കന്യാസ്ത്രീ വിദ്യാർഥിനിയുടെ മരണം: ദുരൂഹത മാറ്റാനാകാതെ പൊലീസ്

തിരുവല്ല: പാലിയേക്കര മഠത്തിലെ കിണറ്റിൽ വിദ്യാർഥിനിയായ ദിവ്യ മരിച്ച്​ ഒരാഴ്​ച കഴിഞ്ഞിട്ടും  സംഭവത്തിനുപിന്നിലെ ദുരൂഹത മാറ്റാനാകാതെ പൊലീസ്​.  മരണം നടന്നതി​​െൻറ തൊട്ടടുത്തദിവസം തന്നെ ഫോറൻസിക് സംഘവും ഡോഗ് സ്​ക്വാഡും പരിശോധനകൾ നടത്തിയെങ്കിലും ഇതുസംബന്ധിച്ച വിവരങ്ങൾ പൊലീസ്  പുറത്തുവിടാത്തതും ദുരൂഹത വർധിപ്പിക്കുന്നു. കോട്ടയത്തുനിന്നുള്ള പൊലീസ് സർജ​​െൻറ നേതൃത്വത്തിലുള്ള സംഘം തിങ്കളാഴ്ച മഠത്തിലെത്തി പരിശോധന നടത്തിയിരുന്നു. 
എന്നാൽ, ഇവക്കൊന്നും ഔദ്യോഗിക  വിശദീകരണം നൽകാൻ കേസ്​ അന്വേഷണത്തി​​െൻറ ചുമതലയുള്ള തിരുവല്ലയിലെ പൊലീസ് ഉദ്യോഗസ്ഥർ  തയാറായിട്ടില്ല.
 സി.ആർ.പി.എഫ് ഹൈദരാബാദ് യൂനിറ്റിലെ ഉദ്യോഗസ്ഥൻ ചുങ്കപ്പാറ തടത്തേമലയിൽ പള്ളിക്കപ്പറമ്പിൽ വീട്ടിൽ ജോൺ ഫിലിപ്പോസി​​െൻറ മകൾ ദിവ്യ പി.ജോണിനെയാണ്​ (21) മലങ്കര കത്തോലിക്ക സഭയുടെ അധീനതയിലുള്ള തിരുവല്ല പാലിയേക്കര ബസീലിയൻ സിസ്​റ്റേഴ്സ് മഠത്തിലെ കിണറ്റിനുള്ളിൽ മരിച്ചനിലയിൽ കണ്ടെത്തിയത്.
വിശദമായ പോസ്​റ്റ്മോർട്ടം റിപ്പോർട്ട് ലഭിക്കാതെ തന്നെ മുങ്ങിമരണമെന്ന് ഉറപ്പിക്കുംവിധം  നടത്തിയ അഭിപ്രായ പ്രകടനമാണ് ഇപ്പോൾ പൊലീസിനെ വെട്ടിലാക്കിയിരിക്കുന്നത്. 
ആത്മഹത്യയാണെന്ന നിഗമനത്തിൽ ഉറച്ചുനിന്ന പൊലീസ് വിശദമായ പോസ്​റ്റ്മോർട്ടം റിപ്പോർട്ട് കിട്ടിയശേഷം തുടർനടപടി സ്വീകരിക്കുമെന്ന നിലപാടിലാണിപ്പോൾ. എന്നാൽ, പെൺകുട്ടിയുടെ കുടുംബത്തിന് മരണത്തിൽ സംശയമുണ്ടെന്നാണ് സൂചന. പരാതിയോ സംശയമോ ഇല്ലെന്ന നിലപാടിലായിരുന്നു കുടുംബം ആദ്യം. പൊലീസി​​െൻറ അന്തിമ നിഗമനം എന്താണെന്നറിയാനുള്ള കാത്തിരിപ്പിലാണ് കുടുംബം. ദിവ്യയുടെ പിതാവ് ജോൺ ഫിലിപ്പോസ് ഇപ്പോൾ ഹോം ക്വാറ​ൻറീനിലാണ്.
 ദിവ്യയുടെ ഏഴാം ചരമദിനം കഴിഞ്ഞ് എന്തെങ്കിലും പ്രതികരണം കുടുംബത്തി​​െൻറ ഭാഗത്തുനിന്ന്​ ഉണ്ടാകുമെന്നും സൂചനയുണ്ട്.