കൊല്ലാൻ ഗ്രീഷ്‌മ ഉപയോഗിച്ച കഷായം വാങ്ങിയത് അമ്മ​; ആശുപത്രിയിലെത്തിച്ച്​ തെളിവെടുത്തു

തിരുവനന്തപുരം: ഷാരോണിനെ കൊലപ്പെടുത്താൻ ഗ്രീഷ്‌മ ഉപയോഗിച്ച കഷായം അമ്മ സിന്ധു പൂവാറിലെ ആശുപത്രിയിൽനിന്ന്‌ വാങ്ങിയത്‌. പൂവാറിലുള്ള ആശുപത്രിയിൽനിന്ന്‌ സെപ്‌റ്റംബറിൽ സിന്ധു വാങ്ങിയ കഷായക്കൂട്ട്​ ഉപയോഗിച്ചാണ്‌ ഗ്രീഷ്‌മ കൊലപാതകം നടത്തിയത്‌. രണ്ടുദിവസത്തെ ചോദ്യംചെയ്യലിലാണ്‌ സിന്ധു താൻ കഷായം വാങ്ങിയിരുന്നെന്ന കാര്യം പൊലീനോട്‌ വെളിപ്പെടുത്തിയത്‌. പിന്നാലെ സിന്ധുവുമായി പൊലീസ്‌ ആശുപത്രിയിൽ തെളിവെടുപ്പിനെത്തി. ഇവിടെനിന്ന്​ കഷായത്തിന്‍റെ സാമ്പിളും പൊലീസ്​ ശേഖരിച്ചു. ഇത്​ ശാസ്ത്രീയ പരിശോധനക്കയക്കും.

അമ്മക്ക്​ കൊലപാതകത്തിൽ പങ്കില്ലെന്നാണ്‌ ഗ്രീഷ്‌മയുടെ മൊഴി. ഇതാണ്‌ സിന്ധുവും ആവർത്തിക്കുന്നത്‌. ഇത്​ പൊലീസ്​ വിശ്വസിക്കുന്നില്ല. ഇരുവരും ചേർന്നാണ്‌ കൊലപാതകം നടത്തിയതെന്നാണ്‌ പൊലീസ്‌ സംശയിക്കുന്നത്‌. ചില മൊഴികളിലെ വൈരുധ്യമാണ്‌ സംശയത്തിനാധാരം. കഷായമുണ്ടാക്കുന്നതിൽ ഗ്രീഷ്‌മക്ക്​ സിന്ധുവിന്റെ സഹായമുണ്ടായിട്ടുണ്ടോ എന്ന്‌ പൊലീസ്‌ വിശദമായി പരിശോധിക്കും. ഷാരോണിന്‍റെ സഹോദരനോടുള്ള ഫോൺ സംഭാഷണത്തിൽ അമ്മയാണ്​ തനിക്ക്​ കഷായമുണ്ടാക്കി തരുന്നതെന്നാണ്​ ഗ്രീഷ്മ പറയുന്നത്​.

ഷാരോണ്‍ കൊലക്കേസില്‍ നിര്‍ണായക തെളിവ്​​ ശേഖരിച്ചെന്നാണ്​ അന്വേഷണസംഘത്തിന്‍റെ നിലപാട്​. നശിപ്പിച്ചെന്ന്​ കരുതിയ വിഷക്കുപ്പി കണ്ടെടുക്കാനായത്​ നിർണായകമാണെന്ന്​ പൊലീസ്​ പറയുന്നു. കളനാശിനി വാങ്ങിയ കളിയിക്കാവിളയിലെ കടയിലും തെളിവെടുപ്പ് നടത്തി.

കൊലപാതകം അറിഞ്ഞ ശേഷമാണ് കളനാശിനി കുപ്പി കളയാൻ ഗ്രീഷ്മയുടെ അമ്മയും അമ്മാവനും കൂടി തീരുമാനമെടുത്തത്. തമിഴ്നാട്ടിൽ നിന്നും വരുന്നവഴി കളിയിക്കാവിളയിൽനിന്ന്​ വാങ്ങിയ നാല്​ കളനാശിനികളിലൊന്ന്​ കാണാതായി. അപ്പോൾ കൊലപാതകത്തിന്​ ഗ്രീഷ്​മ ഇതു ഉപയോഗിച്ചോയെന്ന സംശയുണ്ടായി. പിന്നീട് ഉറപ്പിച്ചു. ഇതോടെ തെളിവ്​ നശിപ്പിക്കാൻ തീരുമാനിക്കുകയായിരുന്നെന്നും അന്വേഷണ സംഘത്തോട്​ മാതാവും അമ്മാവനും സമ്മതിച്ചു.