‘ആനയുടെ വായിൽ കൊണ്ടുപോയി വെള്ളം ഒഴിക്കട്ടെ’; സീപ്ലെയിനിൽ വനം വകുപ്പിനെ പരിഹസിച്ച്​ എം.എം. മണി

അടിമാലി: സീപ്ലെയിനിൽ ആശങ്ക അറിയിച്ച വനം വകുപ്പിനെ പരിഹസിച്ച്​ മുൻ മന്ത്രി എം.എം. മണി. വനം വകുപ്പ്​ പോയി പണി നോക്കട്ടെയെന്നായിരുന്നു മണിയുടെ പ്രതികരണം. മാട്ടുപ്പെട്ടി പ്രദേശം ആനത്താരയാണെന്ന വനം വകുപ്പിന്‍റെ മുന്നറിയിപ്പിന്​, ആന കാട്ടിലാണുള്ളതെന്നും ആനക്ക് വെള്ളം കുടിക്കാൻ പറ്റിയില്ലേൽ വനം വകുപ്പ് ആനയുടെ വായിൽ കൊണ്ടുപോയി വെള്ളം ഒഴിക്കട്ടെയെന്നും എം.എം. മണി പറഞ്ഞു.

മാട്ടുപ്പെട്ടി ഡാമിൽ സീപ്ലെയിൻ ഇറങ്ങുന്നതിലാണ് വനം വകുപ്പ് എതിർപ്പ്​ അറിയിച്ചത്. സീ​പ്ലെയിനിന്‍റെ ശബ്ദവും തുടർപ്രകമ്പനവും വന്യജീവികളുടെ സ്വൈരവിഹാരത്തിന്​ തടസമാണെന്ന്​ കാണിച്ച്​ വനം വകുപ്പ് കലക്ടർക്ക് കത്തും​ നൽകി. മാട്ടുപ്പെട്ടി അണക്കെട്ട് പ്രദേശം ആനത്താരയാണെന്നും കത്തിൽ ചൂണ്ടിക്കാട്ടി.

മൂന്നാർ ഡിവിഷനൽ ഫോറസ്റ്റ് ഓഫിസറാണ് കലക്ടർക്ക്​ കത്ത് കൈമാറിയത്​. ഈ പ്രദേശത്തിന് ദേശീയ വന്യജീവി ബോർഡ് അംഗീകരിച്ച വന്യജീവി സംഘർഷ ലഘൂകരണ പദ്ധതി നിർബന്ധമാണെന്നും ഡി.എഫ്.ഒ കത്തിൽ ആവശ്യപ്പെട്ടു. മുമ്പ്​ ഇരവികുളം ദേശീയോദ്യാനത്തിന് മുകളിലൂടെ ഹെലികോപ്ടർ പറന്നപ്പോൾ വരയാടുകൾ ചിതറി ഓടിയ സംഭവമുണ്ടായിട്ടുണ്ട്​.

അതേസമയം, പദ്ധതിക്ക് തുരങ്കം വെക്കാൻ നോക്കേണ്ടെന്ന്​​ വനം വകുപ്പിനോട്​​ ചടങ്ങിൽ പ​ങ്കെടുത്ത മന്ത്രി റോഷി അഗസ്റ്റിൻ പറഞ്ഞു. കേരളത്തിനാകെ വികസനക്കുതിപ്പേകുന്ന പദ്ധതിയെന്നത്​ കണക്കിലെടുത്ത്​ ജനങ്ങൾ ഒരുമിച്ച് നിൽക്കണമെന്നും റോഷി അഗസ്റ്റിൻ ആവശ്യപ്പെട്ടു.