മോദി മോഡൽ നിയമസഭയിൽ നടപ്പാക്കാൻ അനുവദിക്കില്ല -ഷാഫി പറമ്പിൽ

തിരുവനന്തപുരം: ലോക്സഭയിലെ നരേന്ദ്ര മോദി മോഡൽ നിയമസഭയിലും നടപ്പാക്കാൻ അനുവദിക്കില്ലെന്നും ഷാഫി പറമ്പിൽ എം.എൽ.എ. മോദിയും പിണറായിയും ഇക്കാര്യത്തിൽ ഒരുപോലെയാണ്​. രണ്ടു​പേരും പ്രതിപക്ഷ അവകാശങ്ങൾ ഹനിക്കുന്നതിൽ മത്സരിക്കുന്നു. ആ മാതൃക തുടരാൻ ശ്രമിച്ചാൽ ചെറുക്കുമെന്നും ഷാഫി പറമ്പിൽ പറഞ്ഞു.

പ്രതിപക്ഷത്തിന്​ ജനങ്ങളുടെ പ്രശ്നങ്ങൾ കൃത്യമായി അവതരിപ്പിക്കാനാകുന്ന മാർഗമാണ്​ അടിയന്തര പ്രമേയം. രണ്ടു മിനിറ്റിന്‍റെ സബ്​മിഷനും ഒരു മിനിറ്റ്​ മറുപടിയുമാണ്​ സർക്കാർ ഉദ്ദേശിക്കുന്നത്​.​ പ്രതിപക്ഷം പറയുന്നത്​ കേട്ടിരിക്കാനുള്ള കെൽപും ആർജവവും മുഖ്യമന്ത്രിക്കില്ല. പ്രതിപക്ഷ നേതാവിനുശേഷം വീണ്ടും സർക്കാർ​ മറുപടി വേണമെന്ന്​ ആലോചിക്കുന്നുണ്ട്​.

പ്രതിപക്ഷ അവകാശം ഹനിക്കണമെന്ന മുഖ്യമന്ത്രിയുടെ നിർദേശം നടപ്പാക്കാൻ സഭയെ ബോധപൂർവം സംഘർഷത്തിലേക്ക്​ തള്ളിവിടുകയാണ്​. ജനാധിപത്യപരമായ പ്രതിഷേധം വാച്ച്​ ആൻഡ്​​ വാർഡിനെ വെച്ച്​ തല്ലിയൊതുക്കാൻ നോക്കുന്നു. മുഖ്യമന്ത്രി പ്രതിപക്ഷാംഗങ്ങളെ വാച്ച്​ ആൻഡ്​​ വാർഡിന്​ ക്വട്ടേഷൻ കൊടുത്തിരിക്കുകയാണെന്ന്​ തോന്നും വിധമാണ്​ കാര്യങ്ങൾ.

സ്പീക്കർ ഇതിന്‍റെ ഇടനിലക്കാരനാകുകയാണ്​. സ്പീക്കറെ തടയൽ ഞങ്ങളുടെ ലക്ഷ്യമല്ല. കെ.കെ. രമയുടെ കൈ താൻ കെട്ടി​ക്കൊടുക്കുന്ന ചിത്രങ്ങൾ വരെ വ്യാജമായി പ്രചരിപ്പിച്ചു. അന്ന്​ താൻ സഭയിലുണ്ടായിരുന്നില്ല. നിയമസഭയിലെ പത്രസമ്മേളന ഹാളിൽ സ്​പെഷൽ ബ്രാഞ്ച്​ പൊലീസ്​ കയറുന്നെങ്കിൽ ഗൗരവമായി കാണണമെന്നും ഷാഫി പറമ്പിൽ പറഞ്ഞു.