മോന്‍സൺ മാവുങ്കലുമായി ബന്ധം: ഐ.ജി ലക്ഷ്മണിന്‍റെ സസ്​പെൻഷൻ നീട്ടി

തിരുവനന്തപുരം: പുരാവസ്തു തട്ടിപ്പുകാരൻ മോന്‍സൺ മാവുങ്കലിനെ സഹായിച്ചതിൽ നടപടി നേരിടുന്ന ഐ.ജി ഗോകുലത്ത് ലക്ഷ്‍മണിന്‍റെ സസ്‍പെന്‍ഷന്‍ 90 ദിവസം കൂടി നീട്ടി. മോന്‍സനുമായി അടുത്ത ബന്ധമുണ്ടെന്ന ക്രൈംബ്രാഞ്ച് റിപ്പോർട്ടിനെ തുടർന്നാണ് ലക്ഷ്മണിനെ കഴിഞ്ഞ വർഷം നവംബർ 10ന്​ സസ്പെന്‍ഡ്​ ചെയ്തത്.

മോൻസന്‍റെ പുരാവസ്തു തട്ടിപ്പിൽ ഐ.ജി ഇടനിലക്കാരനായി പ്രവർത്തിച്ചെന്ന മൊഴിയും പുറത്തുവന്നിരുന്നു. പുരാവസ്തു ഇടപാടിന് ആന്ധ്ര സ്വദേശിനിയെ മോൻസന്​ പരിചയപ്പെടുത്തിക്കൊടുത്തത് ഐ.ജി ലക്ഷ്മൺ ആയിരുന്നെന്നും ക്രൈംബ്രാഞ്ച്​ അന്വേഷണത്തിൽ കണ്ടെത്തിയിരുന്നു.