നവകേരള സ്ത്രീ സദസ്: മുഖ്യമന്ത്രിയുമായി സ്ത്രീകളുടെ മുഖാമുഖം വ്യാഴാഴ്ച

കൊച്ചി: സ്ത്രീപക്ഷ നവകേരളം എന്ന ലക്ഷ്യത്തോടെ മുഖ്യമന്ത്രിയുടെ മുഖാമുഖം പരിപാടിയുടെ ഭാഗമായി സംഘടിപ്പിക്കുന്ന നവകേരള സ്ത്രീ സദസ് 22ന് രാവിലെ 9.30 മുതല്‍ 1.30 വരെ നെടുമ്പാശ്ശേരി സിയാല്‍ കണ്‍വെന്‍ഷന്‍ സെന്ററില്‍ നടക്കും.

സ്ത്രീപക്ഷ നവകേരളം യാഥാർഥ്യമാക്കുന്നതിനുള്ള ചര്‍ച്ചകള്‍ക്കും നിർദേശങ്ങള്‍ സ്വരൂപിക്കുന്നതിനുമായാണ് വിവിധ മേഖലകളിലുള്ള സ്ത്രീകളുമായി മുഖ്യമന്ത്രി നേരിട്ട് സംവദിക്കുന്നത്. വിവിധ മേഖലകളില്‍ നിന്നുള്ള വനിതകള്‍ മുഖ്യമന്ത്രിയുമായി സംവദിക്കും. ആമുഖമായി മുഖ്യമന്ത്രി സംസാരിച്ച ശേഷമായിരിക്കും വനിതകള്‍ സംസാരിക്കുക. അഭിപ്രായങ്ങള്‍ എഴുതി നല്‍കാനും അവസരം ഉണ്ടാകും. എല്ലാവരുടെയും അഭിപ്രായങ്ങള്‍ കേട്ടശേഷം മുഖ്യമന്ത്രി മറുപടി പ്രസംഗം നടത്തും. രണ്ടായിരം സ്ത്രീകള്‍ പരിപാടിയില്‍ പങ്കെടുക്കും.

ആരോഗ്യവകുപ്പ് മന്ത്രി വീണ ജോര്‍ജ് ചടങ്ങില്‍ അധ്യക്ഷത വഹിക്കും. മന്ത്രിമാരായ പി. രാജീവ്, ആര്‍. ബിന്ദു, ജെ. ചിഞ്ചു റാണി, റോജി എം ജോണ്‍ എം.എല്‍.എ, വനിത ശിശു വികസന വകുപ്പ് പ്രിന്‍സിപ്പല്‍ സെക്രട്ടറി ഡോ. ശര്‍മിള മേരി ജോസഫ്, വനിത ശിശു വികസന വകുപ്പ് ഡയറക്ടര്‍ ഹരിത വി. കുമാര്‍ തുടങ്ങിയവര്‍ പങ്കെടുക്കും. ഡോ. ടി.എന്‍ സീമ പരിപാടിയില്‍ മോഡറേറ്ററാകും.