കേരള ബാങ്ക്​ രൂപീകരണത്തെ എതിർക്കും -കെ.പി.എ. മജീദ്​

മലപ്പുറം: കേരള ബാങ്ക് രൂപവത്കരണത്തെ എതിർക്കുമെന്ന്​ മുസ്​ലിം ലീഗ്​ സംസ്ഥാന ജനറൽ സെക്രട്ടറി കെ.പി.എ. മജീദ്​. സഹകരണ മേഖലയെ പ്രതിസന്ധിയിലാക്കുന്ന സര്‍ക്കാര്‍ നയങ്ങള്‍ തിരുത്തണമെന്ന്​ അദ്ദേഹം വാർത്തസമ്മേളനത്തിൽ ആവശ്യപ്പെട്ടു.

ജില്ല ബാങ്കുകളുടെ ജനറല്‍ബോഡി അംഗീകാരം നല്‍കിയാല്‍ മാത്രമേ കേരള ബാങ്ക് യാഥാർഥ്യമാകൂ. അഞ്ച് ജില്ല ബാങ്കുകൾ യു.ഡി.എഫാണ്​ ഭരിക്കുന്നത്​. മലപ്പുറം, വയനാട്, കാസര്‍കോട്​, കോട്ടയം, ഇടുക്കി അഞ്ച് ജില്ലകളില്‍ ജനറല്‍ബോഡി ചേരുമ്പോള്‍ കേരള ബാങ്ക് ആവശ്യമില്ല എന്ന നിലപാടാണ്​ സ്വീകരിക്കുക.

കേരള ബാങ്ക് നിലവില്‍ വരുന്നതോടെ നവതലമുറ ബാങ്കുകൾക്ക്​ സാധ്യത വർധിക്കും. സഹകരണ ബാങ്കുകൾ പിടിച്ചടക്കാനുള്ള സർക്കാർ നീക്ക​മാണ്​ ഇതിന്​ പിന്നിലെന്നും മജീദ്​ ആരോപിച്ചു.