ചാരക്കേസ് പുനരന്വേഷിക്കാൻ സെൻകുമാർ അമിതതാൽപര്യം കാട്ടി -നമ്പി നാരായണൻ

കൊച്ചി: ഐ.എസ്.ആർ.ഒ ചാരക്കേസ് പുനരന്വേഷിക്കാൻ മുൻ ഡി.ജി.പി ടി.പി സെൻകുമാർ അമിത താൽപര്യം കാട്ടിയെന്ന് ശാസ്ത്രജ്ഞ ൻ നമ്പി നാരായണൻ. അന്വേഷണം നടത്താൻ പൊലീസിന് അധികാരമില്ലെന്ന് സി.ജെ.എം കോടതി പറഞ്ഞിട്ടും സെൻകുമാർ കേസുമായി മുന്നോട്ടു പോയി. ചാരക്കേസ് അന്വേഷണം നടത്താൻ മന്ത്രിസഭാ ആ സമയത്ത് തീരുമാനിച്ചിരുന്നില്ലെന്നും നമ്പി നാരായണൻ പറഞ്ഞു.

സത്യസന്ധനായ പൊലീസ് ഒാഫിസർ ആയിരുന്നെങ്കിൽ കോടതി ഉത്തരവ് ചൂണ്ടിക്കാട്ടി അന്വേഷണം പാടില്ലെന്ന് ബന്ധപ്പെട്ടവരെ അറിയിക്കുകയാണ് ചെയ്യേണ്ടിയിരുന്നത്. സെൻകുമാർ പ്രതിയായ നഷ്ടപരിഹാര കേസുമായി മുന്നോട്ടു പോകുമെന്നും ഒരു ചാനൽ അഭിമുഖത്തിൽ നമ്പി നാരായണൻ വ്യക്തമാക്കി.