ഭീകരവാദികളുടെ സാന്നിധ്യം അറിയാത്തത് ഗുരുതരവീഴ്ച; മതസ്പർധ വളര്‍ത്തി കലാപം സൃഷ്​ടിക്കാൻ സി.പി.എം ശ്രമം- മുല്ലപ്പള്ളി

തിരുവനന്തപുരം: അൽഖാഇദ ഭീകരവാദികളുടെ സാന്നിധ്യം സംസ്ഥാന ഇൻറലിജൻസും പൊലീസും അറിയാതിരുന്നത് ഗുരുതരവീഴ്ചയെന്ന് കെ.പി.സി.സി പ്രസിഡൻറ്​ മുല്ലപ്പള്ളി രാമചന്ദ്രന്‍. സംസ്ഥാനത്ത്​ നിയമവാഴ്ച തകര്‍ന്നതിന് തെളിവാണിത്​. സി.പി.എം ഭരണം കേരളത്തെ ഭീകരവാദികള്‍ക്ക് വളക്കൂറുള്ള മണ്ണാക്കി മാറ്റി. എല്ലാ രാജ്യദ്രോഹ ശക്തികള്‍ക്കും എപ്പോള്‍ വേണമെങ്കിലും കേരളത്തില്‍ വന്നുപോകാമെന്ന അപകടകരമാണെന്നും കെ.പി.സി.സി പ്രസിഡൻറ്​ പറഞ്ഞു.

അതേസമയം, സർക്കാറിനെതിരെ സമരം നടത്തുന്ന യുവാക്കള്‍ക്കും വിദ്യാർഥികള്‍ക്കുമെതിരെ ​െപാലീസ് നരനായാട്ട് നടത്തുന്നു. ഭരണകൂട ഭീകരതയാണ് കേരളത്തില്‍. എല്ലാ ക്രമക്കേടുകളു​െടയും കേന്ദ്രബിന്ദു മുഖ്യമന്ത്രിയാണ്​.

സ്വര്‍ണക്കടത്ത്, മയക്കുമരുന്ന്​ കേസുകളിൽ സി.പി.എം നേതാക്കളും മക്കളും ഉള്‍പ്പെടുമെന്ന് ഉറപ്പായപ്പോള്‍ മതസ്പർധ വളര്‍ത്തി കലാപം സൃഷ്​ടിക്കാനാണ് പാര്‍ട്ടി സെക്രട്ടറിയുടെ ശ്രമം. മത വികാരം ഇളക്കിവിടാന്‍ വിശുദ്ധ മതഗ്രന്ഥങ്ങളെ ഉപയോഗിക്കുന്നത് അത്യന്തം അപകടകരമാണ്. മതത്തെ ദുരുപയോഗിച്ച്​ ന്യൂനപക്ഷത്തെ ഒപ്പം നിര്‍ത്താനുള്ള സി.പി.എം തന്ത്രമാണിത്. വിശ്വാസികളെ തെറ്റിദ്ധരിപ്പിക്കാനുള്ള ഇൗ നീക്കം ജനം തള്ളും.

സ്വര്‍ണക്കടത്ത്​ അന്വേഷണം സി.പി.എം നേതാക്കളു​െടയും മന്ത്രിമാരു​െടയും കുടുംബാംഗങ്ങളു​െടയും പടിവാതിക്കല്‍ എത്തി. കേസിൽ സി.പി.എം, ബി.ജെ.പി നേതാക്കളുടെ പങ്ക് അന്വേഷിക്കണം. ജലീലിനെ സംരക്ഷിക്കുന്ന സി.പി.എം നിലപാടിനോട് പ്രതികരിക്കാന്‍ പോളിറ്റ് ബ്യൂറോയും കേന്ദ്രകമ്മിറ്റിയും തയാറാകണമെന്നും മുല്ലപ്പള്ളി ആവശ്യപ്പെട്ടു.