ഫാത്തിമ തഹ്​ലിയ അടക്കം എം.എസ്.എഫ്-ഹരിത നേതാക്കൾക്കെതിരായ അച്ചടക്ക നടപടി പിൻവലിച്ച് ലീഗ്

കോഴിക്കോട്: എം.എസ്.എഫ്, ഹരിത നേതാക്കൾക്കെതിരായ അച്ചടക്ക നടപടി മുസ്‍ലിംലീഗ് പിൻവലിച്ചു. എം.എസ്.എഫ് മുൻ ദേശീയ വൈസ് പ്രസിഡന്‍റ് അഡ്വ. ഫാത്തിമ തഹ് ലിയ, ഹരിത മുൻ പ്രസിഡന്‍റ് മുഫീദ തസ്നി, മുൻ ജനറൽ സെക്രട്ടറി അഡ്വ. നജ്മ തബ്ഷീറ, എം.എസ്.എഫ് സംസ്ഥാന ഭാരവാഹികളായ ലത്തീഫ് തുറയൂർ, കെ.എം. ഫവാസ് എന്നിവർക്കെതിരായ നടപടിയാണ് അവസാനിപ്പിച്ചത്. മുൻ ഹരിത നേതാക്കൾ എം.എസ്​.എഫ് സംസ്​ഥാന പ്രസിഡന്റ് പി.കെ. നവാസിനെതിരെ ഫയൽ ചെയ്ത കേസ്​ പിൻവലിക്കാനും ധാരണയായിട്ടുണ്ട്.

നടപടികൾ പിൻവലിച്ച സാഹചര്യത്തിൽ ഇവരുടെ പ്രവർത്തന മേഖലകൾ ബന്ധപ്പെട്ട ഘടകങ്ങൾ തീരുമാനിക്കും. നടപടികൾക്ക് വിധേയരായവർ സംസ്​ഥാന നേതൃത്വത്തിന് നൽകിയ അപേക്ഷയുടെ അടിസ്​ഥാനത്തിലാണ് തീരുമാനം.

എം.എസ്.എഫ് സംസ്ഥാന പ്രസിഡന്റിനെതിരെ ആരോപണം ഉന്നയിച്ച ഹരിത നേതാക്കൾക്കൊപ്പം നിലകൊണ്ടതിന്റെ പേരിലായിരുന്നു ലത്തീഫ് തുറയൂരിനെതിരെയും കെ.എം. ഫവാസിനെതിരെയും നടപടിയെടുത്തത്. പാർട്ടി നടപടി നേരിട്ടശേഷം ലീഗ് നേതൃത്വത്തിനെതിരെ പരസ്യ വിമർശനമുന്നയിച്ച ഇവർ പിന്നീട് പാർട്ടിക്ക് മാപ്പപേക്ഷ നൽകിയതും പരിഗണിച്ചാണ് തിരിച്ചെടുത്തത്.

2021 ജൂ​ൺ 22ന്​ ​​എം.​എ​സ്.​എ​ഫിന്‍റെ കോ​ഴി​ക്കോ​​ട്ടെ സം​സ്​​ഥാ​ന ക​മ്മി​റ്റി ഓ​ഫി​സാ​യ വെ​ള്ള​യി​ൽ ഹ​ബീ​ബ്​​ സെൻറ​റി​ൽ ന​ട​ന്ന യോ​ഗ​ത്തി​ൽ ലൈം​ഗി​ക​മാ​യി അ​ധി​ക്ഷേ​പി​ച്ച്​​ സം​സാ​രി​ച്ച​തായി ചൂണ്ടിക്കാട്ടി പി.​കെ. ന​വാ​സി​നെ​തിരെയാണ് ഹരിത നേതാക്കൾ​​ സംസ്ഥാന വനിത കമീഷന് പ​രാ​തി നൽകിയത്.

ക​മീ​ഷ​ന്​ ല​ഭി​ച്ച പ​രാ​തി പൊ​ലീ​സി​​ന്​ കൈ​മാ​റി​യ​തി​നെ തു​ട​ർ​ന്ന്​​ ചെ​മ്മ​ങ്ങാ​ട്​ പൊ​ലീ​സ്​ ര​ജി​സ്​​റ്റ​ർ ചെ​യ്​​ത കേ​സി​ൽ എം.​എ​സ്.​എ​ഫ്​ സം​സ്​​ഥാ​ന പ്ര​സി​ഡ​ൻ​റ്​ പി.​കെ. ന​വാ​സി​നെ അ​റ​സ്​​റ്റ്​ ചെ​യ്​​ത്​ ജാ​മ്യ​ത്തി​ൽ വി​ട്ടി​രു​ന്നു. ഇ​തി​നി​ട​യി​ൽ മു​സ്​​ലിം ലീ​ഗ്​ നേ​തൃ​ത്വം ഇ​ട​പെ​ട്ട്​ പ്ര​ശ്​​നം ഒ​തു​ക്കി​ത്തീ​ർ​ക്കാ​ൻ ശ്ര​മി​​ച്ചെങ്കി​ലും ഹ​രി​ത നേ​താ​ക്ക​ൾ വ​ഴ​ങ്ങി​യി​ല്ല.

തു​ട​ർ​ന്ന്​ ഹ​രി​ത സം​സ്​​ഥാ​ന ക​മ്മി​റ്റി പി​രി​ച്ചു​വി​ട്ട്​ പു​തി​യ ക​മ്മി​റ്റി​യെ ലീ​ഗ്​ പ്ര​ഖ്യാ​പി​ക്കു​ക​യും ഹ​രി​ത​യെ പി​ന്തു​ണ​ച്ച ഫാ​ത്തി​മ ത​ഹ്​​ലി​യ​യെ എം.​എ​സ്.​എ​ഫ്​ ദേ​ശീ​യ വൈ​സ്​ പ്ര​സി​ഡ​ൻ​റ്​ സ്​​ഥാ​ന​ത്തു​നി​ന്ന്​ നീ​ക്കു​ക​യും ചെ​യ്​​തു. ന​ട​പ​ടി ​വ​ക​വെ​ക്കാ​തെ പ​രാ​തി​യി​ൽ ഉ​റ​ച്ചു​നി​ൽ​ക്കു​ക​യാ​ണ്​ ഹ​രി​ത ഭാ​ര​വാ​ഹി​ക​ൾ അന്ന് ചെയ്തത്.