'49 തവണ കുട്ടിക്ക്​ രക്തം നൽകി, രക്തം നൽകിയ ഒരാൾ എച്ച്​.ഐ.വി ബാധിതൻ'; എച്ച്​.ഐ.വി ബാധിച്ച് മരിച്ച ഒമ്പത് വയസുകാരിയുടെ കുടുംബത്തിന് ഇതുവരെ നഷ്ടപരിഹാരം ലഭിച്ചില്ല

കൊച്ചി: രക്താർബുദത്തെതുടർന്ന്​​ ആശുപത്രിയിൽ ചികിത്സയിലിരുന്ന ഒമ്പതുകാരിക്ക്​ എച്ച്.ഐ.വി ബാധിച്ച സംഭവത്തിൽ നഷ്ടപരിഹാരം നൽകാൻ ഉദ്ദേശിക്കുന്നുണ്ടോയെന്ന്​ സർക്കാറിനോട്​ ഹൈകോടതി.

തിരുവനന്തപുരം റീജനൽ കാൻസർ സെന്ററിലെ ചികിത്സയുടെ ഭാഗമായി നൽകിയ രക്തത്തിൽനിന്നാണ് എച്ച്.ഐ.വി ബാധിതയായത്. 2018ൽ കുട്ടി മരിച്ചു. തുടർന്നാണ്​​ പിതാവ്​ നഷ്ടപരിഹാരംതേടി ഹൈകോടതിയെ സമീപിച്ചത്​. ഇതുസംബന്ധിച്ച്​ ചീഫ് സെക്രട്ടറിയോ ആരോഗ്യ പ്രിൻസിപ്പൽ സെക്രട്ടറിയോ മൂന്നാഴ്ചക്കകം നിലപാട്​ വ്യക്തമാക്കി സത്യവാങ്​മൂലം സമർപ്പിക്കാനാണ്​ ജസ്റ്റിസ് സി.പി. മുഹമ്മദ് നിയാസിന്‍റെ നിർദേശം.

കുട്ടിയെ ആലപ്പുഴ മെഡിക്കൽ കോളജിൽനിന്നാണ്​ ആർ.സി.സി​യിലേക്ക്​ കൊണ്ടുപോയത്​. അവിടെയെത്തി ആദ്യം നടത്തിയ പരിശോധനകളിൽ എച്ച്.ഐ.വി നെഗറ്റിവായിരുന്നു. 49 തവണ കുട്ടിക്ക്​ രക്തം നൽകി. രക്തം നൽകിയ ഒരാൾ എച്ച്​.ഐ.വി ബാധിതനായിരുന്നുവെന്ന് പിന്നീട് കണ്ടെത്തി.

പിന്നീട്​ കുട്ടിയും എച്ച്.ഐ.വി പോസിറ്റിവായി. പരിശോധനക്ക്​ അന്നുപയോഗിച്ചിരുന്ന സാ​​ങ്കേതികവിദ്യ എച്ച്.ഐ.വി ബാധ ഉടനടി കണ്ടെത്താൻ പര്യാപ്തമായിരുന്നില്ലെന്നാണ് സർക്കാർ കോടതിയെ അറിയിച്ചത്. നിലവിൽ രക്തപരിശോധനക്ക്​ ഉപയോഗിക്കുന്ന സംവിധാനം എന്താണെന്നും ഉപകരണത്തിന്റെ വിശദാംശങ്ങളും അറിയിക്കാൻ കോടതി നിർദേശിച്ചു. ഉന്നതതല ചർച്ചകൾക്കുശേഷം നഷ്ടപരിഹാരം സംബന്ധിച്ച്​ സത്യവാങ്​മൂലം നൽകാനാണ്​ നിർദേശം​.​ ഹരജി വീണ്ടും ഏപ്രിൽ നാലിന് പരിഗണിക്കും.