ഗീവ്‌ ആൻഡ്​ ടേക്ക്‌ സൊസൈറ്റി മണി ചെയിൻ തട്ടിപ്പ്‌ നടത്തുന്നുണ്ടെങ്കിൽ അന്വേഷിക്കണം -ഹൈകോടതി

കൊച്ചി: മണി ചെയിൻ തട്ടിപ്പ്‌ നടത്തുന്നുണ്ടെങ്കിൽ ഗീവ്‌ ആൻഡ്​ ടേക്ക്‌ സൊസൈറ്റിക്കെതിരെ ​അന്വേഷണം നടത്തണമെന്ന്​ ഹൈകോടതി. തങ്ങൾ നടത്തുന്ന യോഗങ്ങൾ മൾട്ടി ലെവൽ മാർക്കറ്റിങ്​ എംപ്ലോയീസ് യൂനിയൻ (സി.ഐ.ടി.യു) തടസ്സപ്പെടുത്തുന്നുവെന്ന്​ ആരോപിച്ച്​ ഗീവ്‌ ആൻഡ്​ ടേക്ക്‌ സൊസൈറ്റി പൊലീസ് സംരക്ഷണം ആവശ്യപ്പെട്ട്‌ നൽകിയ ഹരജിയിലാണ്‌ ജസ്റ്റിസ്‌ പി.വി. കുഞ്ഞികൃഷ്‌ണന്റെ ഉത്തരവ്‌.

പ്രശാന്ത്‌ പനച്ചിക്കൽ എന്റർപ്രൈസസ്‌ എന്ന സ്വകാര്യ കമ്പനി നടത്തുന്ന ഗീവ്‌ ആൻഡ്​ ടേക്ക്‌ പ്രസ്ഥാനം ചാരിറ്റിയുടെ മറവിൽ മണി ചെയിൻ തട്ടിപ്പ്​ നടത്തുകയാണെന്നായിരുന്നു എതിർകക്ഷികളുടെ വാദം. മണി ചെയിൻ തട്ടിപ്പിന്റെ തെളിവുകളുണ്ടെങ്കിൽ ഹാജരാക്കണമെന്ന്‌ കോടതി ഇവരോട്​ നിർദേശിച്ചു. തുടർന്നാണ്​ രേഖകൾ പരിശോധിച്ച ശേഷം വീൽചെയർ വിതരണത്തിന്റെയും സ്റ്റഡി ക്ലാസുകളുടെയും മറവിൽ മണി ചെയിൻ തട്ടിപ്പാണ്​ നടക്കുന്നതെങ്കിൽ അന്വേഷിക്കാൻ കോടതി നിർദേശിച്ചത്​.