചി ഗവ. മെഡിക്കൽ കോളജിൽ സൂക്ഷിച്ചിരിക്കുകയാണ്.