മൻസൂർ കൊല്ലപ്പെട്ടത്​ ബോം​ബേറിലുണ്ടായ പരിക്ക്​ മൂലമെന്ന്​ പോസ്റ്റ്​മോർട്ടം റി​പ്പോർട്ട്​

കൂത്തുപറമ്പ്​: കണ്ണൂർ കൂത്തുപറമ്പിൽ മുസ്​ലിം ലീഗ്​ പ്രവർത്തകൻ പാറാൽ മൻസൂർ കൊല്ലപ്പെട്ടത്​ ബോംബ്​ സ്​ഫോടനത്തിലെന്ന്​ പോസ്റ്റ്​മോർട്ടം റിപ്പോർട്ട്​. ബോംബേറിൽ ഇടതു കാലിലുണ്ടായ മുറിവാണ്​ മരണകാരണമെന്നും റിപ്പോർട്ട്​ പറയുന്നു.

മൻസൂറിനെ വെട്ടിക്കൊന്ന കേസിൽ സി.പി.എം പ്രവർത്തകൻ ഷിനോസ്​ പിടിയിലായിരുന്നു. കൊല്ലപ്പെട്ട മൻസൂറിന്‍റെ അയൽവാസിയാണ്​ ഷിനോസ്​.

കൂത്തുപറമ്പ്​ പുല്ലൂക്കര മുക്കിൽ പീടികയിൽ വോ​ട്ടെടുപ്പിന്​ പിന്നാലെയുണ്ടായ ആക്രമണത്തിൽ യൂത്ത് ലീഗ്​ പ്രവർത്തകനായ പാറാൽ മൻസൂർ (22) ആണ്​ വെ​േട്ടറ്റു മരിച്ചത്​.

വീട്ടിൽ കയറി ബോംബെറിഞ്ഞ ശേഷമായിരുന്നു ആക്രമണം. സഹോദരൻ മുഹ്സിന്​ ( 27) ആക്രമണത്തിൽ സാരമായി പരിക്കേറ്റിരുന്നു. ഇന്നലെ രാത്രി 8 മണിയോടെയാണ് സംഭവം. ആക്രമണത്തിന്​ പിന്നിൽ സി.പി.എമ്മാണെന്ന്​ ലീഗ്​ ആരോപിച്ചു.

മുഹ്​സിൻ വീട്ടുമുറ്റത്ത് കൂട്ടുകാരോടൊത്ത് സംസാരിച്ച് കൊണ്ടിരിക്കെയാണ് ബോംബെറിഞ്ഞ് ഭീകരാന്തരീക്ഷം സൃഷ്ടിച്ച അക്രമി സംഘം എത്തിയത്​. മുഹ്സിനെ വലിച്ചിഴച്ച് വെട്ടുമ്പോൾ തടയാൻ ചെന്നപ്പോഴാണ്​ സഹോദരൻ മൻസൂറിന്​ വെട്ടേറ്റത്.അക്രമി സംഘത്തെ തടയാൻ ശ്രമിച്ച മുഹ്സിൻ്റെ മാതാവിനും അയൽപക്കത്തുള്ള സ്ത്രീക്കും പരിക്കുണ്ട്.

അൽസിഫയിൽ പാറാൽ മുസ്തഫയാണ്​ മൻസൂറിന്‍റെ പിതാവ്​. മാതാവ്: സക്കീന. സഹോദരങ്ങൾ: മുനീബ്​, മുബിൽ, മുഹസിൻ, മുഹമ്മദ്​.