മുക്കം ഉമർ ഫൈസി വീണ്ടും സംസ്​ഥാന ഹജ്ജ്​ കമ്മിറ്റിയിൽ

തിരുവനന്തപുരം: സംസ്ഥാന ഹജ്ജ് കമ്മിറ്റി പുനഃസംഘടനയുടെ ഭാഗമായി 16 പുതിയ അംഗങ്ങളെ നാമനിർദേശം ചെയ്ത് വിജ്ഞാപനമിറങ്ങി. സമസ്​ത ഇ.കെ വിഭാഗം പ്രതിനിധിയായി തുടർച്ചയായി രണ്ടാംതവണയും മുക്കം ഉമർ ഫൈസി കമ്മിറ്റിയിൽ ഉൾപ്പെട്ടു​.

സമസ്​തയിൽ സി.പി.എം അനുകൂല നിലപാടെടുക്കുന്ന മുശാവറ അംഗമാണ്​ ഉമർ ഫൈസിയെന്ന്​ ആരോപണമുയർന്നിരുന്നു. ഇതിനിടെയാണ്​ കഴിഞ്ഞ ഹജ്ജ്​ കമ്മിറ്റിയിൽ അംഗമായ ഉമർ ഫൈസിയെ പുതിയ കമ്മിറ്റിയിലും ഉൾപ്പെടുത്തിയത്​.

പി.വി. അബ്ദുൽ വഹാബ് എം.പി, പി.ടി.എ. റഹീം എം.എൽ.എ, മുഹമ്മദ് മുഹ്സിൻ എം.എൽ.എ, പി.പി. മുഹമ്മദ് റാഫി (നീലേശ്വരം മുനിസിപ്പാലിറ്റി വൈസ്​ ചെയർമാൻ), പി.ടി. അക്ബർ (താനൂർ മുനിസിപ്പാലിറ്റി കൗൺസിലർ), അഷ്കർ കോരാട് (ഒഴൂർ ഗ്രാമപഞ്ചായത്ത് വൈസ് പ്രസിഡന്‍റ്), ഡോ. ഹുസൈൻ സഖാഫി ചുള്ളിക്കോട്, അഡ്വ. മൊയ്തീൻകുട്ടി വളമംഗലം, ഒ.വി. ജഅ്​ഫർ വടക്കുമ്പാട്, ഷംസുദ്ദീൻ അരിഞ്ഞിറ, നൂർ മുഹമ്മദ് നൂർഷാ, എം.എസ്. അനസ്, കരമന ബയാർ, വഖഫ് ബോർഡ് ചെയർമാൻ അഡ്വ. എം.കെ. സക്കീർ, മലപ്പുറം കലക്ടർ എന്നിവരാണ് പുനഃസംഘടിപ്പിക്കുന്ന കമ്മിറ്റിയിലെ മറ്റ്​ അംഗങ്ങൾ.

പുനഃസംഘടിപ്പിക്കുന്ന കമ്മിറ്റിയുടെ ആദ്യ യോഗത്തിൽ പുതിയ ചെയർമാനെ തെരഞ്ഞെടുക്കും. സുന്നി എ.പി വിഭാഗത്തിന്‍റെ പ്രതിനിധിയായ ഹുസൈൻ സഖാഫി ചുള്ളിക്കോട്​ ചെയർമാനായേക്കും.