പ്രളയം: പ്രതിസന്ധി പരിഹരിക്കാൻ വൈദ്യുതി വിലകൊടുത്ത്​ വാങ്ങേണ്ട സ്ഥിതി -മന്ത്രി മണി

കോട്ടയം: പ്രളയത്തിൽ ​െക.എസ്​.ഇ.ബിക്ക്​ 850 കോടിയുടെ നഷ്​ടമുണ്ടായെന്നും പ്രതിസന്ധി പരിഹരിക്കാൻ വൈദ്യുതി വിലകൊടുത്ത്​ വാങ്ങേണ്ട സ്ഥിതിയാണെന്നും മന്ത്രി എം.എം. മണി. ഒാൾ ഇന്ത്യ ന്യൂസ്​ പേപ്പർ എംപ്ലോയീസ്​ ഫെഡറേഷൻ ദേശീയ സമ്മേളനത്തി​​​െൻറ ഭാഗമായി നടന്ന പ്രതിനിധി സമ്മേളനം ഉദ്​ഘാടനം ചെയ്യുകയായിരുന്നു അദ്ദേഹം.

പ്രളയകാലത്ത്​ വൈദ്യുതി ബോർഡ്​ ലാഭമുണ്ടാക്കാൻ ശ്രമിച്ചെന്ന ആരോപണം തെറ്റാണ്​. ഒമ്പത്​ വൈദ്യുതി നിലയങ്ങൾ ഇപ്പോഴും മണ്ണിനടിയിലാണ്​. ഇതിൽ ആറെണ്ണം ബോർഡി​​​െൻറയും മ​ൂ​െന്നണ്ണം സ്വകാര്യ മേഖലയിലേതുമാണ്​. 350 മെഗാവാട്ട്​ വൈദ്യുതി ഉൽപാദനം കുറഞ്ഞു. വൈദ്യുതി പ്രതിസന്ധി എങ്ങനെ മറികടക്കാമെന്നാണ്​ ആലോചിക്കുന്നത്​. വിലയ്​ക്കുവാങ്ങി കൊടുക്കുന്നില്ലെങ്കിൽ കറൻറ്​ കട്ട്​ അനിവാര്യമായി തീരും. വാങ്ങിയാലും വൈദ്യുതി കൊടുക്കണമെന്നാണ്​ തീരുമാനം.

ഡാമിൽ സംഭരിച്ച​ വെള്ളം ഇപ്പോഴുമുണ്ട്​. കനത്തമഴയിൽ ഒഴുകിയെത്തിയ വെള്ളമാണ്​ തുറന്നുവിട്ടത്​. ഡാമുകൾ പൊളിച്ചുവിട​ണമെന്നാണ്​ ചിലർ പറയുന്നത്​. അവ ഉള്ളതുകൊണ്ടാണ്​ കുടിവെള്ളക്ഷാമം രൂക്ഷമാകാത്തത്​. മനുഷ്യസൃഷ്​ടിയാണെന്ന്​ പറഞ്ഞ്​ ചിലർ പ്രളയത്തെ വിവാദമാക്കുകയാണ്​. അമേരിക്കയിലടക്കം പ്രകൃതിദുരന്തം നടമാടുന്നു​. എല്ലാം നശിച്ച ജനതയെ പുനരുദ്ധരിക്കാനാണ്​ നവകേരളം മുന്നോട്ടുവെച്ചത്​.

പ്രളയകാലത്ത്​ പത്രങ്ങൾ വഹിച്ച പങ്ക്​ വലുതാണ്​. പല കാര്യങ്ങളും ഭരണാധികാരികളുടെ ശ്ര​ദ്ധയിൽകൊണ്ടുവന്നു. മാധ്യമങ്ങൾ മാറിമാറി വരുന്ന ഭരണാധികാരികൾക്ക്​ വെള്ളപൂശുന്ന സമീപനമാണ്​ സ്വീകരിക്കുന്നത്​. മോദിയുടെ ഭരണത്തെ പിന്താങ്ങുന്ന പത്രങ്ങൾ പുരോഗമന നിലപാട്​ സ്വീകരിക്കുന്നവരെ കടന്നാക്രമിക്കുകയാണ്​. പ​ത്രമേഖലയിലുള്ളവരുടെ അവകാശങ്ങൾ നിഷേധിക്കുന്നതിനെതിരെ പണിമുടക്കി പ്രക്ഷോഭം സംഘടിപ്പിക്കണമെന്നും അദ്ദേഹം പറഞ്ഞു.

ദേശീയ പ്രസിഡൻറ്​ അഡ്വ. എസ്​.ഡി. ഥാക്കൂർ അധ്യക്ഷത വഹിച്ചു. മുൻ എം.എൽ.എ വി.എൻ. വാസവൻ, എച്ച്​.എം.എസ്​ പ്രസിഡൻറ്​ അഡ്വ. തമ്പാൻ തോമസ്​, എ.​െഎ.എൻ.ഇ.എഫ് ജനറൽ സെക്രട്ടറി വി. ബാലഗോപാൽ, ​കെ.എൻ.ഇ.എഫ്​ പ്രസിഡൻറ്​ എം.സി. ശിവകുമാരൻ നായർ, പത്രപ്രവർത്തക യൂനിയൻ സംസ്ഥാന സെക്രട്ടറി ഷാലു മാത്യു, എ.​െഎ.എൻ.ഇ.എഫ് ഒാർഗനൈസിങ്​ സെക്രട്ടറി ഗോപൻ നമ്പാട്ട്​ എന്നിവർ സംസാരിച്ചു. കെ.എൻ.ഇ.എഫ്​ ജനറൽ സെക്രട്ടറി സി. മോഹനൻ സ്വാഗതവും പ്രോഗ്രാം കൺവീനർ ജയ്​സൺ ജോസഫ്​ നന്ദിയും പറഞ്ഞു.